اسمي غرام مواليد 94 من بغداد منطقة السيدية طالبة مرحلة ثانية بجامعة بغداد جان من المفروض مرحلة ثالثة بس اني عدت سنة بالسادس علمود تحسين معدلي والحمد لله نجحت من السادس الادبي السنة الثانية بمعدل 76 حتى ادخل قسم القانون وانقبلت بجامعة بغداد قسم قانون.. عندي اخوان اثنين اصغر مني اختي تقوى بصف الخامس ابتدائي واخوية اسلام بصف الخامس العلمي امي وابوية ع قيد الحياة والحمد لله حالتنا المادية عالية..اما نجي ع وصف شكلي اني مربربة شوية جسمي مرتب عيوني جوزية شعري اسود لاكتافي بشرتي حنطاوية متوسطة الطول شي ع شي مقبولة واكثر شي يميزني بشرتي صافية وجسمي متناسق
بسنة 2014 تحديدآ بداية شهر الواحد خلصت محاضراتي وطلعت للكافتريا اني وصديقتي ريهام صديقة كلش مقربة الية وحبابة وخلوقة
غرام: ريهام اليوم حيل تعبنا ومحاضرات دك النوبة باجر عدنا امتحان حتى مابية حيل اقرة
ريهام: ههههه هو بس انتي مابيج حيل تقرين اني احس نفسي مكسرة من الكعدة مال المحاضرات
غرام: اي والله هاي سنة ثانية وهيج لعد السنة الثالثة والرابعة شلون
ريهام: الله يحلها نقرة والباقي ع الله
بهل اثناء اجتي صديقتنا مارلين بنية مسيحية بس حيل اخلاقها عالية وتقدس كل الاديان وماعدها تفرقة وشاطرة
مارلين: هلو بنات كاعدات اهنا غير تعزمني
اني وريهام: هلو مارلين اتفضلي
ريهام: مارلين عفية اريد محاضراتج عندي نقص شوية اكمل وارجعلجياهن
مارلين: مو تدللين عاد انتي دومج عندج نقص بكلشي حتى بالفيتامين
ريهام: اي والله عندي حتى جفاف عاطفي
غرام: دكعدي راحة شتسوين بدوخة الراس
مارلين: لا ليش غرام الحب شي مقدس بس كون واحد يختار صح
غرام: مع انو اسمي يوحي لشي اسمة حب وغرام بس رافضة فكرة الحب
ريهام: عوفيها مارلين فد يوم توكع ومحد يسمي عليها
غرام: لا اسم الله ماريد احب واتعذب اني جاية ادرس وبس
مارلين: الحب ميستأذن اذا راد يدخل لكلبج بعدين تفهمين كلامي
ريهام: عوفونا من هاي السالفة كلشي بالقسمة بنات اني بعد مابية حيل راح اكنسل بقية المحاضرات واطلع
غرام: واني هم انتظريني اجي وياج
مارلين: مو ع اساس تكتبين النقص مال محاضرات
ريهام: اووو نسيت خلي اكتبهن بسرعة ونطلع اني اساسآ ماعندي نقص هواي
غرام: يلة انتظرج خلصي بسرعة .. لعد مارلين مراح تطلعين
مارلين: لا بنات شتعرفوني اطلع اذا ما اخلص محاضراتي
غرام: اي عاد انتي حيل حريصة ع دراستج
خلصت ريهام وسلمنا ع مارلين وطلعنا للبيت احنة بنفس المنطقة بس مجنت اعرفها من زمان بالجامعة عرفتها راحت ريهام لبيتهم واني رجعت للبيت فتحت باب المطبخ لكيت امي تحضر الغدة
غرام: السلام عليكم امي شطابخة اليوم شو الريحة دوختني
امي: هههه عليكم السلام سويتلكم سمج وبرياني بس شو راجعة من وكت اليوم
غرام: والله يا امي تعبنا من المحاضرات وباجر عدنا امتحان رجعنا اني وريهام
امي: اي زين بدلي ملابسج وتعالي نحضر الاكل بين ميجون اخوتج وابوج
غرام: تحجين صدك امي راح اموت من الجوع ما اتحمل انتظر دقيقة وحدة
امي: اصبري ولج همج ع بطنج هو شبقى هسة ع جية بين منحضر الاكل همة جايين
غرام: هففف ماشي ابدل واجيج
بدلت ملابسي وغسلت وجهي من المكياج ورحت يم امي بالمطبخ تحضر بالاكل وهي تسألني شلونج بالدراسة
