فارقتنا الحياة

الجزء 28

كلنا ضرنا، كان باين غير الخيال ديالو مع الظلام، طويل جاي لجيهتنا و تيتسمع صوت خطواتو و هو تيقرب حتا وقف معرفتوش شكون، كانت شي حاجة تتلمع فعنقو، يمكن سنسلة معرفتش، فاش وقف كلهم بعدو، و قال بفرنسية طليقة
الشاب : شنو واقع هنا؟
شاف فيه داك الدري اللي صرفقتو و مجاوبش، كلهم سكتو و بقاو غير تيشوفو، دار عندي سولني
الشاب : ياكما تقسحتي؟
انا : لا
وقفت نفضت حوايجي و هزيت صاكي باش نمشي حتا قاليا
الشاب : الا بغيتي ديكلاري نمشي معاك را المخفر قريب
انا مكنتش باغا نجبد المشاكل مع حتا واحد دكشي باش قلت ليه لا،
الشاب : هاد المرة موقع والو و لكن مرة اخرى حسابكم ايكون معايا
شافيا داك الزعر اللي صرفقتو و قال : حسابي معاك تال من بعد
دارو مشاو فحالهم و مشيت حتا انا فحالي حتا وصلت للدار فاش بغيت ندخل بانلي شي خيال واقف من بعيد مراقبني غير شافني تنشوف جيهتو هو يضور بالزربة و مشا....
دخلت للدار استقبلاتني وئام فحال ديما
وئام : أمل فين تعطلتي
أنا : غير طريق
وئام : واش تلفتي
انا : لا غير بقيت جايا بشوية
وئام : ياكما وقعات ليك شي حاجة و مباغاش تقولي
انا : اشغيوقع الله يهديك، مهم انا طالعة نعس بلا متفيقوني للعشاء
وئام : واخا
سديت الباب عليا و تلاحيت فبلاصتي، بقيت تنشوف فالسقف و سرحت فأفكاري، بقيت تندور شنو وقع فراسي، فالأحداث اللي وقعو هاد النهار، منين قريت فالصباح حتا الجلسة ديالي تحت الشجرة حتا تعرضولي هدوك حتا حاما عليا داك الولد حتا دخلت للدار، حسيت بالنهار داز بالزربة و وقعو فيه أحداث بزاف، بقيت تنفكر فشنو وقع، علاش زعما دارو معايا هكاك؟ واش حيت مسلمة؟ ولا حيت دايرة الحجاب؟ ولا موالفين تيتعاملو مع كلشي هكا؟ و شكون داك دري اللي حاما عليا؟ يكون زعما هو اللي تبعني حتال الدار؟ بقيت تنقول يمكن كان باغي يطمأن عليا حتا نوصل، ولا ربما ساكن قريب من هنا، يقدر يكون باغي غير يتقرب مني و يجذبني ليه بديك الطريقة، و لكن هو ما بايناش فيه من داك النوع جاني حاس براسو و عاجباه نفسو معرفتش علاش، شكون قالي اصلا راه هو اللي كان تابعني، يمكن يكون شي شخص اخر ولا يكون غير جابلي الله، ولكن عجبني التصرف اللي دار و كيفاش حاما عليا، بديت تنألف سيناريو تاع قصة حب كيفاش انتلاقاو بالصدفة شي مرة اخرى و نهضرو و نوليو اصدقاء و نبغيو بعضنا و فالاخير نتزوجو و تخيلت راسي تنعاود لولادي على قصة حبنا الخالدة و كيفاش باباهم كان راجل و وفا بوعدو معايا حتا  تفكرت أيوب اللي كان تيبان ليا فحال الملاك، فالأخير صدق شيطان فصيفة بنادم، و فيقت راسي من الگلبة، ديما ماما تتقولي دوك الروايات هوما اللي تيخليوك تحلمي بزاف، ولكن را بصح اي حاجة تتوقع تنألف منها سيناريو تاع شي قصة و نعيش فيها بحالا بصح ههههه، مي مؤخرا عرفت بأن الثقة عمرها تكون، خصوصا فدراري، كلهم تيبانو زوينين فاللول، و زايدون انا درت على دكشي كروا حمرة غلطة و ما باقاش نخلي شي دري يتقرب ليا.......
الغد فاش سالات الحصة تاع 16:00 مشيت انا و آيزل لواحد المقهى خدينا گلاص و جلسنا تنهضرو، قررت نسولها
انا : آيزل نسولك
آيزل : وي بالطبع سولي
انا : واحد جوج بنات تيكونو مع جوج دراري، واحد فيهم زعر و داير حلقة فودنو ديما تيبانو ليا مجموعين، واش تتعرفيهم
آيزل : واش داك اللي عندو وشام فيدو؟
اتا : اه
آيزل : آه آه و شكون ميعرفهمش، را مشهورين فالجامعة كلها، فوقما تيجي شي واحد جديد متيعجبهمش تيخرجوها منو....
انا : فحالاش؟
آيزل : واحد البنت كانت جات من سويسرا تقرا هنا، كانت زوينة بزاف، و صحبت داك الزعر غارت منها حيت خدات منها الانظار، هو داك صاحبو لاخر تصاحب معاها و خرج عليها شي تصاور وليتي فينما تمشي تلقاي تصاورها، شوهوها مزيان، فالاخير سمحات فقرايتها و كلشي و رجعات لسويسرا، و ماشي غير هي كاينين بزاف فحالها، كلشي عارفهم شنو تيديرو و المشكلة معمرهم حصلو،
انا : هدشي خطير بزاف، و علاش ما شكاوش بيهم فالبوليس ولا شي حاجة؟
آيزل : شكون يقدر؟ عائلاتهم معروفين بزاف و أصلا ما كاينش شي دليل على دكشي اللي تيديرو، حتا واحد ميتجرأ يواجههم، دكشي باش تيعطيوهم تيقار و صافي،
انا : امممم فهمت
آيزل : و علاش تتسولي ياكما دارو ليك شي حاجة؟
انا : لالا غير سولت و صافي
آيزل : شوفي الا كانت شي حاجة قوليلي،
انا : نو مكاين والو
آيزل : ايوا نتمنى يكون كيفما قلتي، غير  توقعي يوقعو ليك مشاكل يا معاهم يا مع غيرهم، بالطبع نتمناو ميوقع والو مي فجميع الاحوال انا معاك
انا : لهلا يخطيك عليا و خلاص
آيزل : يا لاه نوضو؟
انا : واخا
بقا كلامها تيدور ليا فراسي، زعما يكونو حطو عليا العين و باغين يديرو ليا فحالي تيديرو لاخرين؟ حسيت بالخوف خصوصا فاش تفكرت التصرفيقة اللي عطيتها لهذاك الزعر، و آخر هضرة قال "حسابي معاك تال من بعد" باينة ايكون حقد عليا بسبب دكشي و ناوي ينتقم، خفت بزاف، ديك البنت غير خدات الانظار من صحبتو و شوف اش دارو ليها ما عساك انا اللي ضربتو.......