#القفص
#روز_الفياض
#ح١١
.
.
.
لن يُشفيك الهَرب، كُل الشِفاء بالمُواجهة.
.
.
.
اتزوجت ناديه وبقى بس حسن ..
خلص اعدادية وانقبل هندسه.
ابوي كطع عنه المصرف رغم يدري هو طالب وعنده مصاريف مواصلات وكتب ولبس وغيرها ..
اضطر حسن يشتغل ويه صديقه فيتر يصلح سيارات بورشه ..
ظليت مااروح لبيت اهلي شسوي رايحه محد موجود من اهلي بس حسن واغلب الوقت بره يدرس يم اصدقاءه لو يشتغل ..
مرات جان هو خطيه يجيني كل كم يوم يجيب ملابسه اغسلهن اله خطيه ..
وجنت اجمعله جم فلس من يجي انطيهم اله خاف يحتاج شي وهو شاب مااريد يمد ايده لو يمشي بطريق بي حرام ..
جنت كلما يجي احلفه خاف يشرب وهو يحلف ميشرب.
جان فقير مؤدب وعقله جبير ومركز بدراسته ومستقبله.
وراها صارت احداث دخول العراق للكويت وصارت الحرب وشدرنه من بيتنه رحنه لبيت اهلي لان جبير وخواتي هم اجن جانت ايام سوده.
الناس جانت حسره عليها اللكمه وكل يوم ننتقل لمنطقه مره كعدنه بالجامع ومره شردنه لعيال نهله اختي للريف ومره عد كرايب فارس.
مبقى مكان يعتب علينه وجنه هوايه ابوي ومرته وجهاله وخواتي وازواجهن وجهالهن واني وفارس وجهالنه وعمتي معلكه بركبتنه وكالمعتاد ميعحبها شي وبس تنتقد وتحجي على هذا وعلى ذاك.
الى ان بيوم من الايام جنه ابيت ابوي طبيت للمطبخ الصبح اريد اسوي ريوك لهاي العشيره العدنه بالبيت وشفتها كاعده هي ومرت ابوي..
عمتي:
لا خليه يسجل البيت باسمج عالاقل حتى تضمنين حقج وحق جهالج تره هاي سميه سم اليسمها حيه تكدر تخلي ميطيج شي لا انت ولاجهالج.
مرت ابوي :
ياا شمسويتلها حتى هيج تسوي ؟؟
مو ربيت خواتها واخوانها لحدما كبروا وصار براسهم خير ..
هاي جزاتها ؟؟
عمتي:
جلبه على امها مايجي بعينها.
اني من سمعت عمتي هيج تحجي راسأ فقدت وظليت اصيح:
الله ينتقم منج ان شاءالله .
ولج انت شنو من طينه؟؟
شنو من بشر ؟؟
تحفرين جوانه وكاعده ويانه ؟؟
انت عمه انت؟ عمه العماج من عمه.
ظليت اعد واصف واغلط والتمت العشيره كلها وعمتي ظلت تغلط وكلبت الدنيا والغلط والفشاير.
فارس يجر بيه وابوي يصيح ومرت ابوي سوت نفسها مسكينه محجت شي تكسر الخاطر.
اخر شي من سكتونه وسألوا عمتي ليش هيج تحجين وتسوين مشاكل كلتلهم:
ردت انصحها ماجبت هالحجي من جيبي بأذني سمعتها تحجي هي وخالده تكللها خل نخلي ابوي يكتب كل شي باسمنه.
ليش هيج تسون بهالفقيره؟
ظلينه نباوع وحده للثانيه اني وخالده شنو هالفلم والتمثيل مو عجوز حشا ممثله.
خالده اختي عصبيه نار ، راسأ كامت هجمت عليها تريد تكتلها كوه فكوها منها.
اخر شي من حركت كلبي وكفت بالهول يمهم رفعت ايدي للسما وكلت:
ربي اذا جنت مظلومه ومحرومه ربي اريد حقي منك مو من بشر.
ربي لو تاخذ روحي لو روحها كيفك انت ..
اذا جنت اني ظالمه وحاجيه هذا الحجي ربي اقصف عمري وخلصني ..
وان جانت هي الظالمه ربي اخذها وفكني منها موتتني ..
ظلت تصرخ وتبجي وتكل لابوي بتك ممتربيه تدعي علي وانت كاعد.
وبعدين استلمت فارس رزاله ليش مكام كتلني لان ادعي عليها.
وفارس اجه رزلني وكلب الدنيا علي شلون اغلط وادعي على امه.
بس بيومها حسيت بردت كلبي من رزلتها وطيحت حظها.
ابوي وجهه ثكل يمكن صدك حجيها دخل هو ومرته وجهاله لغرفتهم بعد مطلعوا منا للعصر.
خالده خلصت اليوم كله تدردم وتسمع عمتي حجي وكل شويه نهال وناديه يلزمنها تريد تروح تكتلها.
فارس :
زين هيج ؟؟
ارتاحيتي كلبتي الكل عليج ؟؟
سميه :
منو الكل ؟؟
امك من يومها ضدي ومتحبني ..
فارس:
سميه احترمي نفسج.
سميه:
محترمه نفسي ومغلطانه بحق احد..
امك تعرفها كلش زين لاتجي تسويها بريئه يمي تره كلها تعرفها خبيثه.
فارس:
لسانج اذا مااكصه الج مااطلع فارس ..
مااتوبين الا اذا كصيته.
سميه:
ترضاها تكول للفتنه خلي ابوي يسجل البيت باسمها واسم جهالها لان اني اريد اقشمره ومااخلي ينطيهم شي؟
ليش مو حرام يسجل البيت باسمها واسم جهالها ؟؟واحنه مو جهاله ؟؟
مو النه حصه ؟؟
مو النه حق بالبيت مثلها ومثل جهالها؟؟
سكت هو بعدين كال:
خاف فهمتيها غلط مو هيج جان قصدها؟
سميه :
ياا مو سمعتها انت تكول سامعتني احجي اني وخالده بهالموضوع؟
فارس :
لاميصير شنو يسجل البيت باسمها انت وخواتج الجن حصص خوما بس فتنه وجهالها.
حسيته غير رأيه صار بيها فلوس وحصص سكتت بعدين كتله:
المصيبه ذيج ترد عليها ليش هيج تسوي سميه مو ربيت خواتها واخوها.
ضحك :
شوكت ربتهم؟
سميه:
والله ماادري شوكت !!!
مساكين ربوا نفسهم بنفسهم محد رباهم ومحد بحالهم ومحد دره عنهم شياكلون شيشربون شمحتاجين شناقصهم محد بيوم من الايام دك بابهم وكللهم جوعانين شبعانين ولا احد ذكرهم بلبسه بعيد بفرح بشتا بصيف.
هذا حسن مو طالب جامعي حسره عليه الفلس الله يرضى يشتغل فيتر حتى يطلع مصرفه كوه يحصل وقت يدرس بي وكاضيها غدا وعشا لفات محد يصبله لكمه ولحد يحسب حسابه بوجبه.
حسبنا الله ونعم الوكيل.
سكت ..
يمكن انقهر ويمكن انحرج من كلامي ويمكن ماعنده جواب بس بعدين كلي:
الله ينتقم من الي جان السبب.
سميه:
آمين ...
.
.
.
"ولرُبّما في الأرض تصعبُ حاجةٌ
والحلُّ آتٍ في السماء .. السابعة"
.
.
.
لايك وتعليق وعشر ملصقات فضلا
