#القفص
#روز_الفياض
#ح٧
.
.
.
- وجبراً مِنكَ يالله يُزيل كُلَ هذا الثُقل .
.
.
.
باجر زواج خالده اختي ..
فارس انطاني فلوس اشتريت بوقتها كوستم تنوره وقميص ومن السوك وجنت فرحانه طايره مشتريه وكاشخه عبالك اول مره اشتري معبالك اني الجنت كل بنات المنطقة والاقارب يغارن مني ومن كشختي ..
بس من اتزوجت فارس نسيت الكشخه واللبس والاهتمام بالنفس والتهيت والكنس والمسح والطبخ ...
المهم رحت للصالون ميشت شعري وحفيت ورجعت للبيت المغرب ..
فارس يدري وعنده علم اني راح اتأخر لان لازم اهتم بخواتي هم مو بس بنفسي ..
جنت ماخذه وياي نهال وناديه اشتريتلهم كل وحده حذاء لباجر،ومن خلصنه ذبيتهم على بيت اهلي ورحت للصالون خلصت كل اموري ورجعت ..
من رجعت للبيت طبيت لكيت عمتي كاعده اباب المطبخ هي وبناتها.
تاركات البيت كله وكاعدات يم عتبة الباب مالت المطبخ ..
بس شفتها انغثيت ادري بيها تريد تسمعني موشح وتنغص علي فرحتي ..
سلمت ودخلت بدون مااباوعلهن او اخذ وانطي وياهن حتى اتكفى الشر ..
سمية :
السلام عليكم ..
عمتي:
لاسلمج الله كون ..
وين جنتي دايحه لهسه؟
التفتت عليها كتلها واني متعجبه من الهجوم المباشر رغم متوقعته :
وين جنت دايحه ؟
جنت اشتري ملابس ومريت للصالون غير باجر زواج خالده .
عمتي:
ايباااخ زواج خالده على اساس مدري منو متزوجه خالده ومشتريه ملابس ترحين بعرسها ...
كله واحد حافي ومنتف سمع ابوها عده جم فلس .
سميه:
عيب هالحجي عمه شنو حافي منتف شعرفتي عنه ؟
عمتي:
عابت لهالحلك الاعوج تعلمنيني شنو العيب انت؟
سميه :
لا حشاج .
عفتها ودخلت لغرفتي نزعت ملابسي لبست دشداشتي ووكفت شويه كبال المرايه اباوع لشكلي شكد متغيره اني الجنت اربعه وعشرين ساعه مصبغه الاظافر ومسشوره الشعر حتى الماعين امي مجانت تقبل اغسلهن تكلي اظافرج حرامات.
هسه صرت جني عجوز حتى شعري الي جان شطوله وكل اسبوع امي جانت تحنيه هسه صاير مهلس من ماتت امي لليوم مشفت الحنه.
عشتوا ميشته بلكي شكلي يتغير.
دخلت ندوه بت عمتي وكفت كبالي تباوع بعدين صاحت:
يمه بت اخوج اميشه شعرها.
عمتي :
خوت عظامها ان شاءالله بت اخوي .
اتنهدت كل حجايه منها احسها بسمار بروحي يندك ..
ياربي عمر ويخلص ويه هيجي بشر شيخلصه ؟
ندوه :
خو بدل متفرفرين بالسواكه روحي للطبيب شوفي شبيج متحبلين ..
وراج اتزوجن وخلفن وانت بعدج عاجر.
