ليلي بنت الحارس

الجزء ٧

(ليلي بنت الحارس) الفصل.   ٧

(ليلي بنت الحارس). الفصل.   ٧

راح حارس وسلوي معاها ودخلو
ولما ندهو علي ليلي علشان تطلع تستلم الجايزه
طلعت سلوي معاها
وحارس اختفي
فضلت فوق المسرح عنيها بتبص في كل مكان في القاعه
بتدور علي حارس
كانت زي التايهه
والتفكير شاغل دماغها
هو مش عايز يفرح بيا
طيب ليه مش يكون جمبي في لحظه زي دي
طيب ايه اللي يمنعه من وجوده جمبي
افكار كتير كانت في دماغ ليلي
احالت دون فرحتها بالانجاز الكبير اللي حققته
وبعد الاحتفال
روحو البيت
دخلت شافت حارس قاعد وعنيه لونها احمر
من العياط
رمت الجايزه علي الارض
وجريت علي اوضتها
وقفلت عليها الباب وفضلت تعيط
قام حارس يخبط عليها
مارضيتش تفتح له
فضل حارس يتحايل عليها
ويقولها ومن امتي احنا بنزعل من بعض بالطريقه دي
احنا مش اتعودنا نناقش بعض
ونتكلم مع بعض لما حد فينا يزعل من التاني

ليلي:- الباب مفتوح وانت عارف ان عمري ما بقفل بابي عليا
حارس:- وانا عمري مادخلت اوضتك بدون ازنك

ليلي قامت وفتحت له
وخدته في حضنها. وقالت له.
دانا كنت عايزه اهدي لك الجايزه قدام الناس كلها
علشان يعرفو ان عندي اعظم اب في الدنيا
حارس:- كفايه عليا اني اشوفك اعظم انسانه في الكون. وعايزك تعرفي. ان الاب مش بيحتاج اكتر من انه يكون ذكري طيبه لابنائه
ليلي:-  انت مش مجرد ذكري طيبه.
انت بالنسبالي قدوه   والدنيا كلها بسبب وجودك جمبي دايما جميله
ربي يحفظك ليا يابابا ومايحرمنيش منك ابدا
حارس :- طلع من جيبه سلسله دهب
ولفها حوالين رقبتها بمناسبة نجاحها
وخرج هو وهي من الاوضه مأنكجها
شافتهم سلوي وعلي وهم قاعدين في الصاله
فضلو يقولو ايوه ياعم
ماحنا ولاد البطه السوده
لو سلوي زعلانه حارس مش هيعمل معاها كده
ليلي:- طبعاً دا حبيبي انا  انتي راحت عليكي
انتي بقيتي عجوزه ياحاجه
سلوي:- انا بقيت عجوزه طيب يا اليلي مخاصماكي
ليلي:- وانا اقدر ياقمر.
دا لسه بابا بيقولي هي امك دي مش بتكبر
دي بقت احلي منك
حارس:- ربنا يخليكو ليا ومايحرمنيش منكم ابدا
يا احلي حاجه في دنيتي

علي:- انا هروح البلايستيشن هاتي فلوس يا ماما
سلوي:- مش لسه مدياك الصبح
علي:- يووووه هو انا كل ماطلب منك تقوليلي انا لسه مدياك
سلوي :- يابني هات كتب السنه الجايه وذاكر فيهم احسن من اللعب طول النهار ده
حارس:- يا علي يابني. اللعب ده ما منهوش فايده
اعمل زي اختك واهتم دلوقت بتعليمك علشان ترتاح بعدين
علي:- مانا هذاكر لما تفتح المدرسه
الاجازه دي للعب. هاتي بقي ياماما فلوس
سلوي ادته فلوس وخرج

