#عشق_والمستحيل

الجزء ال 46/تحقيق الحلم

#الحب والمستحيل 46
#قصة عشق@
الصبح طلعت للمديريه ونويت اتوجه للمحكمه واتابع القضيه باعتباري محاميه ومدّعيه بأكثر من قضية 
نزلت من باب الفندق للشارع شفت سيارة شرطه والولد السايق لأمير نفسه منتظرني !
سلمت عليه توقعت أمير وياه
باوعت بسيارته فارغه !
كلي أختي سيد أمير طلب مني ارافقج لحد ماتكمل القضيه
تفاجأت !
زين امير وينه ؟
رجع لدهوك
ششنو؟
زين يلا ماشي بس اني اروح بسيارتي
أختي وراج اظل واتابعج ماخالف الأوامر اروجوج تجيني عقوبه
اشرتله ماشي أخي
ورحت صعدت بسيارتي وطول الطريق متابعني ووراي !
جانت مبادرة مميزة من أمير رغم حديثنا البارحة ومن صديتة وفشلته يمكن بعد مابيها مجال يتنازل حتى البارحه شفته عافني وراح حتى ماسلم عليه
توقعته يزعل بس ماتوقعت يروح
زين السايق من كال بدهوك يعني يم زوجته !
يووو راسي افتر من الأفكار
هسه اني شعلية لازم أفكر شسوي بقضيتي وسالفه أمير وترتني وشوشت علية
وصلت للمديريه وعرفت من الضابط ستار
صاير تناقض بحيث اكو قسم معترفين على ناصر ومنهم الجهال ومحسن ومهدي وكريمه وحسن
والبقيه التزموا الصمت خوفاً من ناصر
تحولت القضيه للمحكمه
الضابط ستار اهتم بيه وبالقضيه باعتبار توصيه أمير
ساعدني ووصه الكل بالمحكمه ومعارفه ..
اثناء التحقيق
عثروا على ملفات لناصر وماضيه طلع يخزيّ
طلعت عنده تجاره مشبوهة من الخليج يجيب مواد مخدرة ويه النرگيله ويبيعها بالگهاوي
يعني طلعت خياسة وسوالفة الوسخة
وبعد هالسالفه مستحيل يطلع من السجن
الحمد لله صار كلشي من جانبي بس محتاجه وقت واجازتي قربت تخلص
اتصلت باستاذ حمزة وجان ديتابع وياي القضيه من بغداد
طلبت اجازة اضافيه كم يوم
كلي بنتي انتي كملي قضيتج ولاتشيلين هم الدوام اكو من يسد مكانج
طلبت منه يدزلي سوسن ولؤي لان عدهم خبره أكثر مني بالمرافعه واشكرته لأن فعلا دعمني ووكف وياي
اجوا للبصرة  وحجزوا يمي بالفندق
علي وابو ريم وعمو عبد الله اجو كلهم من بغداد
وشهدوا بالمحكمه وسجلو شهاده لمعرفتهم ببابا وبقوا يمي بنفس الفندق بس بغير غرف
اسبوع واحد ورجعوا لبغداد
مكدرت ارجع وياهم لأن القضيه تحتاج متابعه ووقت أكثر
وسوسن ولؤي ثلاث ايام ورجعوا
  القضيه تقريبا اكثر من شهر استمرت
ظليت طول هاي الفترة بالبصرة متجنبه أي لقاء بعماتي لو بأحد منهم لأن القاضي راح يحكملي بنص الأملاك والقضيه مضمونه ميه بالميه وحسيت بنفسي كلش خجلانه منهم
شلون أجيت بالتالي وأخذت كلشي منهم بسرعه
ترافعت كدام القاضي وكانت هاذي قضيتي الاولى حسيت بفخر وتمنيت بابا يمي ويشهدلي هذا الحدث المؤثر اللي جان يحلم بي من سنين
وحكملي بامتلاك نص البيت والبستان والحلال كله بالنص باعتبار بابا الذكر الوحيد وعماتي النص الثاني
وتم تحديد وارسال لجنه تطلع تكشف عن قيمه الملك وينعرض بالمزاد العلني
وتتحول الاموال لمحكمه بغداد باعتبار مولدي هناك مناك استلمها
اما ناصر ظل بالسجن جاري اصدار حكم عن التهم الخاصة بي...
تبقى عليه قضايا تزوير وتجارة مشبوهة
كملت القضيه من البصرة واذا يطرأ
شئ جديد يتصل بيه الضابط ستار
اما سايق امير شكرته وطلبت منه يسلمي على امير ويشكره ويطمنه على ضمان القضيه لصالحنه
اصلا اني متأكده دا يتابع القضيه ويه الضابط ستار وماعافني
بس ماتصل بيه ولا اني اتصلت طول هالفترة
رجعت لبغداد بدون ماودع واحد منهم بالبصرة
ببغداد لكيت الكل ينتظرني ببيت بابا
وجانت سوسن ولؤي متحضرين لزواجهم
بعد سنين من الخطوبه
وأخيرا حيتزوجون
زواجهم كان بفندق .....
