#القفص
#روز_الفياض
#ح١٧
.
.
.
"كُن حذرًا، لا يستحق الجميع الوصول إلى
قلبك، زائر واحد خاطئ يمكن أن يدمر المكان"
.
.
.
مصدكت الي شفته !!!
اني تاليتي اسكن بشقه مال دعاره !!!!
مالها اي اسم ثاني هي شقة دعاره ظليت ادك على روحي ومحمد وغيداء يهدون بيه.
شلون شسوي المن اروح ؟
ووين اروح؟
اني مصدكت لكيت مكان رخيص ايجاره لان فلوسي خلصت مبقت عندي فلوس وانوب يطلع هالمكان شقة دعاره يبوووي على حظج سميه ..
سميه:
ياحضج الاسود ياسميه..
ياقسمتج السوده ياسميه..
هاي تاليتج ؟
من بعد ذاك العز والدلال نزلج الوكت شويه شويه لحد موصلج للحضيض كلش لاخر درجه بالمجتمع همه والماكو سوه ..
غيداء:
كافي ماما لتقهرين نفسج باجر نشوف غير مكان.
سميه :
شنشوف ولج شنشوف ؟!
هو عدنه فلوس احنه ماكو ماعدنه شي بعد صفينه عالحديده.
ابوج مامنه خبر والفلوس العندي خلصت منين اجيب.
محمد:
اهدي ماما باجر خابري لخالي حسن بلكي يكدر يسوي شي.
سميه:
اخابره وامري لله ..
اخابره بس خل يطلع الصبح ..
بس خل يطلع واخلص من هالمهزله الي بره يم باب غرفتي.
ليلة سوده جانت صدمه بالنسبه الي محمد وغيداء زغار ميفكرون مثلي ولابخوفي ..
عدهم كل شي سهل وبسيط واله حل بس اني جنت خايفه عليهم حيل خايفه لابنتي تشوف هالانحلال وتتعلم لو ابني ينجر لهالطريق واثنينهم شباب زغار مراهقين ..
اعوذ بالله من غضب الله ..
الله لايكولها.
وجبت الصبح بيدي انتظرت الاصوات خفت والحضور راحوا وطلعت دورت عالبنيه الي جابتنه مكلتلها طبعا شقه دعاره بس كلتلها اني جو الحفلات بالليل ميناسبني وعندي ولد وبنيه مراهقين اخاف عليهم.
هي اتفهمت او بالاصح فهمت :
براحتج بس اني افضل تبقين هنا لحد متحصلين سكن ثاني لان خاف متحصلين ووين ترحين بعدين.
فكرت كلامها صحيح خل ادور اول على بديل مناسب يالله اطلع منا.
جنت اخذ محمد وغيداء وياي من اطلع اخاف اخليهم بحدهم بهالشقه ويه هالناس ..
ومر اسبوع واثنين وتلاثه ومحصلت غرفه بنفس الايجار ولا حتى سعر مقارب.
اضطريت ابقى بهالمكان غصباً عني ..
جنت اخلص الليل مثل الحارس محمد وغيداء نايمين واني كاعده وعيني على باب الغرفه خاف احد يدخل علينه.
للعلم كل الموجودين من البنات جانن يعاملني بمنتهى الاحترام ومشفنه منهن اي تصرف بحقنه مو حلو بالعكس.
اتصلت بحسن وحجيتله وكتله خلي نجيه تبيع الذهب وتدزلي فلوسه.
واستلمت الفلوس وقررت اشتغل وكل يوم ادز لفارس رساله ومنتظره رده.
ماكو منه خبر وظل باللي خاف صارله شي خاف مريض ؟
خاف صارله حادث بالشغل ؟
خاف مات ؟؟
معقوله عكب هالتعب يموت؟؟
لا اسم الله ...
وبقينه على هالحاله ست شهور بعمان بعد كل فلس ماعندي.
