فارقتنا الحياة

الجزء 23

داك النهار كنا جالسين حتا صونا ليا أيوب، انا : آلو فينك قالي انا فواحد البواط قريبة مقصر مع الدراري آش بان ليك تجي نشطو شوية، حتا انا مكنتش من العاكزين قلت ليه هي اللي متعاودش، ديك الساعة قلتها للبنات باش يمشيو معايا حيت ميمكنليش نمشي بوحدي ووالديا ميبغيوش، لبسنا أنا و البنات و مشينا للبلاصة فين انتلاقاو وقف علينا أيوب بالطونوبيل طلعنا و مشينا للبواط كانت عامرة شوية و الموسيقى مطلوقة بالجهد و شي تيشطح شي تيغني شي تيشرب، شدينا بلاصة كانو ثلاثة صحابو اخرين تما بقاو هوما تيهضرو معاهم و أنا تنهضر مع أيوب، شوية خرج باش يهضر فالتلفون على برا و انا شفت الكاس اللي كان تيشرب فيه هزيت شفت فيه و دقت منو شوية جاني مر و فيه شي مذاق فشكل وخا هكاك عجبني هبطت عليه كامل، جا أيوب جلس تيقلب على كاسو ما لقاهش دار شاف فيا
أيوب : فين مشا كاسي؟
دارو كلهم لعندي و أنا تنضحك
أيوب : ياكما شربتيه؟
أنا : ههههه فيه شي مذاق فشكل ولكن زوين
أيوب : اويلي را الشراب هذاك دبا تبوقي لينا هنا،
أنا حسيت براسي بديت تندوخ بقيت غير تنضحك و عيني تقلبو خديت الشيشة جلست تنشيش و تنضحك غا راسي و تندخل و نخرج فالهضرة و البنات تيضحكو، المهم طلعات معايا التبويقة مزيان رجلي ما بقاوش هازيني مع أول مرة غادي نشرب صافي دخت هوما هزوني داوني للطونوبيل و رجعنا للدار دخلنا بشوية باش ميشوفونيش فديك الحال غير حطوني على الفراش نعست ما فقت تال الغد راسي ضارني و عيني مسدودين مشيت للكوزينة صايبت ليا قهيوة هي باش نبدا نهاري شربتها عاد وليت شوية، كنت فايقة معطلة مفطرتش حتا حطو الغذا تغديت معاهم و مور العصر خرجت مع ايوب تفكرنا شنو وقع ليا لبارح و بقينا تنضحكو، الليل عاود مشينا قصرنا فالبواط ما كاين غير الشطيح و النشاط التفرويح تاع بصح، المهم دوزنا أيام زاهية كنت فرحانة بزاف معاهم .
حتا جا داك النهار المنحوس اللي حياتي كلها و أنا نادمة عليه، لبست فيه كسوة كحلة محلولة شوية من الصدر و قصيرة و طلقت شعري كيفما تيعجب أيوب صايبت مكياج زوين و هزيت صاكي و خرجت باش نتلاقاه، تسالمنا بلابيز و بقينا تندورو على رجلينا كانت العشية و ما كانش جايب معاه الطونوبيل، بقينا تنتمشاو و أنا ضبرني الطالون فرجلي
أنا : أيوب الصباط ضرني بزاف مبقيتش قادرة نمشي
أيوب : أح ضبرك فرجليك، شنو نديرو دبا؟
أنا : معرفتش و لكن منقدرش نتمشا بيه هكا
أيوب : آش بان ليك نمشيو للدار فين مخيم مع الدراري هايا غير قريبة نشوف ليك شي حاجة مريحة تلبسيها و ندي الطونوبيل معايا نيت حتا انا عييت من الدوران على رجلي
أنا : صافي واخا
هي هديك مشينا للدار بالفعل كانت قريبة دور الساروت فالباب تحلات و دخلنا ما كانوش صحابو كان كلشي خارج، كانت الدار سامبل و زوينة فيها سيجور و شي بيوت و كوزينة زوينة، كانت الدار مفرشة مزيان و الديكور تاعها زوين، جلست فوق الفوطوي و هو مشا تيبقشش حتا جا هاز فيديه واحد البالغين غوز فاتح
أنا : تاع من هذا منين جبتيه؟
أيوب : تاع صاحبت أنور لبسيه شوفي واش يجيك
أنا : ويلي لا تاع البنت
أيوب : واغا هزي ما غادي تقول والو
انا : متأكد؟
أيوب : وي والله
انا : واخا
لبستو جاني هو هداك بقيت تندور بيه عجبني،
أيوب : فيك الجوع؟
أنا : من الفطور ما كليت
أيوب : و مالك على حالتك؟
أنا : قلت حتا نخرجو و ندوزو ناكلو فشي بلاصة
أيوب : ايوا جينا جينا اناكلو عاد نخرجو
أنا : كاين شي ما يتكال بعدا؟
أيوب : إلا ما كانش نطيبو، ياك تتعرفي بعدا
انا : تنعرف نصايب اومليط
أيوب : لا و لكن واش منيتك؟ اومليط را أي واحد تيعرف لو
انا : هذا جهدي
أيوب : هي فاش غنتزوجو غنموت غا بالجوع
انا : لا منخليش حبيبي بالجوع
أيوب : حبيبي خارجة من فمك بحال العسل
أنا : إيوا متحلش غير ضحكنا معاك
أيوب : خايبة نتيا
أنا : عويناتك
أيوب : ههههه وا گفضي و زيدي ندخلو للكوزينة نصايبو شي ما يتكال
أنا : شنو نصايبو؟
أيوب : شنو بغيتي؟
أنا : نصايبو les pattes ؟
أيوب : انشوف واش كاينين.....امممم هاهوما
أنا : yes يالاه زيد
بقينا تنصايبو دكشي كل واحد فينا تيدير حاجة مرة نغزو من هنا مرة من لهيه هو مرة يجبدني من شعري مرة يهرني مرة يضربني بالضحك، ما صايبنا دكشي حتا ردينا ديك الكوزينة فحالا ضاربها إعصار، حطينا دكشي فطبسيل و حطينا المونادا و العصير و جلسنا تناكلو
أنا : اممممم هدشي بنيييين
أيوب : والله حتا بصح كاعما كنت عوال تصدق شي حاجة، وا هانتي طلعات لينا الربحة هاد المرة
أنا : حنا واعرين حنا
أيوب : وا كولي و قيسي لا تمشي تغلاضي و نصدق واحل فيك
انا (حبست من الماكلة و شفت فيه) : أيوب
أيوب : نعام
أنا : إلا غلاضيت اتبقا تبغيني
أيوب : يا الهبيلة أنا را نبقا نبغيك واخا يوقع اللي يوقع، أنت غتبقاي هي أنت شنوما كان و مكانتك فقلبي عمرها تغير نهار على نهار غير تتزاد
أنا : يخليك ليلي، اصلا شبعت يالاه نمشيو دبا