#القفص
#روز_الفياض
#ح٤
.
.
.
-احيانا مشاعرنه تهوى النتعب بگربه ..
.
.
.
ابوي طلك نجيه غيابي !!!
اتفاجأنه ليش هيج سوه ؟؟
هي مسكينه تحبنه ..
جانت تحاول تكون امنه فعلا ..
حبيناها واتعودنه عليها.
حجينه ويه ابوي وحاولنه وياه حتى يرجعها بس مقبل ..
عبالك جان يريد حجه حتى يخلص منها ..
مو مهم عنده احنه ارتاحينه وياها وحبيناها ..
مو مهم هي حبتنه ودارتنه واهتمت بينه ومحسيتنه بيوم حتى زوجة اب ..
مو مهم حسن الطفل الي اتعود ينام يمها وبالليل يبجي عليها ..
المهم هو معجبته .
فارس من عرف بالي صار طبعا ايد ابوي بموضوع الطلاق ..
فارس حس بنجيه متحبه وممرتاحتله ..
فأجه قرار ابوي من جانبه ومن صالحه .
ابوي مضيع وقت ، مباشرة بعدما طلك نجيه بدا يدور على عروس ثانيه حتى تداريه وتخدمه وخصوصا حسن بالليل يظل يبجي على نجيه متعود ينام يمها .
عباله اي وحده تجي راح تحب حسن وحسن يحبها وعباله بهالبساطه راح نتعود عليها وتتعود علينه ..
او يمكن يعرف كلش زين بس مصلحته عنده اهم من عدنه ومن راحتنه ..
الصبح الكل بالدوام ابوي واخواني بس اني بالبيت انظف واحاول اطبخلهم غدا مره يضبط ومن يخرب واذبه الى ان شوية شوية بديت اتعلم ..
امي مجانت تقبل اطبخ لو اسوي شي كله هي طول الوقت جنت مهتمه بنفسي اظافري طويله وشعري خالتله حنه ولابسه ومتأنقه مو مثل هسه ماادري اغسل الملابس لو اطبخ لو انظف لو ادرس خواتي لو .. لو .. لو ..
لو التهي بفارس اللي ظل يستغل غياب الكل الصبح ويجي لبيتنه يوميه الصبح من يطلعون للدوام ولحد قبل ميرجعون للبيت بشويه يروح لبيتهم ..
جنه بالبدايه نكضيها ضحك وسوالف بس بعدين فارس مقبل كلي الى متى نبقى هيج بس سوالف لو بوسه كل وين ووين ..
ظل فارس يلح ويلح ويلح الى ان بدا يتطور الوضع بيناتنه شوية ..
شووويه ..
بالبدايه مقبلت بس هو من ارفضله طلب يزعل ويكولي متحبيني ويظل ميحجي وياي فد يومين او تلاثه ..
الى ان اني من كدما احبه واشتاقله اخابرله اكوله يلا تعال موافقه عاللي تريده .
يجي يرركض ..
بدا الموضوع ب ( خل نتمدد عالجرباية بغرفتج شوية )
بعدين صار ( اريدج تنزعين ملابسج كدامي ) ...
الى ان ذاك اليوم رحنه لاهله محد جان بالبيت بس اني وياه ودخلنه لغرفته وقفل الباب !!
من ياخذني لاهله معناها يريد شي اكبر من كل مره مثل الي يجربني يجرب رد فعلي على هالشي.
ولان اني ماعندي احد ينبهني بعد لا ام ولا نجيه ولا ابوي فارغلنه اصلا فجنت طايره بفارس وحب فارس ورومانسية فارس ..
مااكدر اكله لا على اي شي ..
بذاك الوقت جان تفكيرنه تفكير اطفال مجنه نعرف الحيله والمكر مثل هسه ..
جانت عدنه براءه مو مثل هسه اصغر طفل يعرف ويفتهم ويدرك هالتصرف هذا شنو نتيجته وهذا ممكن هيجي يسوي وهذا ممكن يخسرنه هواي ..
الناس جانت اغلبها طيبة .
الجيران ..
الاصدقاء ..
ماجان اكو غش من الغريب .. بس من الاقارب ....
مثلما كالت نجية ..
الاقارب عقارب ..
