فارقتنا الحياة

الجزء 27

الله على صباح شحال زوين
نضت من فراشي حليت الشرجم و بقيت تنتأمل فالخضورة اللي قدامي و المنازل اللي مسقفة بالقرميد و السما الصافية و العصافير اللي بنات عشها على شجرة الليمون فالجردة، كان حبيبي فالجردة تيسقي العشب شافني لوحلي بيدو و انا كذلك، جمعت فراشي و دخلت للدوش دوشت و لبست و نزلت باش نفطر، لقيت وئام فالكوزينة هي و عمتي تيوجدو الفطور، صايبت العصير و خرجنا دكشي للجردة نفطرو تما، كلينا فجو زوين و طلعنا نلبسو حوايجنا، ليوم غادي نمشي نتسجل فالجامعة و نبدا أول خطوة فتحقيق حلمي،
وئام : المستقبل ينادي هيااااا
انا : متحمسة بزااااف
وئام : انا اكثر منك
انا : ضروري تكوني اكثر مني فكلشي
وئام : نو هههه مهم يالاهي قبل منتعطلو
انا : هيا بنا
وصلنا للجامعة، جامعة بروكسل الحرة، من أشهر الجامعات فبلجيكا، بهرني جمال المعمار فيها، كانت كبيرة بزاف، و فيها بزاف الكليات، فجميع التخصصات، بقينا تنتمشاو فالساحة الكبيرة حتا وصلنا للادارة، كملت اجراءات التسجيل و خليت عمي تيهضر مع شي اساتذة تما و داتني وئام تساريني فيها، وراتني الكلية فاش تتقرا، كلية الفنون، كانت عندها السنة الثانية هاد العام، كانت موهوبة بصح فالرسم و الزخرفة، شفت حتا الكلية ديالي، وقفات مع شي بنات صحاباتها سلمنا عليهم و كملنا المسارية و رجعنا للدار بدلنا حوايجنا و جلسنا تنتعاودو فحال ديما.....
دازو شي ايام و بدات الدراسة الفعلية، كنت دايرة ساك آدو على ضهري و لابسة جيب طويلة و شوميز و عاملة حجابي، ولفتو دغيا و مبقيتش تنحس براسي غريبة بيه على العكس، حطنا الشيفور قدام الباب نزلنا وصلاتني وئام للقاعة تاع الدرس و باستني و مشات كانت باغا تبقا معايا ولكن غادي تعطل، كنت متوثرة بزاف قابطة فصاكي و واقفة فواحد القنت تنشوف فبنادم، شفتهم بداو تيدخلو للقاعة دخلت حتا انا بانتلي بلاصة خاوية مشيت جلست فيها حتا وقفات عليا واحد البنت، بقات تتشوف فيا و انا نبتسم يسحابلي غير باغا تهضر و صافي و لكن بانتلي مخنزرة مطلعة حاجب و منزلة لاخر معرفتها شنو بغات
البنت (الحوار بالفرنسية) : نوضي را بلاصتي هادي شوفي ليك شي قنت اخر
انا بقيت غير تنشوف فيها و هي رجعات قالت
البنت : واش مكتفهميش الهضرة، قلت ليك بلاصتي
انا مبغيت نجبد لا صداع لا والو هزيت صاكي و رجعت لور حيت بانلي حتا حد ما باغيني نجلس حداه، ربعت فبلاصتي و بقيت متبعة مع لبروف حتا سالات الحصة خرجت لقيت وئام تتسناني
وئام : ايوا الزين كيف داز اول نهار؟
انا : عادي
وئام : ياكما برزطك شي واحد؟
انا : لا لا
وئام : را كاينين شي وحدين هنا باسلين و حاسين براسهم من الاحسن تبعدي منهم و حاولي متحكيش معاهم بزاف، شوفي انا نعرفك على واحد البنت راها خت صحبتي حتا هي نفس التخصص ديالك، راها ضريفة بزاف تنظن غتفاهمي انت و ياها
انا : امممم واخا
جلسنا فالبوفيت تاع الجامعة عرفاتني وئام على ديك البنت هي مغربية و ماماها بلجيكية سميتها صفية كانت ضريفة فرحت حيت و اخيرا لقيت شي حد نتفاهم معاه، و عرفاتني على شي بنات اخرين حتا هوما ضريفات، ولات صحبتي تنتوانسو فالطريق و فالقراية و زدنا تعارفنا أكثر تلاقيت بعائلتها والديها و خوها الصغير و ولينا تنمشيو عند بعضياتنا و شي مرات تتجي تبات معانا فالدار هي و آيزل تندوزو ليلة زوينة بزاف، كنت كل ليلة تنهضر مع ماما و بابا و خوتي فسكايب، هكا كانو ايامي بديت تنسجم فالجو و عجباتني القراية هنا و العيشة مع حبيبي و عميتو و وئام......حتال داك نهار، كانت عندي حصة فالعشية، وئام مكانتش قارية ممشاتش و صفية كان فيها لوجع بقيت بوحدي، فاش ساليت الحصة مشيت جلست تحت واحد الشجرة تنتصنت للموسيقى و تنكتب بعض الخواطر، كانت عزيزة عليا الكتابة الى جانب حبي للمطالعة، حاجة طبيعية، بقيت حتا غربات الشمس و شعلو الاضواء، محسيتش بالوقت كيفاش داز بهاد السرعة، نضت باش نمشي فحالي، خرجت من الباب اللوراني حتا تنتفاجأ بواحد جوج  بنات و جوج ولاد واقفين عليا مخلاونيش ندوز، قدرت نميز وجوههم حيت كانو مقابلين مع الضو، وحدة فدوك البنات سبقلي شفتها، بقيت ساكتة تنتسناهم شنو ايديرو، قرباتلي وحدا فيهم و دفعاتني، "دبا هادي شنو بغات؟ انا جاية باش نقرا ماشي باش نجبد صداع، و لكن هي اللي جبداتني ميمكنليش نسكت لهدشي" قلت هكا مع راسي خنزرت فيها و لكن قررت نتفادى صداع و نمشي فحالي، حتا قبطلي واحد الدري فيدي و جرني بجهد محسيت براسي حتا صرفقتو بلا منشعر، شهقات البنت و حطات يدها على فمها و هو دفعني حتا طحت، انا بصح كنت خايفة معرفت كيفاش نتصرف و لكن مبغيتش نبين ليهم، معرفتش حتا شنو بغاو مني بالضبط، هز يديه داك الدري باش يضربني ما وقفو غا صوت شي حد من ورانا.........