#القفص
#روز_الفياض
#ح١٩
.
.
.
من رجعت اتصلت بحسن كتله اذا يكدر يجينه لان اني وحدي مااعرف اتصرف وين اروح وشلون ارجع.
حسن:
ام محمد والله على بالي لا عبالج ناسيكم لو مشغول عنكم بس اتحملي شويه لان ميقبلون ينطوني اجازه هسه ورشا هم حامل وراح تدخل بشهرها مااكدر اعوفها واجيكم هي وامي نجيه والجهال صبريلي بس ارتب اموري واجيكم .
سميه:
الله يساعدك حبيبي ،احنه هم ثكلنه عليك بس شنسوي شفت بعينك اذا زوجي غدر بيه وبجهاله شلون اكدر اثق بالناس الغريبه بعد.
حسن:
حقج ..حقج ..
الي سواه مينحجي ولايتسولف الله لايوفقه.
سميه:
مسلمته بيد الله.
ثاني يوم بالدوام نفس الروتين بس من ردت اطلع صاح علي نزار:
ام محمد انت هسه وحده من عدنه تتغدين ويانه محد غريب هذا استاذ محمود محامي ويانه وست لمياء هم محاميه.
سميه:
مشكورين بس كتلكم اني ابني وبنتي ينتظروني نتغدا سوا.
محمود:
عاد بنتج طبخها طيب مثلج؟
سميه:
لا مااخليها تطبخ متعرف واخاف عليها بعدها زغيره.
لمياء:
يعني هسه ترجعين تطبخين بعد؟
سميه:
يعني اسوي شي بسيط عالسريع.
التفتت علي نزار :
وليش هالتعب ؟
منا وهيج تاخذين غداكم منا مدام متقبلين تتغدين ويانه.
سميه:
شكرا ميحتاج .
محمود:
شدعوه ام محمد تره احنه هنا اهل عائله وحده صارلنه سنين سوه يمكن انت متعرفينه بعدج بس هسه صرتي منه وبينه وانت اصلا عراقيه.
بعد حجي ونقاش طويل بقوا مصرين على كلامهم وظليت اجيب وياي غدا الي ولجهالي.
مرت الايام واني منتظره حسن يتفرغ ويجي وكطعت الامل من فارس.
وظل محترك كلبي بسبب الي سواه هذا حق جهالي الي هم جهاله شلون كدر يسوي بيهم هيج ؟؟
مفكر بيهم وين يرحون ؟
ولافكر بيهم شيصير بيهم وبمستقبلهم ..
حسبي الله عليك يافارس ..
بيوم جنت تعبانه مريضه كوه رحت للدوام من وصلت ظليت كاعده بالمطبخ ومابيه حيل اكوم اشوف شغلي.
دخل نزار كمت اني استحيت :
ام محمد ولو اتعبج بس اليوم زيدي الكميه.
سميه:
ان شاءالله.
نزار:
المره الفاتت اتمنيت اكو باقي من الاكل شويه واخذه وياي للبيت هههه.
سميه:
ان شاءالله منا وهيج ازيد الكميه.
نزار:
شبيج ام محمد ؟
شكلج تعبانه؟
سميه:
مابيه شي بس تغير الجو شويه.
نزار:
معناها لتطبخين اليوم ملازم اليوم ارتاحي وشوكت متصيرين زينه داومي.
سميه:
لا لا مو لهدرجه ..
هو شوية برد مو اكثر هسه اخلص ان شاءالله ومنا لباجر اصير تمام التمام.
كعد عالكرسي مقابيلي :
ام محمد كعدي شويه خل احاجيج.
استحيت جريت كرسي وخليته بعيد شويه وكعدت :
خير استاذ ؟
نزار:
مااريد اكون متطفل بس احسج مهمومه ومتضايقه تره هنا احنه اهلج لتفكرين انتوا وحدكم.
سميه:
اكيد اكيد اعرف.
نزار:
اذا عندج مشكله او ظرف احجي يمكن نكدر نساعدج او نحلها.
بصراحه اني مستغرب انت شابه يعني حتى عمرج مابي سبعه وتلاثين سنه شلون مقاومه هنا وحدج ؟؟
اسف يعني مو قصدي شي بس مستغرب.
انقهرت كلامه صحيح بس انقهرت لان فعلا وضعي غريب ومثير للغرابه.
دمعت عيوني وخنكتني العبره :
الظروف مرات تجبر الانسان على وضع معين او تصرف معين او حتى شغل معين مو من مستواه.
حسيته استغرب ماادري يمكن كلمة شغل لفتت نظره عدل كعدته :
ام محمد ثقي بالله اذا اكدر اساعدج باي شي مراح اتردد بس انت احجيلي.
سميه:
شحجي استاذ ..
ماكو شي ينحجي بقصتي ولااكو احد يكدر يساعدني بس رب العالمين.
نزار:
ونعم بالله بس جربي مابيها شي.
كام عدل جاكيته :
عندي طلبين اذا تسمحين؟
سميه:
اي اتفضل .
نزار:
الاول اريدج تنتظريني اخلص هالزبون الي راح يجي هسه وبعدين نكعد بالمكتب وتحجيلي قصتج.
والثاني من تجين اريدج تسويلي وياج فنجان كهوه من هالي الي تسوينها.
سميه:
ان شاءالله ..
تدلل .
راح لمكتبه واني كعدت انتظره يخلص.
من خلص اجت سوسن صاحتلي ..
كمت سويتله كهوه واخذتها ورحت.
بس جنت مستحيه وحاسه بخجل شلون احجيله هيج اشياء خاصه وهو رجال غريب ؟؟
زحمه شلون احجي على زوجي كدام رجال غريب حتى لو زوجي مو خوش انسان لا ميجوز زحمه.
قررت مااحجي شي استحي.
دكيت الباب ودخلت سلمت وكام هو اخذ فنجان الكهوه وكعد على واحد من الكراسي بغرفته الي يكعدون عليها الزباين :
اي ام محمد ليش واكفه ؟
اكعدي واحجيلي اسمعج.
استحيت بس كعدت وراسا اجت ابالي امي شكد محتاجتلها لو عايشه جان بدعوه وحده منها كل اموري انحلت مجان احتاجيت احجي واشكي لاحد ..
نزار:
لتستحين تره كل احنه عدنه هموم ومشاكل مو بس انت ..
مشاكلي مو مثل كل الناس مشاكلي متخلص لان تخص هواي ناس بحياتي خواتي اخوي امي نجيه فارس وخواته وعماتي وابوي وفتنه وغيرهم..
سميه:
شحجيلك استاذ الي صار بيه مينحجي.
نزار:
كل شي احجيلي ليش اجيتوا هنا وشلون ومنو جابكم؟ ووين زوجج ؟
اهلج شنو وضعهم ؟
وضعج هنا شلونه؟
وين ساكنه؟
سميه:
راح ابدي احجيلك من سبب وجودنه هنا بحدنه.
بديت احجيله من يوم الي سافر بي فارس للسعوديه ولهاللحظه.
احجي وكل شويه تنزل دمعه تخنكني حسيت بالاحراج بس غصباً عني.
انتبهتله مركز وياي بالحجي كلمه كلمه حسيته يباوع لوجهي بصوره مباشره استحيت حتى نسيت شنو جنت اكول ..
سكتت ..
.
.
.
- مَن أنتِ ؟
: القوية التي تَوردت الحَياة أثر إبتسامتهُا الباكية
.
.
.
لايك وتعليق وعشر ملصقات فضلا