حضرنه كلنا للزفاف اتذكرت رقم رحيم عندي اتصلت بي واجه
كانت مفاجأة للكل من اجه ويه وئام وعنده بنات اثنين توؤم يخبلن لابسات بدلات حمر متشابهات فدوة نفس الشكل
لبست گلابيه بيضه وشال ابيض اشتريتهم من الكاظمية
وئام تفاجأت من شافتني لابسه الحجاب وجننه نبجي ونضحك نفس الوقت من الشوگ والفرحة
كضينه وقت حلو ومميز بالعرس
وركصنا واخذنه صور
تونسنه بليلتها
فعلا محتاجه لهيج جو غيرت نفسيتي بعد الأحداث الأخيرة الصارت بالبصرة كلش تعبتني
بعد مارجعت للدوام ظليت اتابع قضيتي
وتحصيل الإرث
تقريبا شهر استلمت استحقاقي وخليت المبلغ جان كلش جبير  بالبنگ فتحت حساب مصرفي
طلبت من عمو عبد الله نروح للمقبره
زرت قبر بابا وبشرته بنجاح القضية
وحجيتله كلشي صار خطوة خطوة كأنما عايش ويسمع أحسة
وحضنت ترابه وشبعت بجي لمن ارتاحيت ..
رجعت من المقبرة افكر شنو حسوي بالفلوس وخاصه المبلغ كلش جبير
سويت عشه ثواب لبابا وخابرت ريم وعلي وأبو ريم وعمو عبد الله وزوجته
كتلهم عن فكرتي
ابني طابق ثاني للبيت وافتح مكتب محاماه بمكان محل الحلويات القديم
عمو عبد الله بجه وتذكر انو هاي رغبه بابا بحياته من اتخرج واربح قضيته ينفذها
وفعلا تشجعت وبديت بالفكرة
بمساعده الكل اكيد مو وحدي واتذكر كلامه لبابا من يكلي بنتي ربج مينسى عبده وفعلا ربي منساني وسخرلي هواي ناس أهل خير وكلهم  ساعدوني
لو من جان بابا يكلي بنتي أنتي بميت رجال ..
ما انسى حجاياته الدافية اللي كلها حنية وهدف وإيجابية
مرت الأيام ..
كلفت مقاول وعمال
تلحيض وترميم وتجهيز كامل للبيت
وخاصه بيتنا جان قديم وبناءة تعبان وتالف
اخذت غراضي وفرغت البيت وسكنت ببيت اهل ريم بغرفتها القديمة لأن البناء يتأخر
واكيد اختاريت التغليف والألوان كلها على ذوقي
وتابعت الشغل ويه المقاول
من بعد الدوام أروح اني وابو ريم ونتابعهم ونشرف عليهم
مدة البناء استمرت اكثر من  شهرين
اتفقنا بعد ميخلص البناء نسوي حفله صغيرة افتتاح للمكتب الجديد بالبيت
بس للأصدقاء وزملاءنا اتصلت بيهم كلهم
وتعاونه بيننا على كل التحضيرات
وأكدت عليهم كلهم لازم يشغلون وياي حتى ريم أهم وحدة
ابد ماانساههه
عمو عبدالله كلي بنتي ابو محمد السايق اجه للبيت من جنتي بالبصرة
بالبداية خفت اكو شيء من طرف جلال
بعدين طلعت رقمه عدي وخابرته
سلم عليه وكلي عمو جلال طردني
ويه ابو مريم لأن شهدنا لصالحج وهسه بدون شغل وعرفت منه جاسم اخذ اشواق وراح للأردن بعد ماطردهم جلال وميعرف عنهم أي شي 
كتله زين عمو اريدك تجيب أبو مريم وتجي
لأن اكيد أني من صرت سبب بقطع رزقهم
لازم اساعدهم وقررت اشغلهم وياي بالمكتب اثنينهم حراس بالتناوب
من كمل البناء
اجتمعنا من الصبح كلنا
اتفقنه
البنات ناديه وسوسن وغصون وريم ووئام وام عبدالله وام ريم اجتمعنه وطبخنه أكثر من صنف للغدة والعشة
وسوينه كيك وكعك وحضرنه كلشي
والزلم عمو عبد الله وابو ريم ولؤي وعلي ورحيم رتبوا الأثاث والمكتب
وأستاذ حمزة اجه ويه الاستاذة ام سمير وجابولي هدايا وصور جداريه وساعه جبيرة للمكتب بركة من عندهم شرفوني وتفضلوا عليه كلش هواي
البيت صار كلش حلو ومرتب والطابق ثاني بي كامل والسطح خليت بي مولده جبيره ومعدات وأدوات صيانه
والمكتب هم كامل من كلشي حتى تجهز تجهيز من المعدات والحاسبات والسبالت وجبت تصريح ممارسه المهنه حصلناه بصعوبة اكيد ساعدنه استاذ حمزة
خسرت كلش هوايه فلوس على بناء البيت والمكتب بس المهم طلع بالآخير يستحق الخسارة
لأن بي تحقيق حلمة لبابا وحلمي وحلم الكل
اتفقنه زملاءي دفعتنه المتخرجين نشتغل كلنا بي ونمارس المهنة سوية
ثمره دراستنا وجهدنا وتعبنا بعد كل هالسنين ..
يتبع ..
#قصة عشق@