#الحب والمستحيل 19
#قصة عشق@
..
كل اللي يحيطون بيه ساندوني
وكفو وياي وبفضلهم كدرت اتغلب على قسم من احزاني وفراق والدي اللي ترك فراغ جبير بداخلي
احساسي بالذنب مستحيل اي شئ يعوضة ..
ريم انشغلت عني بامتحانها وحملها صعب كلش وحمودي متعبها هواي
بس بقت تتصل بيه بين فترة وفترة تتطمن عليه ..
ناديه وغصون تزوجن وانشغلن عني
واعرف اخبارهن مرات اراسلهن ..
سوسن ولؤي تعينوا وانشغلو بدوامهم
وابو ريم ماقصر وياي تكفل بيه من البداية ساعدني بسالفه التعيين
اخذني بسيارته للوزارة وحضرت المقابله طلع تعيني بدائرة حكومية قسم الشؤؤن القانونية بس كلشي مااعرف وواجهت صعوبات بالبداية والراتب قليل ومانطوني ببداية الدوام
ظليت أيام اروح لمكان الدائرة
بعيد عن بيتنا تبهذلت بالسيارات والكراوي ماحسبت احسابهن وخاصة أبو ريم خطية عندة دوام وعافني كملت المشواير وحدي
صادفت ناس أشكال وألوان بالطريق
ومضايقات بالشارع وبالدوام
والشغل هوايه وصعب
واني قبل جنت مامحجبة
بعد وفاة ال بابا
كمت البس ملابس سود واخلي شال خفيف على شعري ودائما لافته ونظارات شمسيه على طول البسهن ..
بيوم من الايام صادفت بالطريق سيارة وراي تأكدت منه مراقبني الظاهر
كل يوم نفس الشي
دائما بطريقي اشوف هاي السيارة !!
هالمرة وكفت اريد اعرف منو !
بطئت بالمشي ..
ركزت بالجامه ..
احساسي بمكانه
طلع جلال !
ظليت واكفه
اتقرب مني فتح الجامه واشرلي اصعد
كتله انته صدك ماعدك احساس متجوز متملّ !!
فتح باب السيارة ونزل تقرب مني
_أولاً صباح الخير ..
_اففف ودرت وجهي
_فدوة اوصلج ونسولف بالطريق
كلت بداخلي بعد هيثم وامير تجيني انته مو خلصت الزلم وهزيت بايدي اريد اورح جرني من أيدي ..!
صحت بي بصوت عالي
وخرّ !
_عشق منا ناس لاتصيحين وتلفتين الانتباه
صارلي شكد ما اكدر اوصلج واني قصدي شريف وماعندي اذية الج صدكيني انطيني فرصة لاتصديني بروح ابوج
_اسمع لك لاتجيب طاري بابا على لسانك واذا
على كم شغلة جبتهن بالفاتحة مو معناهة تمنّ عليه
وصيت عمو عبد الله يحسبهن ويردهن الك
_عشق ليش تصعبين الامور هيج !
ترة مابيها شي وحبيت اساعد
_روح جلال اللة يوفقك منا عالم شتكول علينا كرايبي انته !
وبالمنطقه محد يعرفك تجيبلي حجايه
واريد اروح تأخرت على دوامي
_زين بس خليني اوصلج فدوة اوعدج مافتح حلكي بكلمه ولطم على حلكه
شفت نفسي مضطرة لأن تأخرت والسيارات أزدحام
صعدت بسيارته
الطريق كله بس يباوعلي وصدگ ماحجه شي وصلني وراح
بعد يوم شاق ظليت أفكر بي شكد يلح هذا ولامل ّ مني شگد صديته
من اول يوم بالجامعه ولحد اليوم
متوقعت يظل وراي لحد هسة!!
.. طلعت على الشارع وكفت منتظرة كيّات يوكفن
شفت سيارة جلال هم !
دكلي هورن واشرلي الدنيا حرّ موطبيعي واضطريت اتنازل واروح اصعد بسيارته مشغل تبريد وطلعلي بطل مي بارد تفاجأت
بس يبتسم بلا كلام واحس بي ممصدگ كلش
شربت البطل كله
طلع بعد واحد
_ شكرا جلال بس شمدريك شوكت ينتهي دواامي الظاهر مراقبني انته !
