#القفص
#روز_الفياض
#ح١٤
.
.
.
شمـا تغيب مسامحـك وأتأمل تعـود .
.
.
.
فهمت من فارس وضعه المعيشي تعبان هناك العيشه صعبه وغاليه حيل.
حسب كلامه هو يشتغل عامل بمعمل لادوات التجميل.
راتبه جدا قليل يادوب كيفيه فميكدر يسحبنه وياه هسه ..
بعد كلامه هذا حسيت الدنيا ظلمت بوجهي الظاهر مكتوب علي اشيل المسؤوليه بحدي ماارتاح.
مطول اتصاله هواي لان الصوت بعيد وبي صدى.
سد التليفوت على اساس يتصل مره ثانيه بيوم جمعه حتى يحجي ويه محمد وغيداء.
من رجعوا الجهال من المدرسه ولو هم هسه كبار مو جهال.
حجيتلهم وكتلهم ابوهم اتصل فرحوا حيل وبدوا يتناقشون بينهم ويتخيلون امريكا شلون صايره ومن فرحتهم محتارين شنو ياخذون وياهم من ملابس.
ساكته اني واباوع عليهم ماانطاني كلبي اقهرهم واخيب آمالهم اذا اني الجبيره انصدمت وانقهرت شلون همه؟
يوم الجمعه من الصبح اتصل فارس وحجه ويه محمد وغيداء بعدين حجه وياي وحجالي عن وضعه هناك شلون متعب وشلون العيشه صعبه مثل العراق.
واني هم حجيتله شويه عن الاحداث الي صارت بغيابه لان شريد احجي مااكدر اختصر احداث مال سبع سنوات باتصال تليفون ...
عن شنو احجيله ؟
عن الحصار والجوع ؟
عن الايام الي خلانه بيها بدون راتب وراح ؟
بس حسن جان يشتغل ويصرف علينه ويركض ليل ونهار وميكفي ..
احجيله عن الايام الي جنه نغلس على وجبة العشا ؟
لغيناها منين يجيبلنه حسن تلث وجبات يركض عالعيشه وعلى مصاريف الدراسه اله ولجهالي ..
مصاريف المدارس وتعب المدارس ملابس ودفاتر وقرطاسيه وجنط هذا كله مصرف بالكوه جنه مدبرين امورنه ...
ومن اكول لنجيه ابيع ذهبي تتخبل :
صبري الجاي اكثر ..
لتستعجلين رجلج ميرجع وماعليه اعتماد خلي الذهب باجر ابنج يكبر ويريد يتزوج منين تزوجيه وبنتج باجر تدخل للجامعه منين تجيبين مصاريفها.
شحجيله؟
احجيله عن خواته الي طردنه بليلة ظلمه وظلينه كاعدين بالشارع لحد مطلع الصبح ؟
لو احجيله عن ابوي الي سجل البيت باسم فتنه وجهالها عبالك احنه مو جهاله؟
وتالي هم هم شاركونه بالباقي من الورث.
لو احجيله عن الحزب الي يوميه داكين علينه الباب يسألون عنه؟
خليها سكته ...
الجايات هواي ان شاءالله ويجي يوم ويعرف كل شي صار بينه وراه المهم هسه يشوفله طريقه يسحبنه وياه لان تعبت من المسؤوليه وحدي.
مر اسبوع واثنين وفارس بعد مرجع اتصل ..
مر شهر وهم ماكو ..
شهر ونص فاتت يالله رجع اتصل وهالمره جنت متوقعه اتغير من الوضع شي بس:
مااكدر اجيبكم سميه فهمي عاد فلوس ماعدي منين اجيب ابوك؟
انهب؟
سميه :
والحل شنو ؟
لاتكدر ترجع هنا ولاتكدر تاخذنه يمك قابل نبقى هيج؟
فارس :
شلون اجيبكم ؟
وين اكعدكم ؟
منيلي فلوس اشتري بيت اكعدكم بي ؟
وينراد بعد مصاريف ثانيه حتى توصلون هنا؟
سميه :
زين اكولك متكدر تاخذ حصتك من بيت ابوك؟
فارس :
ماتكفي وحتى اذا تكفي هذا بيت ورثه سالفته طويله ياخذ وقت على مينباع لو يتقسم شبيج انت؟
سميه :
شبيه بعد الشكوى لله.
اتحسرت حسره جبيره حسيتها طلعت من نص كلبي.
فارس :
بس حل واحد اكو بس صعب.
سميه:
اي يالله شنو هو؟
فارس :
البيت الهسه كاعدين بي.
سميه:
اي شبي؟
فارس:
تبيعونه وبفلوسه تجون هنا ونشتري بيت ثاني.
سميه:
يااا ...
شبيك فارس نبيع بيتنه ووين نكعد؟
وين نروح؟
فارس:
شحجي صار ساعه تبيعونه وتجون هنا نشتري بفلوسه بيت هنا انتم غير راح تجون هنا بعد شتسوون بذاك البيت.
سميه :
لا فارس لا شلون نبيع بيتنه.
فارس :
ولج هنا نشتري بيت ثاني قابل راح نرجع للعراق بعد هنا راح نبقى طول عمرنه شنسوي راجعين بعد للعراق؟
سميه :
حجيك يخوف.
فارس :
منين خايفه ؟
البيت النشتري هنا هم اخليهم يسجلونه باسمج لاتخافين ..
سميه :
مو هذا قصدي من شوكت اني اشك بيك قابل ..
فارس :
لاميخالف ام محمد هذا حقج وورثج من ابوج واني مااريد شي يدخل بذمتي لو دينار واحد هم مااقبل ..
اني تره بطلت الشرب من زماان من رحت للسعوديه وملتزم بصلاتي الحمدلله ومااريد اشيل ذنبج.
سميه :
ياا صلاوات على محمد صدك بطلت تشرب ؟
والله هذا احلى خبر جنت شايله هم خاف من نروح يمك محمد يشوفك تشرب وهو هم يظل يشرب.
تعرف مرات الولد يقلد ابوه.
فارس:
اي صحيح ..
بس خلص بعد تبنه توبه نصوحه الحمدلله كبرنه بعد هذاك الحجي قبل من جنه زغار بعدنه شباب ومانفتهم بس هسه الحمدلله.
سميه:
اي الحمدلله الله يفرح كلبك مثل مفرحتني.
فارس:
المهم هسه فكري بموضوع البيت ورجعيلي خبر حتى اكدر اتحرك واتصرف واعرف شلون ادبر الامور ومنين ابدي.
سميه:
الله كريم ان شاءالله خير.
سديت التليفون وبدت الصفنات تاخذني وحده وتهدني للثانيه.
شلون ابيع البيت بيتي وبيت جهالي ؟؟
خاف ابيعه وتالي منكدر نطلع ووين نروح؟
وخاف ماابيعه ونبقى هنا وحدنه اني بدون زوج وجهالي بدون اب يعني نبقى بدون رجال ؟؟
شلون بينه؟
هو ميكدر يرجع بعد جذب وشيرجعه يعوف امريكا ويجي للموت برجليه؟
اوووف يالتفكير اني ناقصه تفكير..
وهم ياريت من افكر اطلع بنتيجه.
حجيت لنجيه :
والله يايمه ماادري سالفه صعبه واني ماافهم بهيج سوالف سألي حسن احسن مني ومنج.
وفعلا سألت حسن..
.
.
.
وجبراً مِنكَ يالله يُزيل كُلَ هذا الثُقل .
.
.
.
لايك وتعليق وعشر ملصقات فضلا
