القفص

القفص 8

#القفص
#روز_الفياض
#ح٨
.
.
.
- نويتَ انساكْ ونويت الگاك
وتراكمن نيه اعله نية وشيبت .
.
.
.

واجه فارس حتى يرجعني ...
وكعد هو وابوي يحجون ويسولفون عالصار والسوته عمتي وبناتها ..
بس ابوي بارد ...
يحجي بمنتهى البرود ..
ولاعبالك ابوي واني بته ...
ولا عبالك كتلوني وشككوا ملابسي والجيران فكوني وخلصوني ...
ولاعبالك حارك كلبه اللي صار بيه ...
جنت اتمنى ابوي يرزله رزاله ميخليه يفتح حلكه بعد كون يحجي وياه وهو مقهور ويهدده مو يحجي وياه بهالبرود ...
بس الظاهر فعلا متضايقين من وجودي بقيت بالغرفه كاعده واسمع حجيهم الى ان اجه ابوي صاحلي واخذت دشداشتي المشككه بيدي ..
جنت متحلفه اني احجي وادافع عن نفسي مادام ابوي هيجي دفاعه بارد وممهتم ..

من دخلت كام فارس اتلكاني على اساس مشتاقلي خطيه.

فارس :
ها سميه ، شلونج ؟
شلون صرتي ؟
والله طيحت حظهن علمودج ..

سميه :
بعد وكت ..
اي مبين ..

فارس :
مامصدكتني حقج ..
اني هم جنت مشغول ومريض ومااجيتج .

ابوي :
يلا بابا كومي لمي غراضج وروحي ويه رجلج.

سميه :
والله مااروح اذا متسوولي حل ...
ميصير اني ليل ونهار اكرب مثل الخدامه من الساعة سبعة الصبح للثنتين بالليل وتالي يرجعلي نص الليل سكران ميدري بالدنيا ...
ومتحمله وساكته ..
انوب اتحاسب على الطبه والطلعه يحاسبني امه وخواته واني عندي رجل المفروض مسؤوله منه ، يدري بيه من اطلع ومن اطب ممجبوره انطي خبر لاحد واخذ موافقة احد ...
هاي دشداشتي شوفها شلون مشككه ..
طلعت نص عريانه لوما ام قاسم جيرانكم الله ينطيها اجت خلصتني من اديهن ولفتني بعبايتها ..

شمرت الدشداشة عليه واني اصيح..

سميه :
بعد فوك ضيمهن والعيشه الكسيفه العايشتها عدهم ليل ونهار يصيحين علي العاجر حتى الجهال تعيرني الله يقبل بهالحجي ؟؟؟
انت كلي الله يقبل ؟؟؟.

بجيت من وصلت لهالكلمه وانقهرت على نفسي ..
اني المدلله كل هالسوالف تصير بيه عكب عينج يايمه ؟؟

ابوي يمكن بلحضتها انقهر علي لان بجيت او يمكن انقهر من كلمة عاجر او يمكن صار عنده احساس فجأه ودار على فارس كله:
اذا سمعت احد كايل هالكلمه على سميه والله الا اكص لسانه جبير لو زغير ميلوم الا نفسه شنو عبالكم مالها والي امك وخواتك تكوللهن خالي يكول هالمره سماح مرة الثانيه حسابي وياهن غير شكل ..

فارس :
اها خالي ، سدك امين ..
شحدها الي تحجي بعد والله اكص لسانها عاجر شنو اني قابل هن شكو ..

درت عليه من حركت كلبي :
صار جم سنه من اتزوجنه وتسمعهن يصيحن العاجر مايوم كلفت نفسك وكمت رزلتهن ولا يوم حركت كلبك الحجايه وكلت خل نروح للطبيب نشوف ليش لهسه الله مارزقنه جهال حالنه حال الناس ..