#الحب والمستحيل 39
#قصة عشق@
عمو احجيلي بالتفصيل
بنتي ابوج راد يرجع لأهله وعشيرته من جنتي صغيرة
بس مگدر لأن ماعده اثبات
وهناك معتبري ميت ومسويله قبر ..
مگدر يرجع وتصير مشاكل ويه أولاد عمومته وخاصة بعد ماماتوا امه وابوه والأملاك والحلال كله صارت لولد عمه (سجاد وناصر) ...
ظل عمو عبد الله يحجيلي
سالفه عجيبه وغريبه
وبسببها بابا تخربط وانتكس وتمرض بالضغط والسكر وهو صغير
من القهر لأن ولد عمه اللي همه ازواج خواته (كريمه وفاطمة) كلّوا حقه وحق خواته وماعده القدرة يواجههم
والسبب من رادني اصير قانونيه
حتى ادعمه وادرس القضيه والزمها بالقانون
واترافع كدام القاضي واعلن احقيتّه بالورث
بس من جنت بالمرحله الاخيرة تعب كلش وتمرض اكثر
وساءت حالته
وراحت كل مخططاته بذيج السنين
ببباله جان اليوم اللي اتعين وافتح مكتب المحاميه اللي تشيل اسمه وتأخذلة حقه الضايع من أكثر من عشرين سنة راحت
...
أم عبدالله باتت بليلتها يمي وراح عمو لبيته
الصبح لكيتها مسويتلي ريوك
وفرحانه بيه لأن لبست الحجاب
بنتي شتكولين نروح نزور للكاظمية وتشترين ملالبس محجبات جديدة تليق بيج وتناسبج
شفتها فكرة عجبتني ..
الصبح خابرت سوسن تسويلي اجازة مرضيه
وبدلت ولفيت الحجاب وطلعت ويه ام عبد الله بسيارتي للكاظمية
دخلنه الكراج بعيد عن الولاية
مشينه مسافه اكو محلات وسوگ
عيني جانت على المحجبات وشلون يتصرفن وفخورات بحجابهن
شگد حلو فد شئ مميز
أم عبدالله كالت خالة نزور وبعدين نتسوك
فعلا دخلنا حضرة الإمامين الجوادين منظر رهيب وصار عندي خشوع ودموعي تصب وتوسلت بالائمه يشفعولي عند الله بالراحة والمغفرة
تعبانه اريد ارتاح
ماريد اشوف جلال بعد
ولاريد واحد يتحكم بحياتي ويذلني ويعيق نجاحي ومستقبلي
واريد يرجعلي هيثم أي هيثم حبيبي أريده حلالي ماعشگت غيره
ميته شوگ ولهفه عليه
واندعيت لبابا وماما هوايه والقضيه اللي تعبت بابا سنين لازم اتحمل المسؤولية الكامله واني اللي آخذ حقه لبابا حسن
كملنه وطلعنا حسيت براحه نفسيه
موطبيعيه
دلتني ام عبدالله بمطعم مشهور اكلنه كباب
ورحنا مسافة لمجمع هناك جبير كلش
بي لعابات لابسه عبايات اسلاميه
اسود والوان وحجابات مرتبه إماراتي وتركي وايراني أشكال وألوان
اشتريت من كل نوع عجبني وصلنه للمحاسبه نحاسب شفت ولد مو غريب علية هذا
صوته وشكله سلمت ماعرفني
شلونك رحيم اني عشق !!
طفر من مكانه عشق !!
باوعلي متعجب شلون صايرة متغيرة كبرانة
ومتحجبه !
ضحكت وفعلا مفاجأة
شجابك هنا؟
اكو ناس يحاسبون اشرلي جيبي غراضج حاسبلي وانطاني جواريب وكفوف ودنابيس ملونه للشال بعلاكه
كال هدية من المحل
للي يشتري هواي
وحاجه ولد يكعد بمكانه وطلع وياي أم عبدالله انتضرتني يم الغراض
عشق شلونج شلونهم الجماعه
انته شخبارك كملت ؟
ايي كملت وماكو تعيين ماحصلت داشتغل كدامج على باب الله
تزوجت !
