فارقتنا الحياة

الجزء 7

كليت دكشي الله شحال كان بنين، و مشينا التحقنا بالمجموعة، عطاونا فسحة نديرو فيها اللي بغينا مشينا انا و وئام تندورو عاود حتا طاح الظلام، مشينا المطعم كلينا عشانا و تجمعنا فقاعة الأنشطة، كان فيها كلشي قاعة تاع الكراوكي و الگولفازير و طاولات الشطرنج و ورشة صغيرة تاع الرسم و ألعاب إلكترونية، مشيت أنا ووئام شديت طبلة و جلسنا تنلعبو الشطرنج انا و ياها، كنا بجوجاتنا واعرين الطرح طوال و دخلنا الحماس، جا أيوب وقف حدانا تيتفرج و جاو معاه شي صحابو حتا هوما تيشوفو و حنا فينا روح المنافسة كل وحدة باغيا تربح، خوات الرقعة من القطع بقا غير الملك و الوزير ديالي و الملك ديالها، échec et mort، طرق، كليت ليها الملك ديالها
انا : yeeees ربحتك
بدا كلشي تيصفق درنا لقينا كلشي مجموع فينا جالس تيتفرج حنا كاعما انتبهنا ليهم،
أيوب : تبارك الله عليك راكي واعرة مع راسك
انا : هههه شوية و صافي
أيوب : ولكن متقدريش تغلبيني
انا : واثق من راسك
أيوب : نلعبو شي طرح؟
أنا : زيد
عاود رتبنا القطع و بديت تنلعب انا و أيوب واخا كنت متوترة شوية حيت كان كلشي تيشوف فيا، داز الوقت و حنا تنلعبو فالاخير غلبني، أنا ما رضيتش حيت أنا كنت ديما تنغلب أي واحد تنلعب معاه حتا من بابا تنربحو، ولكن هانا دبا خسرت،
أيوب : شفتي قلتها ليك
أنا الصراحة معجبنيش الحال قلت ليه مبروك و جريت وئام مشينا للشومبغ
وئام : علاش جايبانا دبا أنا مزال باغا نبقا
طلقت منها و قلت
انا : اذا بغيتي ترجعي سيري حتا واحد ما منعك
وئام : واش تقلقتي حيت مربحتيش اصحبتي؟ عادي را هذا هو اللعب
انا : ماشي حيت مربحتش، ولكن حيت هو غلبني
وئام : را نفسها،
أنا : لا
وئام : را هذا هو اللعب ماشي ديما تنفوزو خصكي تقبلي الخسارة
انا : نتقبلها فأي حاجة إلا فالشطرنج
وئام : هههه وا صافي ما وقع والو دبا، مرة أخرى لعبو و غلبيه، ولكن قوليلي واش أنت تتعرفيه ولا غير جا لعب و صافي؟
أنا : كان جالس حدايا فالكار و تما تعارفنا
وئام : هاي هاي هاي وا مبقيتيش سويهلة حتا أنت
أنا (غوبشت فيها) : وئام أنت عارفاني كيفاش دايرة
وئام : غير قلت و صافي
شديناها هضرة حتال 12 و نعسنا حيت الغد غادي نهبطو للبحر.....الصباح فطرنا و رجعنا للشومبر نبدلو حوايجنا، انا منين جيت و أنا بنفس الحوايج هادو اللي تنرتاح فيهم، قلبت و شقلبت ملقيت باش نعوم
انا : اوووف السلامة يا ربي، وئام تخرجي معايا فالعشية نشري حوايج؟
وئام : على هادوك شنو؟ ناااري طولتي فهاد السيجي بزاف
انا : وا را ديرونجاني اصحبتي تحنسيرة ما فحالها تحنسيرة
وئام : عادي ياك غير 15 يوم جربي تلبسي دكشي نيت حاجة جديدة بالنسبة ليك و إذا معجبكش راكي مزالا غترجعي لداركم و لبسي ديك الساعة اللي بغيتي
انا : زعما؟
وئام : لبغيتي
انا : نجرب ما خاسرة والو
جبت دكشي كلو حطيتو قدامي و جلسنا نعزلو، الصراحة الحوايج را ما خايبينش غير أنا عمري ما شفت راسي لابساهم ديما تيعجبوني غير على البنات لاخرين، فالاخير لبست مايو و فوقو شورط و تيشورت، واخا مكنتش مقتنعة 100% مي بون، هزينا صيكانا و مشينا مجموعين للبحر كان نقي و زوين صافي و الرملة تتلمع، وئام حيدات الكسوة بقات بحال القردة حدايا بالمايوه و تجبدات على الرملة قاليك تتبرونزا ههههه، أنا مشيت نفزك رجلي فالما كان بارد حتا حسيت بشي واحد دفعني من اللور طحت على كمارتي فالما فزكت كلي، درت كاعية غادي نصعر عليه لقيتو غير أيوب لابس شورط و صدرو عريان خرج ليا لسانو و دخل وسط الما و أنا تبعتو تنرش عليه و هو هارب مني تيضحك،
انا : غير بقا هارب والله حتى نقبطك
أيوب : اتحداكي
أنا : أنا غنوريك
بقا تيجري وسط الما و أنا تابعاه حتا تنقرب نوصل ليه و تيهرب حتا سخفني
انا : صافي هزيت الراية البيضا استسلم غير يالاه نخرجو
أيوب : زيدي
خرجنا من البحر انا لصق عليا داك التريكو ولا كلشي باين غطيت راسي بفوطة و جلست تنشف و فنفس الوقت تنهضر انا و أيوب، فاش نشفو حوايجي نضنا تنلعبو التنس و جريت معايا حتا وئام كنا حنا 5 ضد 5 و بلعاني جيت فالفريق ضد أيوب باش نغلبو، بقينا تنلعبو بكل حماس كل واحد باغي يغلب شحال ضحكنا و استمتعنا فالاخير غلبناهم انا كنت طايرة بالفرحة، بقينا حتال الغروب تصورنا معاه جا أيوب وقف حدايا كتفي قايس كتفو كنت غادي نكحز ساعا قلت عادي خليني آش غادي يوقع كاع منبانش ليهم معقدة، فاش رجعنا دوشنا و مشينا لقاعة الأنشطة، قاليك يالاه نلعبو لعبة غادي يشدو الكرونو 5 دقايق و يكونو جوج تيتنافسو شكون غادي يلبس أكبر عدد ديال الحوايج قبل ميسالي الوقت و اللي لبس أكثر هو الرابح، كنت أنا وواحد البنت سميتها كارولينا بدا الوقت و كل وحدة باغا تسبق و لاخرين تيموتو علينا بالضحك، فاش سالينا ولينا فحال الخناشي ههههه انا طحت للأرض بالضحك و حتا هي كاعما تسوقنا شكون ربح، تعرفنا على ناس بزاف الأغلبية كانو ضريفين