#القفص
#روز_الفياض
#ح٩
.
.
.
كيف يكون الإنسان مليئاً بالأحلام وفجأة
يصبحُ قلبه مقبرة ، أين ذهب كل شيء !
.
.
.
بليلتها مانمت بقيت كاعده وادك صفنات والوم بنفسي شبيه استعجلت عالزواج شجان ناقصني؟
جنت مدلله كل بنات العائلة والجيران تحسدني على دلال امي الي ..
البس والكشخه والشعر يجنن ودوم محنيته امي الي واظافر طوال ومصبغتها ولاهم ولاغم ..
ملتهيه بحياتي الورديه اكبر همومي دراستي ..
شوداني وحبيت فارس !!!
شحبيت بي اصلاً ؟!!!
مو جنت اعرف عماتي شكد اذن امي الله يرحمها وجانن يقرن براس ابوي عليها لحد مخلنه كرهها بحياتها.
اصلا شعجبني بفارس لا مستوى ..
ولامال ...
ولاجمال ...
لا ويشرب بعد ...
شبيه من عرفت بي يشرب بقيت وياه؟
اخ يا نجيه شكد نصحتيني بس مااخذت النصيحه ..
وارجع اجاوب نفسي واكول انجبي وانطمي ..!
المثلج يبطل وميقبل بيا عين بعد؟؟
مو سلمتيه نفسج ؟
زين وقبل يتزوجج ،يمكن واحد ثاني جان نكر وكال مو اني ورجعلج لاهلج وكال بنتكم طلعت مو بنيه ومو شريفه.
وارجع للبدايه ..
لراس السطر ...
لامي ...
امي الي مفكرت شيصير بينه عكب عينها ومنو النه لو ماتت وشراح تسوي بينه الناس وراها؟
غلطتج يمه غلطتج...
كل الي صار بينه غلطتج ...
الام حياتها مو ملكها حياتها ملك ابنائها شلون طاوعج كلبج غمضتي عينج بدون متشوفينه وتودعينه؟
شلون كدرتي ترحين وتعوفين حسن وتعرفينه بالليل يبجي عليج؟
شلون مافكرتي بيه اني المدلله عكب عينج اتبهذل وانذل وانهان وانطك؟
اخخ يايمه موتج كلب حياتنه بناتج مرت عليهن ايام نامن بدون عشا يدورن اللكمه تسد جوعهن بدون ميذلن نفسهن لابو لو لمرت ابو.
شلون مافكرتي بينه وانت تعرفين ابوي شكد اناني؟
يمكن لهالسبب الله مارزقني اطفال لان مو كد مسؤوليتهم مااريد اصير مثلج واعوفهم لان فارس مثل ابوي ..
اناني ملتهي بشربه..
يكولون الي تشبع دلال ابيت ابوها تشبع قهر وذل ابيت زوجها.
جنت اسمع هالكلام واضحك قبل لا اتزوج اكول المتزوجات يحجن بطريقه مأساويه عبالك هي حرب.
هسه اكتشفت كل الكلام الي سمعته صحيح كل العبر صارت بيه.
يلا..
مالي غير الله مفوضه امري اله.
والله كريم ..
بديت اراجع عند الدكتوره على موضوع الحمل والحمدلله مطلع عندي اي سبب يمنع الحمل لذلك الدكتوره كلتلي لازم زوجج هم يفحص.
وطبعا بالبدايه من كلت لفارس اعترض وزعل كال:
عيب عليج شنو يعني عندي مشكله ولازم اروح افحص ؟؟؟
العيب دائما عد المره مو عد الرجال ..
سميه :
فارس هذا مو حجيي هذا كلام الدكتوره اني شمعرفني ؟
سكت بعدين كال:
خوش باجر اروح ..
لخاطر خالي خاف يزعل بس اني متأكد ماعندي عيب العيب منج .
