القفص

القفص 12

#القفص
#روز_الفياض
#ح١٢
.
.
.
يُثقِلك الكتمان ويسمعُكَ الله.
.
.
.

ثاني يوم من الصبح كعدنه على صوت صريخ.
عمتي اتوفت !!!!

من سمعتهم كالوا ماتت مستوعبت بسرعه ..
معقوله الله استجاب دعائي ؟..

لك الحمد والشكر ربي فكيتني من هالنسره ..

بس بعدين خفت وضميري انبني وظليت ابجي خفت لان سامعه يكولون الميت بدعوه مثل الميت بسيف ...
خاف الله يحاسبني على دعائي عليها ؟؟

بس بعدين كلت الله ميستجيب دعاء باطل حاشاه ..
بس هاي دعوه مظلوم تنفتحلها ابواب السما ..

لان حرب فماكو فاتحه وعزا ..
بس غسلوها ودفنوها بالساحه مال المنطقه لان وين يدفنونها بالحرب ..

فارس جان يباوعلي بنظرات بيها اتهام.
وظل مكتئب كم يوم بس بعدين الكل نسى لان الظروف جانت اقوى منه كلنه ..

الوضع جان مخيف باي لحظه ممكن توكع علينه قذيفه او صاروخ قريب ونموت كل احنه.
جانت جثث الناس بالشوراع ..

وخلصت الحرب وبعده الوضع فوضى و وراها مباشرة صارت الانتفاضه الشعبانيه والناس خايفه.

ذاك اليوم اجاني فارس جنت اغسل ملابس بالحمام.
فارس:
سميه؟
سميه؟

سميه:
نعم؟
هاا ؟
هنا اني اغسل هدوم تعال.

اجه بسرعه :
عوفي الي بأيدج وكومي بسرعه حضريلي جنطه زغيره وخليلي بيها ملابس.

سميه :
جنطتيش؟
شكو؟

فارس:
بسرعه هسه كومي واني احجيلج.

كمت طلعتله جنطه زغيره كلي:
خليلي بيها ملابس بيت وطلعه ونعال وشامبو وصابونه وهالسوالف.

سميه:
اي بس كولي وين رايح.

فارس:
ولج انفتح اللجوء ...
واحد صاحبي سلم نفسه للامريكان مدري منو على اساس هو مشارك بالانتفاضه وخذوه للسعوديه ويكولون هسه يطوهم لجوء لاوربا مدري لدول الخليج .

سميه :
اي؟؟؟

فارس:
اي ولج اي ..
هاي فرصه اني هم راح اسلم نفسي على اساس هم جنت مشارك بالانتفاضه بلكي يطوني لجوء.

سميه :
ياا فارس شبيك اتخبلت؟

فارس :
انت شفهمج بهالحجي ...
ولج ادعي بس كون يعتقلوني حتى يطوني لجوء واروح لاوربا امريكا السويد الدنمارك لاي مكان بس كون اطلع.

سميه :
فارس من كل عقلك ؟
تطلع وين؟
واني وجهالك منو النه ؟
ياهو يبقى ويانه؟

فارس :
ولج شبيج ثوله اكلها اطلع لاوربا تكلي منو يبقى ويانه وجهالك ومدري شنو.

سميه :
ادري فهمني انت جاي تكولي رايح ومخليكم شتريد اكولك.

كعد واشرلي اكعد يمه :
سمسمه شبيج شغلي دماغج بس اطلع اضبط وضعي واشوفلنه مكان بيت شقه ايجار واجيبكم وراي.
نطلع كل احنه شعدنه باقين هنا متكليلي ..
بس ادعيلي كون اطلع.

ظليت صافنه مصعوقه من كلامه شنو هالمفاجأه هاي انوب ؟؟؟

فارس :
هسه اني اريد اسبح وانام شويه حتى بالليل اطلع بس اريد اكعد اريدج مضبطه الجنطه ومسويتلي كيكه شي من هالايدين الحلوه اخذها وياي.