والله من اشتغلتي هنا لليوم كل يوم اتابعج واراقبج واخاف أجي يمج خاف تصديني وتفشليني لو تعاندين مثل كل مرّة
باوعتله متعجبه يعني متأمل جنت ومامليت ولايأست مني !
تحسر ...
هاي يريدلها بخت ترضين عني
مديت رجلية ورخيت الحذاء ظل يباوع
كتله يالله جلال وصلني أريد أرجع بسرعه وارتاح بالبيت تعبانه
_ طيارة صدگ جذب وحرّك
واشوفه طاير من الفرحه وكل شويه يباوعلي ملهوف وممصدگ
وصلنا ردت انزل كال فدوة اخذي رقمي وخابريني ارجوج
مستحيل جلال لاتروح زايد وياي رجاءاً
ومومعناهة امس واليوم وصلتني تتملكني !
_زين اجي كل يوم واوصلج وراضي بس اشوفج ووعد مازودها مقدار شعرة وشنو تتطلبين مني انفذ
مع السلامه جلال
ونزلت
دخلت للبيت سبحت وتغديت
مرات اطبخ مرات ام عبد الله لو ام ريم يدزولي اكل بس اكيد وحشة من اكل وحدي واحس بفراغ ومكان بابا شيمليّ ..
ّعندي شغل اوراق جبتهن وملفات استنسخت عندي باللابتوب
وكملت شغلي وأفكر بكلام جلال ومحتارة بوضعه
ريم تتصل بيه على كد السؤال ماحجيتلها شئ ..
ظليت أسبوع على هالحال بين الدوام والتعب من الصبح جلال ينتظرني براس الشارع ومن ارجع الظهر هم اشوفه موجود يرجعني للبيت
ماسألته شئ ولا خليته يحجي ويروح زايد ويتأمل وياي وهو هم وعدني مايضوجني
ودائما اشوفه ملهوف عليه كل يوم اكثر من القبله وينتظر مني بس كلمه
وبالبيت افكر بي معقولة بعد حبي وعشقي لهيثم وطلع حب فارغ وانصدمت منه
وامير الهيبة اللي راح وياريت ماخليته يروح ..
وبابا اللي اخذ عافيتي وياه وهسة عايشة بدون نفسية ولا عندي رغبة بالحياة ..
هسة جلال آخر واحد افكر ارتبط بي
اففف تعبت من التفكير وحدي
وما عندي احد اشيكله واحجيله ..
ياربي ساعدني
الصبح طلعت شفت سيارة جلال مموجودة !
انتظرت ..
ماكو !
شنو الموضوع !
زين لاخذت رقمه واخابرة
شلون هسة !
صدك احتاريت تأخر الوقت صعدت كية وازدحام ووصلت متاخرة للشغل حصلت إهانه من مدير القسم
تعبت يربي
حسيت هسه بقيمة جلال
حتى بيني وبين نفسي صرت بصراع شنو هاي عشق معقولة !
كم يوم خليته يوصلني اثرّ بيه !
طلعت من الدوام أدور عليه بكل مكان
توقعت يرجع يوصلني معقولة عندة شغل صدگ ظل بالي عليه
رجعت ساعة يالله وصلت بالازدحامات وازعاج السيارات وسايق الكيه يعدل بجامته ويذب حجي لو يشغل اغاني دگ وركص والناس اللي تصعد تباوع والشباب ماترحم بنظراتها ..
اووف
شلون عذاب لاعندي فلوس واشتري سيارة وحتى هم محد يعوفني بحالي بهالزمن
بنية شابه ووحدي عايشة كل هاي الامور افكر بيها
مانمت بيومها للفجر اتكلب بالفراش دماغي تعب وصداع لزمني مااعرف شسوي كمت من فراشي غسلت وتوضيت اني بعد وفاه بابا التزمت بصلاتي وكل يوم كمت ادخل غرفته ارتبها وارش عطر من عطره واصلي بسجادته وقرآنة وكتب الادعية موجوده كلشي ماتحرك من مكانه صدگ احس براحه واطمئن نفسياً ..
