غرام:فشلت من كلي اريد خط لأختي عبالي ديريد يصارحني حالة حال غيرة شكد عيب.. رجعت يم البنات كعدنا شوية وهكذا خلص دوامنا رجعنا للبيت بالطريق حاولت احجي وية امجد ابو الخط علمود دلال.
امجد صديقتنا بيتهم بالكاظمية وتريد خط واحنة بس اني وريهام بالخط تكدر تاخذها وشكد متريد ينطوك
امجد: والله شوية صعبة لان مو نفس طريقكم بس يصير خير باجر اردلج خبر
غرام: اوكي ماشي
ريهام: ليش امير من صاحج حجة وياج ع الخط
غرام: اي كلي ع دلال يريد يحطلها خط وع اساس يأمن عليها اكثر ويانة لان صديقاتها
ريهام: ها زين ياريت تجي ويانة
غرام: اي تكيفين لان صديقتج
ريهام: ههههه شكو بيها.
غرام: وصلنا امجد لبيوتنا وكالعادة نفس الروتين باجر عدنا اوف وكاعدين فمقريت التهيت وية امي بشغل البيت وراجعت لاخوتي واجباتهم كعدنا ضحكنا شوية صار المغرب سوينا عشا اني وامي واتعشينا ظلينا نباوع فلم عربي قديم وابوية هم يباوع ويانة لهناك دك جهازي اخذتة وطبيت لغرفتي
الو
امير: الو هلو غرام
غرام: منو حضرتك اتفضل
امير: اني امير
غرام: نعم!!! امير يا امير وشجاب رقمي عندك
امير: امير اخو دلال اخذت الرقم من جهاز دلال
غرام: وشتسوي برقمي وليش اخذتة
امير: حبيت اسأل ع الخط علمود دلال مرجعتيلي خبر
غرام: اولآ جان المفروض دلال ألي تخابرني مو انت وثانيآ ماكو داعي تستعجل يعني اول وتالي عكب باجر راح اردلها الخبر الها او الك وثالثآ ابو الخط باجر او عكبة يرجعلي جواب واكللها لدلال خوش وبعد لتتصل
امير: لج شو انتي السانج طويل متكدرين تجاوبين ع كد السؤال وتسكتين
غرام: لا والله انت ألي دمك ثكيل وبعدين ماكو مبرر واضح لأتصالك امسح رقمي وبعد لتتصل ترة اكللها لدلال وتصير مشكلة يلة باي
امير: شكد غبية سدت الخط بوجهي ههههه بس يا اخي استمتع من اغثها
غرام: شو هذا طوخها شنو ياخذ رقمي ويتصل بكيفة ألة ارزلة من اداوم.. ورة ساعة تقريبآ هم دك الجهاز ساعة 12 تقريبآ
امير: خلي ادك عليها اغثها شوية
غرام: نعم اتفضل شتريد
امير: يااا نسيت ودكيت عليج عبالي صديقي مروان
غرام: اي خوش حجة انت ليش لزكة خلي اداوم ويصير خير طوط..طوط..طوط
امير: والله لا اركصج تركص تسدين الخط بوجهي بسيطة.. بس ليش احب ازعجها يمكن احب عصبيتها او احب تعابير وجها او السانها الطويل ههههه بس لا وكعتني ام السان
غرام: هففف هذا شكد غثيث ولزكة بس ليش هيج ديسوي وياية وشنو السبب امممم بس هو محبوب اوووو خلي انام احسلي..
كعدت ثاني يوم من الصبح اهلي نايمين وابوية طالع للشغل كمت غسلت وجهي وطبيت للمطبخ شغلت فيروز وبديت احضر بالريوك جان تكعد امي
امي: صباح الخير شو من وكت اليوم شعجب ومشغلة فيروز وتسوين ريوك
غرام: هههه صباح الخير امي شبعت نوم وكلت خلي اكعد اسوي ريوك
امي: اي زين خلي اكعد تقوى واسلام يتريكون ويانة
غرام: خوش كعديهم نتريك سوة
امي: ماشي
غرام: خلصت الريوك كعدنا نتريك اني وامي واخواني بعدها بدينا انظف البيت وامي سوت غدة اتغدينا بعدها نمت ساعتين وكعدت المغرب قريت شوية صارت ب 8 نزلت سوينا عشا اني وامي اجة ابوية جان طالع تعشينا وكملنا كلمن راح لغرفتة ثاني يوم
ريهام: صباح الخير وجه الجوب
غرام: صباح النور صالنصة
ريهام: هههه شبيج كالبة خلقتج من الصبح
غرام: هذا الفطير البارحة ضوجني
ريهام: يافطير ولج
غرام: امير اخو دلال ماخذ رقمي من جهاز اختة ودك علية والله شنو اريد اعرف ابو الخط وافق ياخذ دلال وياكم
ريهام: هههههه عليج الله لج والله شلون ماشوف هذا معجب بيج
غرام: شوف هاي اني بحال هالسوالف المهم انتي اسألي امجد شوفي يقبل ياخذها لدلال اني مالي خلك احجي
ريهام: امجد عفية شكلت علمود صديقتنا ام الكاظمية تقبل تاخذها لان منتظرة الرد منك حتى اذا متقبل تشوف خط غيرك
امجد: لا هاهية اخذها خلي تنطيني رقمها واتدليني بيتهم حتى من باجر نبلش وياها
ريهام: اي زين .. غرام وين شاردة
غرام: وياج ولج
ريهام: اي واضح
غرام: وصلنا يلة انزلي
ريهام: يلة اكولج هذيج مو مارلين ودلال
غرام: امشي لعد خلي نكللها ع الخط قبل لندخل المحاضرة
ريهام وغرام: صباح الخير بنات
مارلين ودلال: صباح النور
ريهام: دلال ابو الخط قبل ياخذج ويانة بس يريد رقمج واتدلي عنوان بيتكم حتى من باجر تبلشون
دلال: ها زين لعد اكولة لامير هو يتفاهم وياه انطيني رقمة حتى انطي لأمير يخابرة
ريهام: هاج هذا رقمة
مارلين: يلة بنات المحاضرة بدت خلي ندخل قبل ليجي الاستاذ وننطرد
غرام: اي والله صدك يلة دلال ريهام فضنها
دلال وريهام: ماشي اجينا..
