#القفص
#روز_الفياض
#ح٢٤
.
.
.
فـإنَ لكَ رباً يُدبّر الأمر أفضل مما تُدبره لنَفسك".
.
.
.
ثاني يوم من شفت نزار:
ابو يسر اليوم من تخلص شغل اريد احجي وياك بلا زحمه.
نزار:
ماكو زحمه ..
اخلص هالزبونين ان شاءالله ونحجي بس هاا تعرفين من تجين شتجيبين وياج ههه.
سميه:
اكيد تدلل
التهيت اشتغل وغيداء وياي تساعدني نسيت الموضوع وره شويه سمعت صوت نزار دخل للمطبخ ..
نزار:
ام محمد وينج صار ساعه منتظرج؟
سميه:
ياا ...
والله نسيت اعذرني التهيت بالطبخ وراح من بالي هسه اجي ان شاءالله.
نزار:
اوكي ..
ها بابا غيداء شلونج ؟
غيداء:
الحمدلله عمو زينه .
نزار:
خو مضايجه هنا ؟
غيداء:
اي والله عمو ضوجه ..
لامدرسه .. لاطلعه ..ماما نهارها كله بالمطبخ ومن نكوللها نطلع تكول تعبانه لو مالي خلك ..
نزار:
اي حقج .. حقج ..
هانت مبقى شي وترحون لكندا ان شاءالله وتكملين دراستج هناك ..
راح للمكتب واني سويتله كهوه ووصيت غيداء عالاكل ورحت.
دكيت الباب ودخلت ..
جان كاعد منتظرني انطيته الكهوه وكعدت عالكرسي البعيد بصوره عفويه ..
نزار:
بنتج تشبهج بالشكل بس كون متطلع خوافه عليج ..
ابتسمت :
اني مو خوافه !!
منو كلك خوافه.
نزار:
لعد شبيج شارده لهناك شبي هذا الكرسي؟
ابتسمت اكثر وضحكت على كيف:
عادي كعدت هنا بصوره عفويه مو خوف ليش اخاف منك ؟
نزار:
عيني بعينج بالله؟
استحيت من اسلوبه بس اني فعلا مو خايفه منه مسوه الرجال شي يخليني اخاف منه بس شغلة معرفته بنورا هي الي مخوفتني بس خلال هالفتره الي عشنه بيها وياهم مشفت عنده سوالف تعبانه لاهو ولا محمود ومحترميني ومحترمين وجودي.
من كلي هالجمله استحيت كلش لان معناها اكو شي اباله ..
سميه:
بعد كل الي شفته والي مريت بي مااتصور اكو شي ممكن يخوفني ..
نزار:
معناها ليش متردين ترحين لكندا؟
سميه:
كندا هسه صارت مرتبطه بالطلاك ..
نزار:
مو مرتبطه بالطلاك بس انت هنا اقرب للعراق والامور اسهل ..
اذا سافرتي لهناك الشغله ممكن تطول اكثر لان يسووله امر استدعاء وممكن يجي وميقبل يطلكج بس بالعراق اصلا ميدزوله امر استدعاء ولا هالسوالف لان هو بوضع يعتبر مطلوب للدوله ميكدر يجي ،
فهمتيني؟
سميه:
فاهمه ..
فاهمه بس بصراحه اني صرفت نظر عن موضوع الطلاك.
خزرني وكلي بحده :
اتصل بيج؟؟