صليت وسجدت ادعي وابجي
غفيت شوية طلع الصبح كمت على السريع حتى طلعت بلاريوك للدوام ونفس المعاناة كلها تكرر ..
رجعت من الدوام لبيت ريم كلت اشوفها ومشتاقه لحمودي
ميته جوع جنت
ريم عزلت عن ام علي لان مشاكل بينهن وأم علي دوم تطلع للزيارة لو تروح لبيت كوثر
وصلت فتحت الباب ريم حضنتني مصدكت شكد مشتاقين لايامنه الراحت سوة
ريم كالت ياا شنو هاي فاجاتيني
ليش متصلتي بيه ؟
خيرج !
كتلها ريم جوعانه هسة ومن ارتاح نسولف
صبتلي غدة علي مموجود عندة دروس اضافية ودورات للطلاب ياخذهم بالمدرسة ورة الدوام ويجي بليل
بقيت يم ريم تعبانه كلش واحس بنفسي ارتاحيت لان اختنكت
صارلي شكد محجيت ولا فرغت همومي
اعتذرت ريم مني هواي لأن ابتعدت عني فترة بسبب دوامها وامتحانات ظلت تحجيلي عن غصون ونادية
وكوثر شكد مرتاحه بزواجها وتسافر وزوجها يموت عليها
واني متمددة وساكته
ريم .. شبيج عشق خير !!
بجيت ونمت بحضنها وحجيت لها كلشي من البداية
متحملت أضم بعد أكثر تعبت
حجيت اللي صار من عفت هيثم وموقفه وفشلتي ومن سولفت لبابا وانصدم وتخربط ..
لحد ماشفت جلال قبل كم يوم واللي صار كله
ريم بجت وياي متحملت
عشق كومي فدوة كافي تقهرين بنفسج عيشي حياتج تبهذلتي
معقولة انتي عشق الجميله الناعمه اللي بس تضحك وماشافت حزن ولابجت بيوم ودائما جنت احسدج لجمالج واكول راح تعرسين واني اعنس من كد مابجينه ضحكنه ودموعنه تجري ..
حسيت براحه من كلام ريم بس محتاجه معجزة لحياتي تتغير والكه الشخص المناسب اللي يعيشني بسعاده
مااتصور جلال اللي ضحك على كل البنات واللي نعرفه عنه سيئ ويخزي
اللة يعلم اللي منعرفه شنو !
ريم كالت راح اوصي علي يسأل عن جلال ويعرف كلشي عنه لاتخافين حبيبتي عشق ارتاحي ونتخابر واردلج خبر بس فتحي نت حتى سهل الاتصال بالفايبر والماسنجر
تذكرت اني من مات بابا ماادري بالنت ولادافعين اشتراك كلت ارجع اوصي عمو عبد الله يدفع اشتراك للمكتب وارجع حياتي مثل قبل وإن شاء اللة تصير أحسن
انتظرت من رجع علي تعشينه ورجعني للبيت وصلني للباب وراح
خابرت عمو عبد الله كتله على الاشتراك
ساعة واجت الشبكه فتحت حسيت بذكرياتي رجعت لشهور تألمت وبجيت وحنيت لصفحة هيثم فتحتها مغلقة ومسدود حسابه يعني عاف كلشي وراه وبدة من جديد اللة يعلم وينه هسة وويامن !!
ماريد افكر بي بعد
تعذبت بسببه كلش هوايه
اتصلت بنادية وغصون وسوسن ورجعنا مثل قبل نسولف بس هواي أمور تغيرت لأن صارن مسؤؤلات وعدهن ازواج وعيال يحاسبوهن منتأخر بالسوالف
سديت الإتصال وظليت أفكر
رجعت بافكاري لجلال
كلت ادخل على الحضر اوخرة لازم اعرف اخبارة واراسله
دقايق دزيت رساله على الماسنجر اجاني رد بسرعة
اعتقد منتظر مني اراسله
بس اتصلت رئسا رد
معقولة هاي أنتي عشق !!
اسفة جلال بس ظل بالي لأن يومين ماجيت
حسيت من كلامه متخبل ما ادري يركص
كلي أشتقتيلي !
بعصبيه رديت جلال موكتلك لاتروح وياي زايد
_لا فدوة عشوقة اموت واعدل فدوتج
_يعني شنو !