ايي تزوجت وئام
صدك !!
فرحت من قلبي صافحته
رحيم معقولة لو تتشاقه !!
وداعتج عشق شبعت ضيم وفراگ
كوه حصلتها تتطلكت وظليت وراهة
وتبهذلت ورة سنه يالله قبلوا اهلها نتزوج بالمشقه والعذاب
وهسة وين عايشين انتو ؟
استقرينه هنا بالكاظمية
مأجر بيت صغير
وصار عدنه بنات اثنين
جاب ورقه كتب عنوانه فدوة عشق جيبي البنات زميلاتنه وزورينه ضروري
اخذت رقم موبايله ووصلنه للسيارة ورجع
ام عبدالله اندعتلي وتشكرت مني
اشتريتلها دشداشه وكم شغله
حركت السيارة
وطول الطريق
فرحانه كلش لرحيم شكد صبر
وبالاخير تزوج وئام ورجعت له
ياريت هيثم يرجعلي شكد مشتاقتله
اتذكره كل دقيقة واتمنى يرجع بسرعة
وصلنه
احس بنفسي خفيفة
حتى الصداع راح
يالله ...
الحمد لله اجت بوكتها طلعت اليوم
رجعت للبيت وطلعت الملابس واختاريت كم قطعه البسهن للدوام
وجربت الاحجبه كدام المرايه
صدگ تغير شكلي
اتصلت بريم وجانت مفاجأة الها
تعجبت
كالت اليوم اجي وفهميني شنو هالتغيير
المفاجئ
اجو بليل كلهم حتى عمو ابو ريم وعائلته حجيتلهم عن بابا وعن قراري بالحجاب
علي متأثر كلش والكل متعجب
تعشوا يمي بليلتها وكتلهم عن فكرة عندي ابحث عن موضوع أهل بابا
وعن كلشي قريته بالاوراق
ولازم اروح للبصرة
..
الكل اعترض
ابو ريم بوقتها عنده سفرة زيارة للعمرة
ويه ام ريم بعد اسبوع
كلي بنتي شلون ترحين وحدج واني ماخذ اجازة وبس ارجع شلون اجي وياج ودوامي
علي متخبل جان ومعترض اروح
وريم خافت عليه
سكتتهم گوة
ياجماعه اني هسة عمري 26 سنه
وأعتقد الظروف اللي مريت بيها علمتني شلون اتصرف
وجلال تجربه قاسيه مريت بيها وقسى قلبي صدكوني مااضعف
اكدر اواجههم وارجّع حق بابا
واذا شفت نفسي ضعيفه اتصل بيكم عندي ارقامكم
محتاجه بس دعمكم ودعاءكم إلي
مرت ايام
سافر ابو ريم
واني استغليت كل ساعه تمر
فرصة اتابع مذكرات بابا وعرفت أدق التفاصيل عنهم من اسماءهم واسماء امهاتهم
لاشكالهم واحداث بابا كاتبهة
عن كل واحد منهم حفضتها وراجعتها اكثر من مرة والعنوان بالضبط
وسجلت ملاحظات بدفتر أخذته وياي
واخذت مستمسكات استنساخ الي و لبابا بجنطتي ودفتر فارغ كتبت بي كل الارقام تحسبا لجهازي يصير بي شي وفلوس هوايه
يعني اخذت احتياط لكلشي
رحت لأستاذ حمزة شرحتله الموضوع
علمني كم شغلة
وكلي بنتي روحي وشوفي الوضع اذا شفتي نفور منهم لو نكروج ومتقبلوا الحقيقية
ارجعي واحنا نتصرف بالقانون
فهمني على كم شغلة قانونيه
ودعمني كلش هواي
ووعدني يساعدني ويتصل بيه
وانطيته نسخ من الأوراق العندي
ونسخ خليتهن عند أبو عبدالله
اخذت اجازة شهرين بدون راتب
ورتبت كلشي واخذت ملابس احتياط
وودعت الكل
وطلعت بسيارتي من بغداد للبصرة
يتبع..
#قصة عشق@
أنت تقرأ
#عشق_والمستحيل
Ficção Geral#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