غرام: خلصت المحاضرة اجة وقت الريست طلعنا للكافتريا واشوف امير كاعد هو ومروان يتريكون
ريهام: هههه ها شبيج انخطف لونج
غرام: ممكن تسدين حلكج لان مطايقتج انتي هم
مارلين: امممم شنو السالفة شبيجن تتناكرن
ريهام: يمعودة اندري هاي وجه الجوب طاعجة وجها من الصبح
مارلين: هههههه خليها شعليج منها
غرام: بهل اثناء اجة امير بأتجاهنا من شافني اني والبنات بكلبي.. ياستار ياربي
امير: صباح الخير ممكن اخذ من وقتج دقايق آنسة غرام
غرام: اتفضل شرايد
امير: ها صدك شكال ابو الخط
غرام: قبل ونطينا الرقم لغرام حتى انت تخابرة وتتفاهم وياه
امير: وانتي ليش عصبية
غرام: اسأل نفسك شسويت البارحة بأي حق تاخذ رقمي من جهاز اختك وتخابرني بنص الليل
امير: شكو بيها احنة زملاء
غرام: احنة مو زملاء ومستحيل اصير زميلتك فاهم
امير: اكول انتي ليش هيج حاقدة علية شمسويلج اني
غرام: محاقدة عليك بس انت دائمآ لازك بطريقي
امير: يجوز لان انعجبت بيج او احتمال بديت احبج
غرام: ها تحبني شنو اعرفك تعرفني احم
امير: مو شرط اعرفج الحب ميعترف بشي احساس ممكن يدك باب كلبج بأي لحظة
غرام: عفية خجلتني تحبني متحبني هذا شي راجعلك المهم اني اكرهك وبعدين انت مو قبل فترة كتلي اكرهج
امير: صح من بعد الكراهة محبة
غرام: اني ما اثق بهذا الكلام ولا اريد ارتبط واحب وشايلة الفكرة من بالي تريد مارس مشاعرك بعيد عني باي
امير: شكد غبي يا امير وكتها هسة استعجلت اوووف بس اجيبج للدرب اجيبج يا ام خشم اليابس
غرام: من سمعت كلام امير تخربطت وضعيتي ممتوقعة منة هذا الكلام ولا توقعتة هيج جريء صخنت بس فرحت بداخلي يمكن بديت ابادلة نفس المشاعر ماعرف بس اني حاولت اصدة.. رجعت يم البنات
ريهام: ها خانم شو اتأخرتي ديشرحلج قصة حياتة
غرام: ها لا جان يسألني علمود الخط
مارلين: شو وجهج مخطوف مو ع بعضج
غرام: لا يمعودين شبيكم ماكو شي يلة خلي اجيبلي كلاص جاي راسي ديوجعني
ريهام: روحي عيني جيبيلج كلاص جاي هههه
مارلين: ولج ريهام شبيج وياها ههه
ريهام: ولج اني حاسة بدت تتقرب من امير او بالاحرى هو ألي بدة يتقربلها
مارلين: صدك من بعد الكراهة محبة ههه
غرام: خلص دوامنا بالجامعة رجعنا لبيوتنا فهمت من امجد انو امير مخابرة ومتفق وياه ع كلشي وراح ياخذ دلال بالخط ويانة رجعت للبيت تعبانة وفكري متشتت متغديت بدلت ونمت للعصر كعدت تغديت سبحت وبديت اقرة وهكذا مرت بينا الايام امير يومية يتصل باليل يتحجج بأشياء واني ارزلة واسد الجهاز بوجهة وبالكلية اتجنبة بس بداخلي فرحانة حاسة شي غريب انظم لحياتي بديت انجذب لأمير يدزلي مسجات حب وكلام حلو وما اجاوبة بس افرح يتعرضلي بالكلية مرات واصدة لحد ما خلص العام الدراسي واجتي العطلة الصيفية..
اعتذر عن الاخطاء الاملائية 😘
