#القفص
#روز_الفياض
#ح١٦
.
.
.
من بعد الي صار خفت على جهالي ..
وخفت من الدنيا ...
اذا صارلي شي منو الهم ؟
ومنو يبقى وياهم ؟
احنه من اتوفت امي بقى ابوي صح مجان اله ذاك الدور بحياتنه ويمكن اذانه اكثر مما فادنه خصوصا خواتي وحسن بس اسمه كدام الناس النه اب والنه ظهر وسند.
برغم كل شي مو زين سواه ابوي بس جان فارس وامه وخواته يخافون منه ...
مااريد غيداء باجر من تتزوج زوجها وعيالها يستقوون عليها لان لاام ولا اب ..
قررت ابيع البيت واخذ جهالي ونروح يم فارس حتى يكونون يم ابوهم احسن وهو يتحمل مسؤوليتهم بعد. اني تعبت ..
وانعرض البيت للبيع وبدينه نسوي جوازات السفر واخوي حسن ويانه لان اني وحدي مااكدر ومااعرف شي ..
حسن يروح ويانه لعمان ويرتب وضعنه هناك ويرجع ..
اتصل فارس وحجيناله وكال راح يكمل اوراقنه ويقدملنه حتى على مينباع البيع ونطلع لعمان تكون اوراقنه جاهزه ونكدر نسافر باقرب وقت.
محمد وغيداء جانوا فرحانين حيل ممصدكين راح يرحون لامريكا ويشوفون ابوهم .
محمد جان متشوق حيل ومتحمس لشوفة ابوه ،
وغيداء مثل كل البنات تتخيل هناك حريه وتلبس وتكشخ وتكمل دراستها الجامعيه هناك وتصير دكتوره و .....و ...... و......
الى اخر الامنيات.
اما اني فعلى كد مجنت متحمسه وفرحانه راح ارتاح اخيرا وفارس راح يشيل عني الحمل والمسؤوليه على كد مضايجه ومعصور كلبي على فراك خواتي وحسن ونجيه.
خواتي من بعد وفاة امي اني صرت امهن وابوهن اذا سافرت منو الهن وراي ؟؟
ونجيه هالمسكينه مالها غيرنه ..
راح تروح تكعد عد حسن ويه مرته وجهاله دائما جان حسن يتوسل بيها تروح عنده وهي متقبل حتى متخليني وحدي هسه بعد اجه الوقت الي لازم تروح عنده اخوانها وخواتها كلهم توفوا الله يرحمهم مبقالها غيرنه ..
اما ندوه فجانت اكثر شخص مكسور كلبي عليه لان بعد وفاة اولادها كلهم اتعلقت بمحمد وغيداء حيل كل اسبوع تجي تشوفهم او همه يرحولها ..
ورانه محد يبقى يونسها وينسيها ..
وبعنه البيت وخلصنه امورنه وودعت خواتي ..
جانت اخر ليلة النه بالعراق مثل ليلة فراك امي شبعنه بيها بجي اني وخواتي وحسن ونجيه همه يبجون واحنه نبجي.
الي يفارك اهله مجبور عذره وياه بس الي يفاركهم باختياره مثل فارس شلون يتحمل الفراك ؟
نجيه:
سميه هاي امانتج هذا ذهبج ياماما مثل ماانطيتنياه على حطته حتى مفتحته ولاشفته.
سميه:
يمه شتحجين انت هذا مو امانه هذا حلالج مثل ماهو حلالي.
حسن:
متكدر تاخذه يمه خلي عندج لان ممنوع الذهب يطلع بس شي بسيط تكدر تلبسه بس الباقي ممنوع.
