#القفص
#روز_الفياض
#ح٢٥
.
.
.
مهما رمت الحياة أثقالها على عاتقك ،
إعلم أن الله لن يُكلف نفساً الا وسعها وإطمئن .
.
.
ومن ثاني يوم مشينه بأجراءات الطلاك وروح وتعال وسين وجيم اخذ الموضوع شهرين واتصل نزار بحسن بشره.
حسن:
ام محمد اريد البشاره.
سميه:
ياالله خير.
حسن:
خلص صرتي حره.
ماادري شنو حسيت بلحضتها هو فرح هو حزن هي صدمه هي حريه ..
بس محجيت شي عفتهم ودخلت ..
دخلت للغرفه وسديت الباب واخذتلي بجيه على حظي بهيج عمر واتطلك شكد عيب شتكول عني الناس ، وغيداء خطيه باجر من تتزوج ويسالون على اهلها يكولولهم امها اتطلكت من ابوها ..
اووف ياربي مااعرف شتصرف بعد بس اعرف اني عليك متوكله مالي غيرك يحميني ويحمي جهالي ويكيفنه شر الناس وشر الحاجة للناس ..
بعدين ارتاحيت وفكرت اني ليش ابجي ومستحيه ؟؟
اني مسويت اي شي غلط ..
حتى خوات فارس من عرفن بموضوع الطلاك وعرفن بالي سواه بيه وبجهاله اجن بنفسهن لبيت حسن وشجعني عالطلاك ..
لان ماكو انسان حتى لو عدو يقبل اب يذب اولاده بالشارع علمود هو يعيش ويتونس ..
وراها باسبوعين هم اجه نزار اني ماادري جنت اسبح ومن طلعت لكيته رايح ..
بالليل حسن اجه لغرفة امي نجيه.
حسن:
غيداء روحي خالو شويه يم خالتج ساعديها ..
نجيه:
تعال ماما تعال حياك ..
حسن:
سميه اريد احجي وياج بفد شي كدام امي.
نجيه:
اني محجيت شي ولاكولتلها اي شي اعرفها اختك راسها يابس.
سميه:
شبيكم ؟؟
شكو ؟؟
محمد مسوي شي ؟؟
نجيه :
على كيفج .. محد مسوي شي ..
سميه :
شكو ؟؟
حسن:
ابو يسر باجر يسافر.
سميه:
اي كتولي الله وياه هسه اكوم اخابره واتشكر منه.
حسن:
اول اسمعي شكال ..
سميه:
شكال ؟؟!!
حسن:
والله ماادري شكول يمه انت احجي اني مااعرف شلون احاجيها.
سميه:
ياا شبيكم خوفتوني؟
فارس مسوي للرجال شي ؟؟
طلع حسن وامي نجيه كالت:
كعدي ماما كعدي لتخافين ..
كعدت على اعصابي ..
نجيه :
سميه ماما هالرجال هذا خطبج من اخوج ومني ..
عبالي ماسمعتها صح ظليت صافنه بعدين سألتها حتى اتأكد سمعتها صح :
منو خطبني ؟
منو قصدج ؟؟
نزار ؟!!
نجيه :
اي نزار ..
من الصدمه معرفت احجي رغم جنت مرات احس عينه مني واحسه مرات يلمح بس متوصل للخطوبه والزواج !!!
