#القفص
#روز_الفياض
#ح١٥
.
.
.
﴿ قُلْ عَسَى أَن يَكُونَ قَرِيبًا ﴾
" ياربّ أجعل بيننا وبيّن حلمنا مُلتقى "
.
.
.
سألت حسن اخوي عن رأيه بموضوع بيع البيت وهل كلام فارس صحيح ؟؟
حسن :
والله ياام محمد هو كلامه صحيح اكيد ..
لان السفر يحتاج هواي فلوس منا لازم ترحون لعمان وتبقون هناك بالاردن مدري شكد لحد متكدرون تسافرون لامريكا ..
وهاي كلها مصاريف واذا ماعنده بيت هم حقه وين يكعدكم اكيد ساكن ويه جماعته بشقه هسه لان نفر واحد بس انتو عائله لازم بحدكم بشقه او بيت.
سميه :
المشكله يكول راتبه قليل وميكفي ايجار وعيشه.
حسن :
طبيعي ..
ولتنسين محمد وغيداء هناك وراهم دراسه ومصاريف اكل وشرب وغيرها ..
والاهم متعرفون شكد راح تبقون بالاردن لحد ميكدر يسحبكم.
الاردن كلش غاليه .
سميه :
ياا ..
كول سالفه طويله هاي واني عبالي بنفس اليوم لو ثاني يوم نوصله.
حسن :
لا وين اكو ثاني يوم لو بنفس اليوم اذا بيكم بخت بنفس الشهر تخلص اموركم مو بنفس اليوم ..
سميه :
مبارك على حظي.
حسن :
ههههههه .
سميه:
هههه اي والله.
نجيه :
يعني شتكول ياماما تبيع لو لا؟
حسن:
يمه هذا الشي راجعلها هذا ملكها وهذا زوجها تريد تروح لزوجها وتلم شمل عائلتها فبهيج حاله ماكو غير حل ..
منين تجيب فلوس السفر ماكو غير تبيع بيتها .
لاوالله تكول ماابيع البيت معناها متكدر تروح لزوجها ويبقون همه هنا وهو هناك لحدما الله يكتبلهم ينجمعون على خير الله اعلم شوكت.
سميه :
اوووف ...
اوووف ..
نجيه :
الله يساعدج.
فارس مااتصل بعد يمكن جان يريدني افكر ويمكن جان يريد يخوفني ويضغط علي حتى ابيع البيت ويمكن صدك جان مشغول وماعنده وقت ..
ظليت متردده ومتحيره الى ان ذاك اليوم بالليل الساعه ثنعش ونص تقريبا ..
نايمين جان الجو شتا بارده والناس تنام من وكت واندك الباب حيل ..
كعدت اركض ونجيه ومحمد وغيداء كلهم كعدوا محمد راد يفتح الباب اني مقبلت :
فوت جوه اني افتحه.
محمد :
ماما شبيج ؟
سميه :
فوت جوه ، محد يفتح الباب غيري .
بالله طلعوا الحزب جايين ياخذوك بمكان ابوك ..
محمد :
وانت حتمنعيهم ههههه .
سميه :
متطلع وانتهى ..
اخذت المفتاح لان اني جنت اقفل الباب بسلسله وقفل اخاف.
طلعت للحديقه صحت :
منووو ؟؟
سمعت صوت مره ورجال صاحوا :
احنه ..
احنه ..
