#القفص
#روز_الفياض
#ح٢
.
.
.
- صار سنين اطك حجار بحجار ، واول ماشعلت النار🔥 مطرت 🌧💧🌦...
.
.
.
اجه فارس وكعد شويه وماما نجيه تخزر بي ، حس بيها عدها حجي ومتحبه فشويه وكال :
سميه يلا خل نروح حتى نلحك عالسوك قبل ميعزل.
سميه :
يلاا ...
كمنه نريد نطلع صاحت عليه نجيه وشاورتني :
ديري بالج ماما مو ياخذج منا منا.
ضحكت :
شالقضيه ياماما معقوله تخافين علي منه وهو ابن عمتي هههههه .
نجيه :
ميخالف الشيطان شاطر ، بعدين هو خوفج كل الخوف من الاقارب ، الاقارب عقارب ياماما ..
يقتلون القتيل ويمشون بجنازته ..
انتبهي على نفسج ومثل ماوصيتج ..
زين ؟؟
سميه :
ان شاءالله.
رحنه للسوك اني وفارس اشترينه بعض الشغلات وبعدين كال :
خل نتعشى يلا نرجع للبيت.
سمية :
خاف نتأخر ..
فارس :
واذا تأخرتي شنو يعني ..
انت طالعة ويه زوجج هسه .
محد اله حكم عليج غيري ..
حبيت كلمة ( زوجج ) حسيت بنوع من الفخر اني متزوجة عبالي هذا فد انجاز ويستحق افتخر بي ..
تفكير جهال ...
دخلنه مطعم شعبي زغير يسوون لفات وحاطين كم كرسي وكم طاوله والناس اغلبها توكف بره تاكل لفاتها.
من كعدنه قررت اتشجع واسأله عن موضوع الشرب .
سميه :
فارس؟
فارس:
هاا ؟
سميه :
اني مااعرفك ولااعرف عنك شي واريد اتعرف عليك ..
فارس :
اتعرفي ياهو لازم ههه .
سميه :
فارس انت تشرب ؟
باوعلي :
وشنو هالسؤال هذا ؟؟
مالكيتي غير هذا السؤال تسألينه؟
سميه :
اي شكو بيها انت راح تصير زوجي من حقي اعرف .
فارس :
لا مو من حقج ، وحتى ترتاحين لا مااشرب لان الشرب حرام .
جنت طفلة عندي ثقة بكل الناس حتى العقارب ..
ارتاحيت من كال ميشرب بس حسيته ضاج من سؤالي وظل وجهه مكلوب !!
سميه :
زعلت مني ؟
فارس :
وشلون ماازعل وانت سؤالج ماله طعم وماله معنى؟
سميه :
مو قصدي بي شي مو زين ، بس ردت اتأكد حتى ارتاح مااريد نهايتنه مثل امي الله يرحمها وابوي ..
فارس :
وشبي خالي رجال ماعليه كلام مقصر وياكم بشي؟
سميه :
بس قصدي جانوا اربعه وعشرين ساعه مشاكل ليل ونهار علمود الشرب.
فارس :
المهم ممقصر وياكم بأي شي ..
مو مهم الباقي الرجال مايعيبه غير جيبه.
سكتت بس بقى ضايج ..
بعدين سألني :
اكلج سميه؟؟
انتي تحبيني؟
