غرام: مر ع زواجي سنة اني وبشار خلال هاي السنة عشنا بهدوء مجرد اخوان اتخرجت من الكلية ريهام ومارلين اتزوج بشار اتغير هواية يتصفن يدخن بكثرة احاول اسألة واتردد يصفن علية هواية يحجي وياية حجي مبهم ما افهم شنو قصدة بيوم من الايام اتشجعت وسألتة رحت للهول لكيتة صافن وايدة ع راسة ويدخن ويجر حسرات..
غرام: بشار اكدر اكعد يمك
بشار: اي اكعدي
غرام: ولو تدخل مني بس اكدر اسألك شبيك ليش متغير احسك مو ع بعضك هواية تتصفن صاير شي بالشغل ابوية بي شي مأذيك
بشار: لا مو هيج السالفة بس اني غلطت نفس غلطتج
غرام: شنو مفتهمت ياغلطة هاي
بشار: غرام اني وكعت بالحب
غرام: اي وشكو بيها ليش تكول غلطة عمر الحب بنية صافية ما كان غلطة
بشار: بالنسبة الية غلطة واكبر غلطة بحياتي
غرام: شنو الغلط بالموضوع احجيلي
بشار: حبيت موظفة وياية بالشركة
غرام: زين
بشار: بس البنية طلعت (ش....)
غرام: انصدمت معقولة هيج الدنيا دوارة ضوكتك ألي ضكتة..
وشكو بيها بشار اول وتالي هي مسلمة
بشار: كمت ع حيلي صرت عصبي
غرام افهميني اعرف هي مسلمة بس الشغلة بالنسبة الية معقدة انتي تعرفين شنو الحوادث الصارت ويانة وشكد نزفنا حزن بسببها غرام لا اني ولا ابوج ولا بقيت عمامنا و ولد عمنا راح يتقبلون الموضوع
غرام: انت ليش مكبر الموضوع صح انت مجروح لان والدك تعرض للأغتيال و ولد عمي البقية بس لتعمم القاعدة ع كل الطائفة بشار الراح راح ابدي من جديد ابوك وابن عمك مو اول بشر صار بيهم ألي صار
هواية عالم راحت ضحية لعبة خارجية وابوك وغيرة وغيرة هم انسفك دمهم بسبب الطائفية
بشار: بس اني ماكدر غرام اذا اتزوجتها معناها راح اخون ابوية وابوج و ولد عمامنا وعمامنا تعرفين شلون ماخذين موقف ميحتاج اشرحلج
غرام: بشار اهدأ واكعد خلي نتفاهم
بشار: كعدت واهز برجلي من التوتر
اتفضلي اتفاهمي
غرام: انت شسويت وية البنية يعني حجيت وياها شي
بشار: اي حجيت وياها وسولفتلها كل القصة وكلتلها خلينا نبتعد احسن مستحيل اتزوجج
غرام: زين انت قابل ع السويتة
بشار: اكيد مقابل بس شسوي مو بيدي حاقد ماكدر انسى واسامح
غرام: وهي شنو ذنبها هي قتلت ابوك لو اخوها لو ابوها
بشار: اكيد لا هي ولا ابوها بس مع هذا ماكدر اتقربلها بعد