_هاا لا هيج بس بعد كلشي مااحجي انتي احجي
_هاا لا هيج بس كلت خاف بيك شئ
_ ماكو شي باجر اجي واوصلج
جلال باجر جمعه !!
سمعتة لطم وجهة ما ادري كصته
ضحكت ..
_اااخ اموت واعدل بهالضحكة
_جلال شنو مدافتهم عليك !
_مو انكلبت هندي من سمعت صوتج
ضحكت وصدك من زمان ماضحكت
بس رجعت تحسرت لان گلبي مورم من الحزن
كتله يالله تصبح على خير
لا يمعودة عشق وين !
_جلال ببيش الساعة يمك !
عساهة توكف وبعد متشتغل خليني احجيلج الصار
يالله بس بسرعة
«سويت نفسي اتثاوب حتى أخلص منه لان لزگ وماريد أسيئ التصرف وياه
وبنفس الوقت ماريد اخسرة مثل ماخسرت امير وماعرف الدنيا شضامتلي بعد
ومنو راح يصير من نصيبي بالاخير وهواية وساوس ببالي
يجوز لان وحدي والوحدة تقتل »
ظل يحجيلي سيارته عطلت وبالتصليح
بس مصدكته لأن واحد مثله يكدر يجيب غير سيارة ..
المهم كوة خلصت منه سديت الاتصال
دزلي ملصقات ورساله
بعد لاتحضريني فدوة اموت واعدل بيج
كتله اوكي وغلقت الجهاز كلت ارتاح من ضغط الاسبوع تعب ودوام وحر بس شنو يقصد كل شويه اموت واعدل بيج !
غفيت
الصبح ماحسيت الا الباب يندك ..
كوة كعدت لفيت نفسي فتحت ولد صغير ماعرفه جايب اكل مسلفن وورد مغلف ومسواگ
خلاهن بالمطبخ كتله منين ذني !
كال عمو انطاني فلوس كال وصلهن بس فتحتي الباب اشرلي وراح
تعجبت !
طبكت الباب شفت الورد اكو كارت بي اموت واعدل بيج وجوة بالإنكليزي
لوف يو !
افرك بعيوني شنو !
صدك ماينطيّ وجه هذا ..
فتحت موبايلي
اجتني رسايل منه
عفتها غسلت وبدلت فتحت العلاليك جايب كلشي فواكه ولحم ومخضر وكباب شوي مسلفن وخبز حار الريحه مالته متتقاوم اكلت وشبعت بس ادردم عليه معاجبني الوضع لان صدك مكلف نفسه من كملت خابرته رد بسرعة
كتله انطي مجال شنو ايدك على الضوة الاخضر
ضحك كال بالعافية الكباب هني ومري
جلال عفية لاتسويها ترة اضوج منك وماحب هيج تصرفات
كلي اموت غير ولاتزعلين وتضوجين مني
هاي شلون سالفه تاليهة وياك شتريد !
تحسر وكال اريدج
لابالله !!
حبيني عشق اعيشج ملكه وحتى للخارج اوديج لكل دول العالم
شتريدين اسويلج
جلال داتطلب المستحيل
وبداخلي اريد ابجي واكول ليش جلال ليش مو هيثم
ظلينه نحجي هواي كتله عفية شكد حسابهن اجمعهن
كلي.. عشق حسابهن اشوفج ونطلع سوة بمكان
نتمشى ونسولف
تريدين اي مكان يعجبج اخذج واليوم عطله شنو رايج
ترددت بس مكدرت ارفض كتله ماشى بس سيارتك على اساس عاطله !
لا تصلحت وهسة اجيج
لايمعود وين تجي انتظر اضم المسواك واللحم خليها العصر اخابرك
انطيته رقمي
وهاي أول مرة بعد اكثر من أربع سنين يريد بيها جلال رقمي لو يطلب يحاجيني واسمحله واتنازل
وخايفه كلش من عواقب هالتصرف
يتبع..
#قصة عشق@
أنت تقرأ
#عشق_والمستحيل
Ficção Geral#قصة فتاة عاشقة فعلت المستحيل لتحضى بمن تحب حصلت لها مفارقات وصراعات مع الحب والمستحيل بعض الأحداث 🔞
