#الحب والمستحيل 40
#قصة عشق@
طلعت الصبح
طول الطريق افكر شلون راح يستقبلوني هناك
واحفظ بالكلام واتحضر ومخليت آيه حافظتها مقريتها
خايفه كلش
بس لازم اكون قويه
واغلبهم بحسن التصرف
الطريق طويل وبكل محطة افول بنزين واستراح
وصلت المغرب
نزلت من سيارتي قفلتها
وغراضي عفتهن جنت لابسه جبه سوده وبيها لون بيجي بالردان وشال بيجي فاتح طويل وحذاء عاليه
الجو عدهم رطب وحار
الموسم ببدايه الصيف
يربي ساعدني حاولت اكون قويه
شفت مجموعه كاعدين سألتهم
دلوني بالبيت بمزرعه ولد صغير اخذني صعدته بسيارتي
وبس وصلت دلاني على المضيف وراح
وكفت بباب المضيف يعني الزلم هنا
أدخل؟ احتاريت وترددت
بعدين جريت نفس ودخلت
جانو زلم ديشربون جاي
وكفت انتبهولي واكفه واحد اشر لولد يطلع عمرة 13 سنه اجاني
كلي تفضلي ..
كتله اسأل عن ناصر وسجاد
اجه رجال هيبه وطويل يشبه ملامح بابا بكلشي حواجبه وعيونه
رجفت عرفته واحد منهم
رفع حواجبه منو حضرتج !!
صوته خشن ويخوف
فتحت جنطتي طلعت استنساخ لجنسيتي اسمي الكامل بيها
اني خذت احتياط والاصليات ضميتهن ونسخت كلشي
اخذها قرة اسمي عشق حسن نصير ال....
مزكّ الجنسيه وشمرها ببوجهي
منو دزج !
دخلت لجوة ظل جامد بمكانه
باوعت الكل وكف وصفنوا ببوجهي
انتبهت لحركات بعيونهم جانت رموز وغمزّ
طلع قسم منهم وواحد قفل المضيف
الولد الصغير اشروله دخل جوة
اني كعدت وبديت اعرفهم بنفسي
ثلاث زلم واكفين
شفت واحد يختلف عنهم ونفس مواصفات مهدي ابن خالته لبابا
اعتقد انته عمو مهدي
اجه يمي وتعجب
منو انتي وشلون عرفتيني !
عمو اني اعرف كلشي من جنت بالابتدائيه تشتري حب الشمس لصاحبتك
وكل سوالفكم بالمدرسة والصناعة
لحد ماعافك بابا حسن وسافر للشمال
لونه انخطف وظل يبلع بريكه
الثنين الواكفين معجبهم كلامي واحد صار عصبي
اشرلي كومي طلعي برة
الثاني كله لحظة انطينه صبر نعرف منو دزها
كتلهم اني بت حسن رضيتوا ولا رفضتوا
وهذا الملك كله لحسن وانتو خطار هنا وأكثر من عشرين سنة متنعمين بحلاله
تردون نتفاهم لو بالقانون نحّلها !
كعدوا كبالي
بس العصبي ماعاجبة گلي شكد جسرة أنتي !
وشلون نتأكد انتي بنته لحسن ؟
بكيفكم اي سؤال سألوني اجاوب
اعرف عنكم كلشي
واذا تسوون تحليل (دي ان اي)
معندي مانع
مهدي كال وينه حسن !
بابا مات فتحت جنطتي وطلعت نسخه من شهادة الوفاة
باوعت للي مزك جنسيتي
مزك براحتك الاصليات بمكان آمن
واذا عندك محامي افحص الاوراق كلها قانونيه
انتي من كل عقلج تجينه بعد 27سنه من موت حسن وتكولين بنته !
اكيد عصابه وهسه اخابر المكافحه واعرف منو وراج
انتجيت ماشي عمو خابر
انتظر
وياريت بسرعة لأن غراضي بالسيارة وتعبانه من السفر
كام مهدي جرّ ايده اصبر كلشي لاتسوي شي خل نفتهم
واذا جذابه تبين
دخلوني جوة من باب ثانية صاله جبيرة
ومرتبه قنفات بيها مو مثل المضيف ديوان ناصي
مهدي بصفي كعد دقايق واجن نسوان اثنين عجوزات كلش وتعبانات لابسات حجاب وملامحهن نفس الملامح
يشبهن لبابا ولولد عمهن
يعني عرفتهن عماتي
سلمن وكعدن مستغربات
الرجال العصبي مسيطر على الكل الظاهر الجبير كلي احجي شعندج نسمع
حسيت بنفسي متوترة وعركت من الخوف بس لازم اكمل مابيها رجعة بعد
بالبداية ذكرت ارقام مواد قانونيه من الدستور علمني بيها استاذ حمزة
تحقلي اتصرف باملاك والدي باعتبارة مفقود وعندي مستندات تثبت وجوده وشهود
وحجيت كلشي من بابا عافهم سنه 1991
واسماءهم الكامله واسم ابو حسن وامه الكامل واللي محد يعرفه
واللي همه اجدادي
واسماء مدارس بابا اللي درس بيها وكلشي كتبه حسن كلته
واصدقاءة
ومعلومات محد يعرفها عن كريمه وفاطمة غير حسن
فاطمة زوجه ناصر عدها ولد خالد عمره سنه وحامل جانت من سافر حسن
وكريمه ستوهة متزوجه من سجاد
ومهدي ابن خالتهم ممتزوج جان
بس متربي عدهم بالبيت واسم امه واسم امهات ناصر وسجاد ..