بعد مرور فتره. ليلي. راجعه من درس الرياضيات
وفي مدخل العماره شافتها مدام زينات
اللي ساكنه في العماره
وكان معاها ابنها وبنتها
وجايبه حاجات معاها
ابنها وبنتها في مدارس لغات.
شافو ليلي
فضلو يتكلمو ويقولو اهي ليلي اللي طلعت الاولي علي المحافظه
يابختها.
ياريتنا كنا زيها واتصورنا مع المحافظ وطلعنا في التلفزيون
الست زينات سمعت كلام اولادها
فندهت علي ليلي
ليلي راحت لها
قالت انتي ليلي بنت حارس البواب
ليلي بصت لها بغضب
قالت لها ايوه ياطنط
قالت شيلي معلش الاكياس دي وطلعيها عندي في الشقه فوق
ليلي اتصدمت لان الست معاها اولادها
والاكياس خفيفه
يعني ممكن ياخدوها في ايديهم وهم طالعين
ولكن ليلي. ما استعيبتش انها تساعدهم
طلعت الاكياس معاهم
وهم طالعين اولاد الست زينات مبهورين بليلي
فضلو يتكلمو معاها
والبنت فضلت تعرض علي ليلي تجي تذاكر معاها
لكن قاطعتها الست زينات
تذاكر معاكي ايه
انتي في مدارس لغات يابنتي
تعليمك مش زي تعليمها
ليلي وصلت لاشدها من الغضب
صدقت ما وصلت شقتهم وسابت الحاجه ونزلت بسرعه
باليل حارس شاف ليلي
قاعده علي المكتب اللي بتذاكر عليه وسرحانه
وباين عليها مشغوله دماغها
عمل حارس كوباية لمون بنفسه
وخدها ودخل ل ليلي
قالت له ايه ياحج التعب ده كلو
دا كتير علينا الدلع ده
حارس:- بلاش خدوهم بالصوت بتاعتك دي
وقوليلي ايه اللي مزعلك
ليلي قالت له علي اللي حصل
لانها عمرها مابتخبي عنه حاجه
حارس ابتسم وقال لها
ياحبيبتي الناس دي بتكره الاحسن منها
دول حياتهم تشوفيها من بعيد
تقولي انهم بفلوسهم مالكين الدنيا
لكن اللي يقرب من حياتهم بيعرف انهم مايعرفوش معني السعاده
تتخيلي يا ليلي زينات دي لو شافت بنتها متدايقه كده
هتقعد معاها وتتكلم معاها وتنصحها
تفتكري بتراقب ابنها في كل تصرفاته
تفتكري بيقعدو مع بعض يهزرو ويضحكو ويحسو بمعني العيله واللمه والسعاده
يابنتي الحمد لله علي نعمة السعاده
اللي ربنا خلاها في القلوب
مش في الشكل من بره
علشان الناس ماتحسدش بعضها
انتو عندي ياليلي السعاده الحقيقيه
ربنا رزقني بزوجه صالحه
وبنت زيك اميره
وعلي ان شاء الله لما يكبر هيبقي راجل ويشيل مسؤليه
ليلي:- انا مش زعلانه يابابا غير من اسلوبها في الكلام معايا
دانا بحترمها جدا ومش بعمل حاجه تزعل حد
حارس؛- مش لازم يا بنتي تعملي حاجه وحشه علشان اللي زي دي تزعل منك
احنا بقينا في زمن يا ليلي
الناس مابتزعلش غير من الانسان الناجح
والكويس
الناس اتغيرت
وبيحسدو بعض علي اي حاجه
ربنا يهديهم بقي
كملي مذاكرتك
وماتحطيش في بالك
طول مانتي واثقه من نفسك
فليذهب من يكرهك للجحيم😂✌️
ليلي كانت فرحانه بتحفيز حارس ليها
وفضلت تضغط علي نفسها في المذاكره
لعند ماجات في السنه الاولي من الثانويه العامه
ونجحت. وطلعت الاولي علي المحافظه
كان وقتها حارس عند الحاج كامل في مصر
تعمد يروح علشان يكون له حجه مايحضرش حفلة تكريمها
لكن ليلي فضلت تتصل
علي بيت جدها
رد جدها وفهمها ان حارس وجدها الحاج كامل
بيخلصو بيع حتة ارض
وهياخدو كم يوم في مصر
ليلي طلبت حارس تكلمه
حارس:- ايوه ياليلي عامله ايه
ليلي:- بابا بالله عليك فيه ايه فهمني
ارجوك يابابا انت بتعمل كده ليه
فهمني انا تعبت اوي
دانا طول السنه بتعب
علشان اللحظه دي
نفسي تكون جمبي فخور بيا
ارجوك قولي انا عملت ايه علشان ماستاهلش
انك تقف جمبي في لحظه زي دي
حارس :- انتي ماعملتيش حاجه يابنتي
انا اللي عملت
وهنا الحاج كامل مسك التليفون من ايده
وقال ل ليلي. ماتخافيش ياليلي
يوم الحفله هتلاقيني انا وابوكي موجودين
قفل التليفون
وفضل يزعق ل حارس
فيه ايه ياحارس
عاوز تقولها ولا ايه
هتدمرها وتعقدها بعد اللي وصلت له ده
ماتجمد اومال
ياواد انت لازم تكون اقوي من كده
حارس:- ليلي مش زي اي بنت ياحاج كامل
ليلي حساسه جدا
وذكيه جدا
مش هيخيل عليها كلامك ليها
ولا الحجج دي ماتدخلش دماغها
الحاج كامل:- قوم لسانك كان هيفلت بالكلام
وتقولها وتصدمها فيك
لا ياحارس. اعقل اومال
البت في ما شاء الله عليها ناجحه في تعليمها
ماتضيعش مستقبلها بضعفك ده
حارس:- طيب اذاي هنروح الحفله ياحاج كامل
الحاج كامل سيب الموضوع ده عليا انا

