#القفص
#روز_الفياض
#ح٢١
.
.
.
قالوا في وصفها : يداها تُجيدانِ الطبخ
وخياطة الثوب، وإصلاح الأشياء والقلب .
.
.
.
ظليت صافنه هذوله من كل عقلهم يحجون ؟؟
عبالهم كندا براس الشارع ...
واذا مدبرتها عادي ارجع.
محمود:
والله اني اكول فكري بجديه بالموضوع .
نزار:
اني اقدملكم واساعدكم هناك ويسر راح تكون يمكم تكدر تساعدكم لحد متتعودون عالوضع وتعرفون تتحركون بدون مساعده.
سميه :
والله ماادري تعرفون هيج قرار مو سهل ويخوف.
نزار:
اخذي رأي اخوج واهلج وسأليهم تره هي فرصه لتفوتيها انتو طلعتوا من العراق وخلصتوا من التعب والعيشه الصعبه.
دمعت عيوني :
شخلصت من التعب ؟؟
لعد الي اني بي هسه شنو؟
من اجيت لهسه اركض ومااعرف تاليتنه شنو ..
نزار :
سميه احنه دنحاول نساعدج بكل الطرق بس انت رافضه ..
ظليت بليلتها افكر بكل الحجي الي كالوه مره اكول حجيهم صحيح ،ومره اكول لا اخاف ماادبرها ..
شلون اسافر اني وجهالي وحدنه ؟
ومره اكول شكو بيها هسه فارس شلون دبرها وطلع وعاش ونسانه ..
وارجع اكول فارس رجال ماعنده مشكله يطب يطلع براحته ميخاف.
اني من اتزوجته انسجنت بقفص مشفت شي من حياتي ومن الدنيا حتى مااعرف اتصرف وادبر اموري ماعندي اي ثقه بنفسي لان جنت مقطوعه عن العالم ومشغولة بفارس واهله وخواتي وابوي ومرته ..
كل شي مشفت ..
وظليت على هالحاله اكسر واجبر.
وره يومين اتصل بيه حسن كال راح يجينه لعمان.
فرحت وحسيت اجه وياه الفرج اخيراً ..
جنت متشوقه ارجع لخواتي وبلدي الغربه صعبه ..
بس رجعت اكتئبت من اتذكرت بيتي الي بعته علمود اطلع جهالي حتى يعيشون ويرتاحون ويشوفون الدنيا وحتى اني ارتاح من المسؤوليه.
هسه من نرجع وين نرجع ؟؟
منو يتحملنه ؟
احنه حمل زايد على اي بيت بهالحصار ..
حسبي عليك يافارس من ضيعت الضمان الوحيد لمستقبل جهالك .
الظاهر المسؤوليه مكتوبه علي.
ظليت افكر وين نسكن اني وجهالي ؟؟
صح عندي حصه بالبيت المشترك الي اشتريناه اني وخواتي بس البيت مأجرينه وايجاره مستفادين منه كلنه شنو ذنب البقية احرمهم من الايجار وماعندي ادفع ايجار الهم ..
جنت اشتغل وافكر اخر شي عفت الطبخ وكعدت ابجي تعبت من الذل ياربي تعبت ..
بجيت على حياتي الي انتهت من اتوفت امي على قهري الي عشته وعلى المسؤوليه الي شلتها من عمر سطعش سنه وعلى ابوي الي راح وحرمنه من حنانه قبل ميموت وعلى خواتي وحياتهن وعلى الحرمان الي عشناه بجيت وبجيت وبجيت كل شي بحياتي حلو انتهى من بعدج يايمه.
اجه حسن اخوي وفرحت حيل بجيته حسيت هم وانزاح عن صدري.
جنت خايفة برغم الجماعة بالمكتب كلهم زينين ويانه بس احساس بعدم الامان ذبحني ..
