امير: دخلت لغرفتي شمرت نفسي ع الفراش امي تحجي وياية ماكدر اجاوبها نمت كعدت العصر ع صوت علي دخل علية للغرفة
علي: ها خوية شبيك سألت الوالدة كالت مو ع بعضة
امير: شسولفلك ولك علاوي راحت غرام خلص راح تصير ع ذمة غيري
علي: شنو السالفة فهمني
امير: مو كتلك راح اخذها ونروح لأربيل نتزوج بس هي نص الطريق ورجعتنا خافت حاولت اقنعها مقتنعت رجعتها لاكانا ابوها وابن عمها بالباب حاول يهددها بية انو اذا مقبلت تتزوجة راح يقتلني كدامها
علي: اي وتالي
امير: وافقت الغبية
انهارت اعصابي كمت اعيط واكسر بالغراض امي طبت علية حاولت هي وعلي يهدوني
... لج يمة كلبي انمرد احبها مو بيدي لك علاوي والله احبها مدا اصدك شلون راح تصير عروسة لغيري شلون راح تعيش وياه تحت سقف واحد
ام علي: يمة دخيلك لتأذي نفسك فدوة اروحلك شتريد اسويلك بس لتسوي بنفسك هيج
علي: ادري شتسوي قابل حبيبي اموري انت مو اول واحد يحب ويفشل بحبة سلم امرك لله والايام كفيلة تنسيك
امير: شنسى عطرها عيونها بشرتها ألي جنها بشرة طفل لو خدودها لو طولها من تمشي كدامي جنها نسمة هوى كلة رقة وانوثة
شكدر انسى كلبي شلون ينسى حبها معشعش بكلبي لك علاوي
علي: يلة عاد انت رجال متصورتك تبجي مثل المرة
امير: حقك محاس بنار كلبي
ام علي: يمة سودة علية كون بية ولا بيك بس شنسوي يا ابني انت رجال وعقلك جبير اذكر الله وشوية شوية تتعود الدنيا متوكف ع احد مو هاي غيرها
امير: الله كريم يمة الله كريم
علي: يلة كوم خوية اكل شوية وامشي خلي نطلع
امير: ماشي بس خلي اسبح وابدل لان دتشوف حالتي
علي: يلة انتظرك
غرام:ظليت بالغرفة ابد ماطلعت ابوية ميريد يشوفني واني اساسآ ماريد اشوف احد خلص اقتنعت انو اني من اليوم صرت انسانة ميتة
امي كل شوية تجي تشوفني تحجي وياية تقنعني حتى آكل بس يا اكل هذا ماريد آكل بلكي اموت قبل ميجي موعد حكمي بالاعدام
.....
ما اصعب ان يجمعك القدر بأنسان لم تكن تعرفه والاصعب ان يقرر القدر ان يفرقكم بعد ان تعلقت قلوبكم ببعض
ليتني لم اعرفك ليتني لم اراك لم اقع بحبك
ع مقدار حبي لك زاد عذابي اضعاف
كل ما كبر حبك بداخلي كبر عذابي وزادت احزاني وقلت طموحاتي بالحياة بل انعدمت طموحاتي بالحياة لم اعد قادرة ع تحمل انفاسي فكيف لي ان اتحمل اوجاعي واحزاني
.........
غرام: مرت يومين واجة موعد الخطوبة امي مو مثل اي ام فرحانة بخطوبة بنتها امي حزينة مثلي بس مجبورة تعزم بالعالم وتحضر وتنظف اما اني هذا اليوم بالنسبة الية اخر يوم بالحياة مثل انسان كالولة اليوم راح تعيش آخر ساعات حياتك
رحت اني واخت بشار للصالون همة مأجريلي البدلة اني مادري بأي شي
دخلنا للصالون شفت عروستين كبلي فرحانات ومهتمات بمضهرهن مخبوصات شيختارن لوك وتسريحة تمنيت جزء من فرحتهن تنغرز بكلبي تمنيت هذا اليوم اني وامير مخطوبين بس تبقى امنية صعبة المنال
المهم وصلني السرة
