فارقتنا الحياة

الجزء 6

وصلنا للمطار نزلنا الأمتعة تاعنا عطيناهم للمسؤولين باش يطلعوهم للطيارة و فاش سالينا الإجراءات طلعنا كل واحد شد بلاصتو جلسنا أنا و أيوب حدا بعضنا عاود، الطريق كلها و حنا تنهضرو محسيناش بالوقت كيفاش داز حتا تيقولو لينا را وصلتو، غير نزلنا الله على جو شحال زوين، لقينا جوج حافلات صغار تيتسناونا ركبنا فيهم و مشينا للبلاصة فين ساكنين، كانت فحال شي مؤسسة كبيرة فيها جناحات كل جناح فيه غرف و حمامات مشتركة و فالوسط كاينة جردة كبيرة و السقايات فالوسط، هدشي اللي بان ليا فاش يالاه دخلت، الله داك مكان تيشرح النفس، الخضورة و كلشي نقي و مقاد كلشي مزال جديد الصراحة عجبني الحال، مشينا للإدارة باش نستلمو المفاتيح و أنا عيني كتقلب على وئام فين غادي تكون، طحت عليها جاية لجيهتي و هي مزال كاعما شافتني تدور راسها من هنا لهيه يمكن حتا هي تتقلب عليا، عيطت عليها و أنا غادية لجيهتها : وئاااام، شافتني و جات تتجري تعانقنا و جلسنا نتباوسو و نتحابو فالساحة و بنادم تيشوف و حنا كاعما مسوقين كنا موحشين بعضنا آش غنديرو ،
وئام : شوفي هاوا الساروت تاع الشومبغ و لكن لقيتهم قاسمينا خصنا نمشيو نهضرو معاهم يجمعونا بزوج فغرفة وحدة
انا : صافي زيدي نقولوها ليه من دبا
مشينا عند المؤطر هضرنا معاه و صدمنا فاش قال لينا راهم مقسمين على حسب الأعمار و ماشي حتا فالغرفة حتا فالانشطة و فالماكلة و كلشي، دايرين من 10 سنين ل 15 بوحدهم و من 16 ل 18 مع بعض و 19 و 21 مجموعة أخرى، ولكن ميمكنش حنا بيناتنا غير عام انا عندي 15 و هي 16، طلبناه يجمعنا و هو قال لينا ميمكنش التقسيم هو هذا، بففف شديت شومبغ مع جوج بنات كنت ساخطة على الوضع كلشي دكشي اللي مخططين ليه مشا فالزيرو، تغذينا و ستفو هوما حوايجهم أنا مقست والو خليت كل حاجة فبلاصتها، دوزت ديك الليلة نعست و الغد مشيت عند المدير طلبتو يعطيني نهضر مع بابا، صونيت ليه و أنا شاداني البكية عاودت ليه كلشي و قاليا نعطيه يهضر مع المدير، ساعة و هوما تيهضرو فاش سالا معاه قاليا
المدير : المهم واخا مامسموحش لينا نحولو حتا واحد ولكن غادي نديرو اسثناء خاص و نحولوك معاها
من الفرحة طرت عليه عنقتو قفزتو مسكين من بلاصتو هههه، مشيت تنجري عند وئام قلتها ليها كانت فرحانة كثر مني، تجمعنا فشومبغ وحدة و كانت معانا واحد البنت سميتها نهلة، لقيت وئام ستفات حوايجها فالبلاكار و قادات بلاصتها، حليت ديك الفاليزا بديت تنقلب فالحوايج و أنا نتصدم
انا : اويلي شنو هاد الحوايج
وئام : مالكي مالهم
انا : خليت ماما تجمع ليا حوايجي شوفي شنو حطات ليا، هاويلي على شوهتي شنو غندير دبا
جبدات وئام الحوايج تتشوفهم حمقوها جاوها من ستيلها، كساوي و سراول جينز و تريكويات معريين و مايووات تاع العومان و أنا متنلبس حتا حاجة من هدشي، ماما باغا تردني بنت بالسيف، خرجت خليتها تستف ليا حوايجي و مشيت ندور فالسكن خصني نعرف كاع القنات اللي فيه راني فضولية شوية، مطعم كبير و مقصف، قاعة تاع الألعاب و ملاعب تاع الرياضة، مسابح و حمامات سباحة، و احلى حاجة فيه هي المكتبة واخا ما كانتش كبيرة بزاف و لكن كانت زوينة عجبوني الكتب اللي فيها، جلست تنقلب فالكتب اللي كاينين تنقرا العناوين و متحمسة ليهم حتا قفزني واحد الصوت جا من ورايا
هو : عرفتك غادي تكوني هنا
طاحو الكتوبة من يدي قفزني ضرت لقيتو غير أيوب
أنا : خلعتيني ماشي حشومة عليك
أيوب : مقصدتش نخلعك je m'excuse
انا : معليش
أيوب : من الصباح و أنا تنقلب عليك
انا : و علاش بالسلامة؟
أيوب : عادي ياك حنا أصدقاء ولا لا؟
أنا : هههه مزال معرفت و أنا را فيا الجوع بغيت ناكل
أيوب : وا را الناس كلاو و سالاو
أنا : لا ميمكنش واش بصح؟
أيوب : آه، و متبقايش دوري هكا بوحدك را وزعو علينا جدول الأنشطة بالتوقيت سيري خوديه من الإدارة، و قراي حتا القانون الداخلي تاع المخيم
انا : صافي انا غنمشي
خليت أيوب و مشيت للإدارة خديتو و رجعت للشومبغ لقيت حويجاتي مستفين مقادين الله شحال زوينة، تلاحيت فوق الناموسية بانت ليا واحد الورقة مطوية فوق الطبلة هزيتها لقيت فيها الأنشطة اللي غادي يدارو فثلاثة أيام، جلست تنقرا داك الشي الصراحة هدشي زوين و ممتع، كاين أنشطة مفرقة يعني عندك الإختيار إما دير هادي و لا هادي، سمعت الساروت تيدور فالباب دخلات وئام قالت اوووف أمل حتا هي، عاد شافتني و قالت
وئام : أنت هنا، و أنا من الصباح تنقلب عليك فين طرتي
انا : غير كنت تندور هنا و صافي
وئام : اوووف منك أنا كنت باغا نمشيو زعما بجوجنا نشوفو البلايص كلهم ساعا انت درتي غير اللي فراسك
أنا : صافي معليش نعاودو نمشيو
وئام : شدي شدي كولي متبقايش بالجوع
مدات ليا سندويش تاع الكفتة و قرعة تاع العصير
وئام : را هزيت هدشي غير بالتخبية حشمت نخليك بالجوع أما كوراكي تتموتي دبا
أنا : هههه شوووكران انا عارفاني عزيزة عليك و تتفكري فيا متخلينيش نبقا بالجوع
وئام : وا متغريش كولي و يالاه