فارقتنا الحياة

الجزء 12

وئام : شوفي داك التبوهيل ديالنا خليه بيناتنا
انا : ههههه فيا الضحكة والله، ما موالفاش نشوف راسي بحال هكا
وئام : واش سمعتي شنو قلت ولا لا؟
أنا : سمعتك سمعتك صافي
وئام : حنا عائلة العروسة خصنا نبانو شيك قدامهم، أنا حالفة ليوم حتا نخلي كلشي تيهضر عليا، و نفقص كاع دوك المسمومات اللي تابعيني،
انا : مزيان مزيان
وئام : شوفي را بنادم غيبقا حاط علينا العين هاد الليلة، عنداكي تخلي ليهم علاياش يهضرو
أنا : وا صافي واخا
وئام : قوليلي واخا تما
سمعنا الدقان من ورا الباب
ماما : البنات واش ساليتو؟
وئام : آه اعمتي
ماما : ندخل؟
أنا : لا لا
وئام : هههه لا عنداك غير دخلي
انا تخبعت مور وئام و دخلات ماما بقات تضحك عليا
ماما : تبارك الله على بنتي وئام جيتي غزالة، أمل خرجي نشوفك
انا : لا حتا نهبطو و شوفيني
ماما : اويلي خرجي لهنا
انا : وا مبغيتش تشوفيني هكا تنحشم
ماما جات جراتني بزز باش تشوفني وقفت قدامها حشمانة و هي تقول
ماما : هاي هاي على بنتي تبارك الله ايوا مالكي جيتي فنة
أنا : هههه وا صافي دبا، حتا أنت جيتي غزالة تستاهلي تكوني مامات العروسة
ماما : يالاه زيدو هبطو را العرس غادي يبدأ
هبطنا لقينا الناس بداو تيجيو، شدينا واحد القنت و عطيناها للتبركيك ما خلينا حتا واحد هههه، و لكن بالصراحة حنا اللي كنا عاطيين العين فدوك البنات كاملين، بدا العرس و برزات ختي هي و راجلها جاو مواتيين، شطحنا بالقياس و كلينا و نشطنا و شبعنا غير تصاور، تيليفوني تيصوني جاوبت كان أيوب
أيوب : آلو أمل فينك
انا : هانا فالدار علاش؟
أيوب : خرجي قدام الباب
انا : واش انت هنا ولا؟
مجاوبنيش قطع عليا ولد الحرام خرجت بالجري لبرا جارة تكشيطتي و تندور من هنا لهيه تنقلب عليه حتا صفر ديك التصفيرة تاع الإعجاب و قال
أيوب : الزيونات
انا : ايووووب درتيها و جيتي كاعما كنت متوقعا ديرها بصح
أيوب : توحشتك بغيت نشوفك
انا : حتا أنا توحشتك بزاف، هاي هاي الناس ديال الكومبلي و دكشي راك موجد راسك بعدا
أيوب : ايوا ياك انت اللي عرضتي عليا باش بغيتيني نجي
انا : جيتي زويون
أيوب : حتا أنت جيتيني مبدلة بزاف، واتاتك التكشيطة
انا : يخليك ليلي، آجي دخل
دخلنا بقا كلشي تيبحلق فينا جلسنا حدا وئام سلم عليها و جلسنا تنتعاودو هضرة كثيرة كانت بيناتنا، فاش طلقو الشعبي ناض تيشطح و جرني معاه و انا جريت وئام شبكناها شطيح و ضحك بقا كلشي تيشوف فينا و حنا كاعما مسوقين......جات ماما قلت ليها هذا هو أيوب هي أصلا غير شافتو عرفاتو حيت مورياها تصاورنا رحبات بيه و دكشي، دوزنا أفضل وقت كان دكشي زوين بزاف مكرهتش ميتسالاش بقينا حتال الصباح عاد سالا كنا حنا دايخين بالنعاس أيوب شداتو ماما يبقا معانا طلعنا حنا نعسو و خليتو مع خوتي شادينها حديث، ما فقنا حتال العشية سولت عليه لقيتو مشا كان خصو يرجع على ود خدمتو هو كان خدام مع باباه، كانو عندهم فيرمات و مزارع كبار تيصدرو دكشي للخاريج و أيوب كان كل مرة فمدينة و لكن الاغلبية تيمشي فالباطو اللي تينقل السلعة من المغرب لأوروبا حتا تيتأكد را وصلات هدشي باش ديما تيكون مسافر، بقا فيا الحال حيت مشا بلا ميقولها ليا قالتلي ماما را عيات متفيقني و والو و هو قاليها بلا متصدعني، مشات ختي دوز شهر العسل مع راجلها و حنا بقينا مع ديك الروينة تنخملو و نجمعو، سالات العطلة و طلعت دبا للسيزيام فعمري دبا 17 عام تقريبا ما بقالي والو و نكملها هههه، هاد العام عندي الجهوي بففف الخلعة الخلعة، بدينا القراية و الحالة طحت فواحد القسم مريض بمعنى الكلمة بففف فيه شي أشكال ما حملتهم ما حملوني مزمرين، و جات معايا الرباعة ديال دوك سكينة و وجدان اللي كانو معايا العام الفايت، أنا دخلت سوق راسي ما حاشيتهاش ليهم كنت مقابلة غير قرايتي، نهار عيد ميلادي كان جا بالاحد الصباح خرجت تندور مع أمينة و البنات حتا صونا لي أيوب قالي نتلاقاو، أنا مكنتش عارفة راه هنا فرحت بزاف فاش قالها استأذنت من البنات نمشي على أساس نتلاقاو فالليل عيد ميلادي فالدار و مشيت للكورنيش فين غادي نتلاقاو وقفت تما و بقيت تنتسناه، حسيت بشي يد تحطات على عيني عرفتو هو،قاليا بالضحك
أيوب : حزر فزر شكون أنا؟
أنا : ايووووب
درت عندو لقيتو هاز بوكي تاع الورد فيديه و راسم ضحيكة على وجهو تتهبل، شفت فيه خرجات الضحكة من فمي بلا منحس و قلت
انا : شكرا علاش عذبتي راسك
أيوب : ما كاين حتا عذاب، را عندي غير أمل وحدة تستاهلي ما أكثر، و عيد ميلاد سعيد بالصحة و العافية و طول العمر
أنا : شكرا شكرا بزاااف ربي يخليك
أيوب : ايوا آش خبارك مع شي قراية
انا : عادي عاد بدينا
أيوب : اممم مزيان ألالة، وا زيدي ندورو ياك مزال ما غادة للدار
أنا : لا مزال، بلاتي غير نصوني لماما نقولها ليها
أيوب : واخا
صونيت ليها قلت ليها را غادي نتغدا فالزنقة و مشينا انا و أيوب تندورو كان جاب الطونوبيل ديالو واخا فالأول مبغيتش نركب مي من بعد قلت عادي ما فيها باس، مشينا تغدينا و فاش كملنا بقينا غاديين و تنهضرو حتا وصلنا لبلاصة تاع الألعاب قاليا والله حتا نلعبو، ركبنا فهاديك اللي تطير فالسما هي تدور و انا راسي تيدور معاها شداتني الدوخة مبقيت عارفة القبلة فين جات و هو تيضحك عليا حيت ما موالفاش نلعب فيهم، فاش نزلت دارت بيا الدنيا و هو شادني انا طحت صافي هزني مخلوع داني للطونوبيل تيرش عليا الما و تيطرشني بشوية باش نفيق عاد رجعت راسي شوية،