#القفص
#روز_الفياض
#ح١٠
.
.
.
كيف يكون الإنسان مليئاً بالأحلام وفجأة
يصبحُ قلبه مقبرة ، أين ذهب كل شيء !
.
.
.
فارس:
شبيج؟
مجاوبته حسيت احتريت حيل حتى نفسي ضاك وعيوني مااشوف بيها بعد ..
كل شي صار لونه اسود ظلمه صارت.
حسيت بي كعد يمي :
سميه شبيج ؟
مريضه؟
حسيت شويه بدا الشوف والضوه يرجع لعيوني والحراره تخف اتنفست حيل :
ماادري شصار بيه ...
دخت وماشفت شي بعد ..
صارت ظلمه وحاره الدنيا.
خله ايده على كصتي :
كل شي مابيج مو مصخنه ..
بس خاف بداية افلاونزا ؟
انت ملابسج كلها خفيفه واربعه وعشرين ساعه تغسلين بالمي البارد الجو برد تره مو عبالج صيف.
عدلت كعدتي ودرت عليه :
ساعة السوده.
فارس:
شنو هو؟
سميه:
عالزواج ساعة السوده القبلت بيها اتزوج.
فارس:
هاا شو حجيج ماصخ ؟
اكو وحده تكل لرجلها ساعة السوده لاخذتك ؟
شو لسانج صاير طويل؟
بساعتها يمكن خفت من الموت خفت اموت واني مربوطه بي كافي تعبت تلث سنوات من الكراب والخدمه والاهانه.
اشتاقيت لشعور الحريه.
سميه :
والله ياريت لو تطلكني فارس تعبت.
باوعلي هز ايده وطلع.
راح لدوامه واني بقيت بمكاني لحدما ارتاحيت وكمت لان وراي اشغال شاقه مؤبده الظاهر.
وراها بكم يوم جان عدنه موعد عند الدكتور ورحنه اني وفارس ومن سوولي تحليل طلعت النتيجه حامل !!!.
محسيت بأي مشاعر بهالخبر ...
بس انصدمت ..
ممتوقعه..
يمكن مقتنعه مراح يصير عندي اطفال لان مااريد اصير مثل امي ..
بس فارس رغم جان ممتشجع لموضوع الجهال قبل بس من سمع حامل عبالك رابح جائزه بحياتي مشايفته هيج فرحان !!!
استغربت كل هالفرحه !!
رجعنه للبيت وهو يضحك وفرحان وحتى ميصيحلي بأسمي كله سمسمه.
مبقى شي مااشتراه من السوك الفاكهه انواع لحم سمج دجاج خضره اشكال ..
اول !!
تالي !!
من دخلنه لغرفتنه حضني حيل:
سمسمه ..
اريدج تاكلين زين ، وترتاحين ماتسوين اي شي بالبيت مالج شغل بالبيت عسى مايحترك زين؟
سميه :
الايده بالمي مو مثل الايده بالنار.
فارس :
سمعي الكلام عاد ..
الف مره كايلج اريدج تسمعين وتنفذين بدون نقاش ..
اتنهدت وسكتت اجه كعد يمي :
سمسمه لاتخليني ازعل منج واضوج ، هسه المفروض نفرح مو جنتي تردين جهال هسه راح يصير عدنه جهال ..
