القفص

القفص 22

#القفص
#روز_الفياض
#ح٢٢
.
.
.

ابجي وهمه مستغربين ؟؟!
وزوجة محمود انحرجت وظلت تتأسف ..

حاولت اهدأ واسكت بس مكدرت ..
مكدرت ...
عبالك جنت اريد فرصه حتى اطلع الي بداخلي ...
سنين واني ابجي على امي بس بجي عتب ولوم ..

هسه بهاللحظه حسيت شكد اشتاقيتلها...
ااااخ يايمه حياتي بدونج ظلمه.

مسحت دموعي وحاولت ابينلهم اني هدأت وانتهت نوبة الجزع والفزع والحنين الي اجتني بس دموعي فاضحتني ..
همه رجعوا يسولفون عادي وغيروا الموضوع حتى يخلوني اهدأ ..
بس بقت دموعي تصب واحس بالي مو يمهم ولايم حجيهم بالي يم امي.
شكد ضلمتج ..

صح نجيه مقصرت سنين قامت بدورج وجنت اكول امي واكثر بس هسه اكتشفت محد يسد مكانج ومحد ياخذ مكانتج ومحد يضحي مثلج ..

رجعت مسحت دموعي واترخصت وكمت بحجت اجيب مي من المحل ..

كمت اتمشيت بعيد شويه حسيت بعدني مخنوكه كعدت على مسطبه بعيده عنهم ورجعت كملت بجي اريد ابجي اريد ارتاح اريد امي تحس بيه.
اتمنى بيوم احلم بيها واشوفها ..

غمضت عيوني اتخيلها ، مكدرت اتذكر كل ملامحها ..
مااريد ابجي بصوت عالي وتنتبه علي الناس.
بقيت مغمضه ردت اهدأ بس الدموع دائما ماعدها هدنه.

هاا ام محمد خلصتيها بجي اليوم؟؟
سمعت صوت نزار يحاجيني ..

مسحت دموعي واتحسرت :
اسفه ابو يسر نكدت عليكم ..

كعد يمي :
محد مرتاح تره كلنه عدنه هموم ..
بس الفرق بقدرة التحمل .
وانت اتحملتي الي رجال متكدر تتحمله من حقج تبجين ومن حقج اتعبين ومن حقج تطلبين استراحه وهدنه حتى تسترجعين نفسج ..
من حقج تواسين نفسج بالطريقة اللي تناسبج وتريحج ..

بقيت ساكته مجاوبته ..

نزار :
ام يسر الله يرحمها من اتوفت حسيت بحزن رغم احنه جنه منفصلين من زمااان بس هم العشره متهون الا على ابن الحرام مثل ميكولون ..

حسيت جملته الاخيره تنطبق على فارس استغفر الله ربي ..
بس هو هانت عليه العشره وهانوا عليه ابنه وبنته.

نزار:
جنه على طول مشاكل لحد مقررنه ننفصل بس برغم كل شي صار بينه جانت بيوم من الايام زوجتي وشايله اسمي وام بنتي وبيناتنه ذكريات حلوه تستحق احزن عليها.

بقيت ساكته التفتت علي :
فارس يستحق ياترى تبجين عليه؟؟

استغربت سؤال !!!
يمكن عباله ابجي على فارس تنهدت وجاوبته :
فارس جان زوجي صح بس اني كل مشاعري تجاهه بردت من سافر من العراق وتركنه.
ويمكن من قبلها بهوايه ..

نزار :
لعد المن ذابحه نفسج هسه وتبجين؟

سميه:
ابو يسر امي من اتوفت هي اختارت تنهي حياتها حركت نفسها وماتت وخلصت كل سنين عمري الومها على الي صار بحياتنه بغيابها لكن قبل شويه من حجينه عن الام والتضحيه ...
فجأه حسيت نفسي ظلمتها ..
وفجأه حسيت اشتاقيتلها ..
هالبجي هذا اشتياق سنين لامي .
ام ماالها تسميه تنصفها وتوصفها الام دنيا وجنه وتضحيه وامي ضحت علمودنه هوايه ..
كلش هوايه ..
كل هالسنين منطيتها حقها بالبجي والاشتياق خلصت حياتي بعدها اركض ..
اركض للكل ..
فارس واهله واولادي وخواتي وكل اللي اعرفهم ..
ونسيت نفسي ..
ونسيت امي ...