اخذت نفس قوي
تعبت لأن حتى مي مجابولي
بس رافعة راسي وحسيت بفخر
باوعت لناصر ارتبك ولونه انخطف
لأن عرفت من كلامهم الرجل العصبي هو ناصر زوج فاطمه
كتله اعتقد هاي الامور حتى بالانترنت
متطلع ومحد يعرفها
فاطمه وكريمه ظلن يبجن
كام ببوجهي وكف اطيني اوراقج
فتحت جنطتي وطلعت كم ورقة اخذهن وكال باجر الصبح يصير خير يبت حسن
وطلع
حسيت قلبي يرجف وبداخلي اكول شنو هذا اللة يساعد عمتي عليه
عماتي اجن ركض يحضنن بيه ويشمن ويبوسن حتى حجابي تخربط مهدي ظل يبجي وباس راسي
يدگن وينوحن ويتلمسن بيه
وشكد حنينات احسهن
احساس محسيت بي من قبل
ارتاحيتلهن وخاصه بيهن ملامح من بابا
اني كاعدة ع قنفه وهنه كعدن جوة رجليه احجيلنه عمة وسولفيلنه كلشي
يمه ولكم بيها ريحه حسن ياخويه
ويلطمن
سجاد كلهن
اواشجن دكومن جيبن اميه شربته للبنيه كتله عمو بس واحد يجي وياي اجيب غراضي من السيارة
مهدي طفر كومي بويه اني اروح وياج
وعماتي مكمشات بجبتي لاتبطين يمه خلنشبع منج حبيبتنه
ضحكت واشرت براسي من رحت سمعتهن يمه صدقه لله شنو من جمال وهيبه بت حسن اخينه هاذي ويبجن
طلعنا من غير باب
مهدي كال شكلج حسن عني بعد
شاورته كلي عن سعديه
رفع حواجبه ولطم كصته
يابويه ولك حسن فضحتني
ومن شردتو من المدرسه وركض وراكم الفراش بالعودة وضحكت
ضحك بعد شيباتي وباسني براسي
صاح لولد شاب خالد عرفته ابن عمتي فاطمه
كلش حلو طويل ولابس دشداشه مثلهم الظاهر معدهم واحد يلبس بنطرون سلم علينه ونزل الغراض اشر لمهدي منو هاي صحفيه ؟
ضحكنه ودخلنه البيت جبير وبناءة حديث وبي غرف هواي
تلكتني عماتي ودلني بغرفه دخلت غراضي وجابولي مي
صدك عطشانه وجوعانه من الصبح طالعه وهذا ناصر نشف ريكي
محضريلي اكل كعدت طلعو كلهم بقيت بس اني وعماتي فتحت الحجاب اختنكت
اكو سبلت بالغرفه
عماتي يتلمسن بشعري ويتذكرن بابا احسهن كلش متألمات ومقهورات
اكلت وشبعت وسوالف بيننا لحد ماتعبت بوسني وطلعن
نمت بس تعبانه كلش ومنظر ناصر ميطمن خايفه يدبرلي شي
الصبح كعدت
طلعت ما اندل
شفت جهال دلوني للحمام سبحت وبدلت وطلعت عماتي خذوني لغرفه بيها الريوك سفرة جبيرة وبس بنات كاعدات وجهال كتلهم صباح الخير
صافنات ببوجهي
كعدت احتاريت شنو اكل كيمر وجبن وخبز حار ومربه كل الانواع
اهم شي شربت جاي عمري مشربت مثله طعمه غير شكل على الفحم يسوو
وعلطول كعدتي مخلصت من التبوس من عماتي
تقريبا ساعة اجه ولد صاح عمتي فاطمه
طلعت وعمتي كريمه عرفتني بالبنات
شيرين ونسرين بناتهة عمرهن 14 سنه توؤم وزينب 8 سنوات ومحسن اللي حاجاني بالباب 12 سنه
وعمتي فاطمه ابنها خالد متزوج وهاي زوجته شيماء وعدها أربع ولد صغار
وحسن
كتلها حسن !!
بجت ايي ييمه حسن
فاطمة حامل وراح حسن للشمال ومن جابت سميناه حسن على معزته وتمسح دموعها بشيلتهه
حسن استاذ بجامعه البصرة
عاقديله على شيرين بس يكمل دكتوراه بالزراعه نزفهم ويدخلون
ضحكت معقولة !
بس شيرين اصغر من نص عمره
كلش صغيرة !
شفتها خزرتني وضاجت
كالت راح اشيل الاستكانات وطلعت
نسرين سمرة شويه بس شيرين احلى منها وعيونهن كلهن كبار وسود والوجه مدور
كالت شسويتي خيتي من عمرها خمس سنوات وميته بحبه لحسن
عمتي صاحت بيها كومي لمي النعمه بنت ال... خرب تربيتج
تفشلت وكامت
والجهال يضحكون عليها ظلوا
عمه شوقتيني اشوفه لحسن فدوة
اليوم تشوفيهم كلهم وتتعرفين عليهم
يتبع..
#قصة عشق@
أنت تقرأ
#عشق_والمستحيل
Ficção Geral#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
