#القفص
#روز_الفياض
#ح٢٠
.
.
.
سكتت..
يمكن هو حس على نفسه كام من مكانه كعد وره مكتبه باوعلي واشرلي:
كملي ..
بلعت ريكي كملت القصه للنهايه لحد موصلت اني اشتغلت وياهم وبجيت ..
خله ايديه عالمكتب واتدنه شويه ليكدام :
يعني انت هسه ساكنه بشقة نورا ؟؟؟
استحيت وحسيت بالاحراج وخجلت وفشلت ومبقى شي ماحسيت بي ..
سميه:
مجبوره ومن اطلع اقفل الباب بالمفتاح على ابني وبنتي رغم البنيه تعاملنه بكل ادب واحترام بس انت تدري بعد.
نزار:
فاهم ..
فاهم ..
اتنهد وسكت شويه بعدين كلي:
سميه هالمكتب الي تشوفينه اني صاحبه وهالشقه اني الي مستأجرها.
واكو غرفتين فارغه بيها اليوم ترحين تجيبين ابنج وبنتج وتجون بيها.
فكرت بكلامه لحظه فرحت بي ..
بس بعدين كلت لا هو اصلا وين يعرف نورا اذا مو هو من زباينها ؟؟؟
معناها عنده سوالف تعبانه نسوان ويمكن شرب شلون اجي هنا يمه وبنتي زغيره وشابه يروح يخلي عينه عليها.
سميه:
لا عيني مشكور مقصرت البنيه ممأذيتني بشي هي بحالها واحنه بحالنه.
نزار:
ميصير حتى لو بحالكم ميجوز افرضي بلغوا عنهم الشرطه واجو اعتقلوا الموجودين بالشقه واعتقلوكم وياهم شنو موقفكم راح يكون؟
صدمني كلامه انوب انسجن مبقى بس السجن ماانسجنتي ياسميه !!!
سميه:
اسم الله هو بس السجن بقى على حظي.
نزار:
معناها خلص انتهى النقاش هسه ترحين وتجيبين اولادج وتجون عالاقل هنا احنه يمكم اني شقتي فوك ومحمود هم هو وعائلته شقتهم بالطابق الجوه في حال احتاجيتوا اي شي احنه حاضرين وبالشوفه منقصر ان شاءالله.
سميه:
والله يااستاذ ماادري شكولك.
نزار:
لتكولين شي انت عراقيه منقبل عليج ولانرضالج البهذله.
سميه:
بيكم خير والله بس.
نزار:
ام محمد هنا احسنلج صدكيني ..
سميه:
ان شاءالله.
كمت اريد اروح صاح وراي:
اوكفي انتظري اني اوصلج.
سميه:
لا لا شكرا ..
ميحتاج هسه اخذ تكسي.
نزار:
امشي يلا اصلا اني اريد طالع.
طلعنه ومن صعدنه بالسياره سألني عن العنوان.
استغربت معقوله ميعرف عنوان شقة نورا شنو مو من زباينها ؟
لعد وين يعرفها؟
انطيته العنوان وصلنه ونزلت واتشكرت منه بس كلي:
اني راح ابقى انتظركم هنا جمعوا اغراضكم براحتكم وتعالوا.
سميه:
لا استاذ مشكور سوينه عليك زحمه كافي هيج احنه ناخذ تكسي ونروح.
نزار:
لعد المن اجيت اني وكطعت الطريق هذا اذا ترحين وترجعين بتكسي.