رجعت دموعي ورجعت امسحها بخجل ..

نزار:
الله يرحمها .
ماالومج حقج ..
اشوف نفس الحزن بعيون يسر من نجيب سيرة امها وينكسر خاطري عليها اكول بعدها زغيره ولازم تكون اقوى بس انت المفروض قويه مريتي بهوايه ولو انت هم بعدج زغيره.

ماادري ليش حسيت كلمة زغيره مقصوده او يمكن لان اكثر من مره يكولياها علكت براسي ..

رجعنه كعدنه يم البقيه وكملنه سوالف وبعدين رجعنه كلمن لبيته.

بالليل حجيت لحسن اقتراح نزار ومحمود علمود السفر لكندا سكت.
حسيت بي مثلي مستصعب الشغله.
بعدين كتله:
مااكدر اروح لكندا ..
اخاف ..
ارجع للعراق احسن بين اهلي وناس لو احتاج شي كلها موجوده هناك منو الي ؟؟
لا عيني لا مااروح مااكدر اجازف.

ثاني يوم بالليل همه جانوا عدهم سهره رجاليه نزار ومحمود وحسن عالمباراه بشقة نزار.

راح حسن يشوف مباراة منتخب العراق وياهم ومن رجع الظاهر جانوا حاجين بموضوع السفر لكندا.

حسن:
ام محمد اني اشوف لو تقدمون على كندا احسن من الرجعه للعراق.

باوعتله :
ها شو غيرت رأيك؟

حسن:
ايي يمعوده هو العراق شبي حتى واحد يرجعله اني لوما امي نجيه متقبل تطلع جان هم اخذت المره والجهال وقدمنه وياكم.

سميه:
اي حسون بس وحدي صعبه.

حسن:
كل شي بالحياة بدايته صعبه بعدين بمرور الوقت يصير سهل وعادي طبيعي وهي فرصه من طلعتوا ووصلتوا لهنا واكو ناس مساندتكم ومساعدتكم حتى لو الموضوع بي بعد تعب واحد يتحمل بس بالنهايه يرتاح ..

اتنهدت ماادري شجاوبه خلصت الليل افكر محتاره ومااكدر احسم امري.

الصبح كمت لشغلي واني بالمطبخ اجت سوسن :
استاز نزار طالب يشوفك .

رحت دكيت باب المكتب وفتحت الباب شفته يحجي بالتليفون اشرلي اتفضلي.

دخلت وسديت الباب وكعدت عالكرسي مقابيله.
خلص تليفونه وكلي:
ام محمد كم مره لازم اطلب يعني؟

سميه:
خير ان شاءالله شتطلب؟

نزار:
مو كايلج من تجين للمكتب تسويلي وياج كهوه الكهوه من ايدج طيبه بيها حنية العراقيات.

ضحكت :
هاا نسيت هسه اروح اسويلك ..

نزار:
لا لا كعدي هالمره سماح من المراه الجايه نفرض عقوبات.

سميه:
هههه اهم شي مو قطع راتب .

نزار:
افه عليج تشيلين هم الراتب واني موجود !!!
اقسم بالله اني لو اعرف تقبلين تاخذين الراتب بدون متشتغلين والله مااخليج تشتغلين بس اعرف نفسج عزيزه ومتقبلين .

سميه:
مشكور استاذ انت مقصرت وفضلك علي وعلى جهالي جبير ان شاءالله الله يكدرني واردلكياه بيوم من الايام ..

نزار:
هذا حق وواجب مو فضل ام محمد ..
احنه هنا اهل ان شاءالله بس اذا استمريتي تكليلي استاذ احتمال نتخارب .

سميه:
ههههه لا مو لازم نكول استاذ ابو يسر خلص ؟

نزار :
اي هيجي ..

.
.
.
‏يكثرون اشباهك وتبقى أنت اجملهُم .
.
.
.
لايك وتعليق وعشر ملصقات فضلا