القفص

القفص 6

#القفص
#روز_الفياض
#ح٦
.
.
.
‏" كونوا مع الذين يعرفون قيمتكم دوماً ."
.
.
.

حجيت ويه ابوي حتى يشوف شغل لفارس بما انه فارس مخلص كلية اداره واقتصاد قسم محاسبه وابوي عنده معارف واصدقاء ..

وفعلا ابوي حصل شغل لفارس وداوم فارس يطلع الصبح يرجع الظهر بس فلس مينطيني ..

من اشتغل فارس ظل ميطلب مني فلوس فجنت المصرف الي ينطينياه ابوي اضمه لاخواني لان مصرفهم ميكفيهم بس مستلزمات الدراسه.

ابوي اتغير حيل ويانه ميدري بينه جوعانين ..
بردانين ...
مرضى ...
ميدري بأي شي اهم شي عنده فتنه.

وحتى تكمل السبحه فتنه حامل !!!

معقولة بهذا عمرها حامل ؟؟؟
واني الي اتزوجت قبلها مصار عندي حمل ؟؟
وتعال اتحمل حجي عمتي ام لسان ينقط عسل اللي ظلت متصيحلي بأسمي تصيحلي كله ( العاجر ).
اموت من القهر بس مااكدر احجي شي ..
اخاف ..
وماعندي احد بظهري ياخذ حقي ..
ابقى ساكته بس گلبي يبجي دم ..

فارس استعدل شويه لان اشتكيت لابوي منه كتله مينطيني مصرف من اشتغل لهسه ..

ابوي ماادري شعجب رزله هو يخاف من ابوي ويدور رضاه لان ابوي عنده عماره زغيره بيها شقق مأجرها وفارس ابو فليس هو وعمتي فيتلوكون لابوي عبالك راح يسجل العماره بأسمهم.

بده ينطيني مصرف جنت اجمعه مااصرف منه شي وكل فتره بداية دوام او بدايه موسم شتا او صيف جنت اشتري للخواتي الشغلات والملابس الي يحتاجونها.

ابوي صار ميتقبل منهم اي شي او اي طلب
كله مرفوض عنده ..
رغم عنده نعمه بس هالنعمه بس لزوجته ولابنها.
اخونه الزغير حمزه .

من تبدي المدارس جان ينطيهم فلوس على كد كسوه ملابس وحده يعني قميص وتنوره بس ..
ماكو اكثر.
ميفكر شلون يخلصون بي السنه كلها بلبسه وحده .
فجنت اجمع مصرفي حتى اشتريهم باقي الاحتياجات حتى يكدرون يداومون.

مرت سنتين ..
خالده اختي اتخرجت من الاعداديه وداومت معهد تكنلوجيا بوقتها.

ونهال وناديه بطلن من المدرسه تعبن البيت كل براسهن والمدرسه وحسن.

مرت ابوي جانت عايشه ملكه ومخليتهم خدم ...
حتى خبز ظلن يخبزن ، اني الجبيره مااعرف اخبز لهسه وهن خطيه اتعلمن وحده تعجن ووحده تخبز وهن بعدهن اطفال ..
اللي بكدهن بالمتوسطه .

وحسن كبر شويه وصار طول النهار بالشارع واكف ،
محد بحاله خطيه وابوي ميسأل عنه ولا يعلمه ولاينصحه ولاعبالك عنده ابن قبل ابن فتنه ..

مرت سنتين واني على وضعي اكرب ليل ونهار وعمتي كل مايجيها تزيد.
ميعجبها العجب ولا الصيام برجب ..

الشي الوحيد الي جان يعجبها انه تغثني وتقهرني ..

جانت تتعمد تغثني ..
اتذكر جنت من امسح البيت تلبس نعالها وتروح تدوس بالحديقه بالطين وتجي ترجع تمشي عالكاشي الي توني ماسحته ...
بس حتى تشلع گلبي وتخليني اعيد الشغل مرتين وتلاثه ..
ووكت الاكل جانت متقبل الا هي تصب الاكل رغم اني طابخته حتى تصب الها ولفارس اول شي وتحسب حساب بناتها كل وحده بصحن وتدزه الهن ،واني الي يبقى بالجدر الي ميهم شكد بقى يسد جوعي ميسد جوعي مو مهم واذا بقى اصلا لازم بدون لحم اللحم والدجاج والسمج هذا من طبيتلهم بعد مضكته.
ممنوع يطب للبيت بحجة غالي واحنه منكدر نشتريه وهي تضم الفلس عالفلس تجمع بسكوت وكل مده مده تروح تشتري محبس وتضمه ..
المن ماادري ..