اتصلت بحسن كتله :
خلي نجيه تبيع الذهب كله الي بقى وحولي الفلوس حتى نرجع بعد منكدر ننتظر اكثر فلوس ماكو واذا يريد يسحبنه بعد هو يدبر فلوس.
حسن:
سميه تره فارس مراح يسحبكم لاهسه ولابعدين..
سميه:
يمه ليش ؟
شنو مات؟
شصارله؟
حسن:
لامات ولاصارله شي ..
ولد صديقي ولد عمه هناك يم فارس وسألته كال يابه موجود ومابي شي.
سميه:
اي ؟
وليش ميتصل بينه يسأل علينه ؟؟
ليش ميسحبنه شمنتظر؟
كل يوم ادزله رساله وميجاوب.
حسن:
سميه فهمي عاد فارس باك فلوسج وفلوس جهالج وعايش بيهن مرتاح هناك.
الخبر نزل بأذني مثل الصاعقه !!!
جنت حاسه بس اجذب نفسي واكول حرام علي اخذ غيبته واظن بي ظن السوء وهو بالغربه ..
عالاقل لخاطر جهاله مينطي كلبه يكسر كلبهم ويخليهم يتبهذلون ..
واكيد اشتاقلهم والله هداه بعد هالعمر وخلاه يجوز من الحرام ..
اثاري صدك المثل الي يكول ثلثين الولد على خاله.
بيومها شبعت بجي ومحمد وغيداء يبجون وياي مصدومين بأبوهم.
خلصت اليوم صافنه وايدي على خدي حتى مطلعت من الغرفه الى ان اجت وحده من البنات دكت علينه الباب شافتنه محد طلع خافت علينه عبالها بينه شي.
جان محد بيومها موجود بالشقه رايحين سفره.
طلعت كعدت يمها بالصاله وحجيتلها كل قصتي من اولها لاخرها.
ظلت تبجي وياي لان تشوفني ابجي وتكلي شلون اتحملتي هذا الضيم وشلون صبرتي.
كتلها محتاجه شغل كالت هي تعرف ناس هواي وراح توصيهم يشوفولي شغل.
بس ظليت بقلق شنو الشغل الي يجي من وره وحده هيج شغلها.
وخاف تريد تشغلني مثلهن؟
لو خاف اذا اشتغلت عن طريقها الناس عبالهم اني مو زينه؟
فكره وره فكره اخلص من وحده تجي ثانيه اضرب منها.
جنت اضوج ويحتصر كلبي خصوصا فترة المغرب جنت اخذ غيداء ومحمد ونروح نكعد بحديقه لو شوف وين جوهم حلو حتى بالصيف مو مثل جو العراق.
حتى بشرتي اتغيرت حسيت نفسي رجعت زغرت جنت اوكف كبال المرايه واباوع لوجهي صدك بشرتي حلوه وبيضا وملامحي حلوه وملفته بس عيوني مو مثل الاول عيوني ذبلانه وشعري بعد هاللون الاسود ميفيده ميغطي الشيب.
قررت اصبغ شعري اشقر حتى يضيع الشيب واسوي تغيير حتى شكلي يكون مرتب اكثر علمود الشغل لان البنيه صاحبة الشقه كالت حصلتلي شغل بمكتب محاماه ..
مااعرف شنو بالضبط بس شميكون ميخالف.
ثاني يوم الصبح اخذت العنوان منها وطلعت للشغل وقفلت الباب على محمد وغيداء بالمفتاح واتوكلت على الله ورحت.
وصلت للعنوان دخلت شقه زغيره مسوينها مكتب جان اكو بنيه كاعده بره مكتب كدامها سكرتيره..
سلمت وعرفتها على نفسي :
سميه ..
.
.
.
سيأتي اليوم الذي تدرك فيه ان أقسى ما مررت به كان خيراً عظيماً انقذك ليجعلك اقوى مما كنت عليه .
.
.
.
لايك وتعليق وعشر ملصقات فضلاً
فارس الفگر حتى من طلع مااتغيرت اخلاقه بالعكس من سيء الى اسوء