راح واني بقيت متحنطه بمكاني ..
دخيلك ربي شصار لعقله هالرجال ؟؟

وفعلا هيج صار وراح فارس سلم نفسه للامريكان واختفى ...

انكطعت اخباره وظلينه اني والجهال بحدنه محد يسأل علينه من خواته وهو اصلا ماعنده اخوان ..

جبت حسن اخوي سكن ويانه.
ظلينه بالضيم حصار وجوع وراتب ماكو بس حسن خطيه يشتغل ويصرف علينه.

حاولت ويه نجيه تجي تسكن ويانه مقبلت لان البيت بيت ورثه متريد تسويلنه مشاكل ويه خوات فارس.

مرت سنه ..
وسنتين ...
وتلاثه ...
واربعه ...
وماكو كل خبر عن فارس .

حسن اتخرج واتوضف بوزارة الصناعه وجان راتبه خير من الله مقصر ويانه اني وجهالي دللنه.
لوما هو جان الله يعلم بحالنه ..
الحمدلله مضاع تعبي وياه ..

بعد مده قرر حسن يتزوج بنيه هو مختارها واتزوج وياي بالبيت وطبعا بس عرفن خوات فارس كلبن الدنيا علينه.

بهالاثناء اتوفى ابوي ..

والصدمه الاكبر طلع مسجل البيت باسم فتنه وجهالها مثل منصحتهم عمتي ..
والباقي النه اني واخواني.

طلع عنده بعد بيت مأجره وعنده فلوس بالبنك ..

حاول حسن يشوف طريقه قانونيه يرجع بيها البيت من فتنه لان البيت جان جبير وبمنطقه راقيه ويسوى هوايه.
بس قانونيا مالنه اي حق بي لان ابوي منطيه لفتنه وجهالها هبه ..

حصصنه جانت زينه اني بحصتي اشتريت بيت الي ولجهالي والي بقى شاركت بي خواتي واشترينه هم بيت زغير للكل للزمن خاف وحده يجور عليها الزمن بعد اكثر...

حسن اخوي هم طلع ابيت وحده هو وزوجته واني فتحت دكان زغير بالبيت حتى اعيش جهالي والبيت الي اشتريناه اني وخواتي هم اجرناه ونتقاسم اجاره صح مو هواي الايجار بس نعمه.

لان وحدي والدنيا مو امان خاف حرامي يطفر علينه من يسمعون الناس وحدي اني وجهالي بالبيت فقررت اجيب نجيه وياي تعيش ..

وفعلا جبت نجيه عندي بالبيت رغم حسن جان يريدها عنده بس بقت عندي ..

العمر يركض بينه وفارس ماكو.
لااعرفه عدل لااعرفه ميت .
لاادري بي بالسعوديه ولاادري بي طلع لاوربا.

ماكو كل خبر وخواته هم عبالك مو خوات ولاوحده بيوم دكت بابنه وكالت اشوف جهال اخوي.
ولو هي ايام الحصار جانت كسافه الناس ملتهيه بيها تدور على لكمه.

الحمدلله جهالي هم كبروا محمد وغيداء صاروا بالاعداديه.

وجان بذاك الوقت حزب البعث موجود وكل فتره يجون يسألونه عن فارس واخبار فارس رغم همه يعرفون ماكو اي شكل من اشكال التواصل بينه.

وجنت اخاف من يجون اخاف خاف ياخذون محمد بمكان فارس رغم فارس من طلع مجان مطلوب للدوله باي تهمه.

نجيه جانت تساعدني بكل شي حتى بالتفكير وجودها جان نعمه بحياتي وحياة اخواني.
جانت امنه فعلا..
معافتينه حتى بعد كل هالسنين ..
.
.
.
خطوةً في الدربِ الخاطئ تكلّف عمراً.
.
.
.

لايك وتعليق وعشر ملصقات فضلا ..
فارس اسم على غير مسمى الله يعينج سميه