يوم الحفله ليلي طلعت تستلم الجايزه
وسلمت علي المحافظ
واتصورت معاه
بصت لقت حارس داخل هو وجدها الحاج كامل
سابت المحافظ وجريت علي حارس
حارس كان بالنسبالها اهم من الجايزه
واهم من الحفله
ووجوده جمبها في اللحظه دي كان
اكبر من فرحتها بنجاحها
اوقات كتير بنحتاج حد يكون جمبنا في فرحنا وحزننا
في الحزن يهون علينا وفي الفرح يشاركنا الفرحه
المهم نحس ان لينا سند
دايما في ضهرنا
شدت ليلي حارس علشان يطلع معاها
قال لها انا جيت اهو
وانتي اظن مش عاوزه اكتر من كده
يلا ياحبيبتي استلمي جايزتك
وانا وجدك هنقعد هنا
قعد حارس والحاج كامل
وصعدت ليلي والتصفيق يملاء القاعه
وقالت انا عايزه اهدي الجايزه دي
للانسان اللي كان السبب
وسيكون سببا في كل نجاح احصل عليه
سمحو لها انها توجه له كلمه
مسكت ليلي الميكرفون
وقالت

إليك يا أبي يا نبع الحنان..فأنت بلسمي..أنت حياتي والهوى وتبسمي..أنت ظلال العطف يملؤه الحنان..أنت ديار الحب والحنان..أجهدت نفسك بلا ضجر..فرحك أن تراني باسماً..ترجو أن أعلو المنابر..وأعانق العلياء دوماً..قلباً عظيماً تملك..يا ملاك تملك فلا يجازيك دمي. إليك يا أبي إليك يا سندي في هذه الحياة إليك يا من زرعت في طموحاً صار يدفعني نحو الأمام إلى مستقبل ناجح أحبك يا أبي. أبي يا صاحب القلب الكبير..يا صاحب الوجه النضر..يا تاج الزمان..يا صدر الحنان..أنت الحبيب الغالي..وأنت الأب المثالي..وأنت الأمير..لو كان للحب وساماً..فأنت بالوسام جدير..يا صاحب القلب الكبير.
كل القاعه قامت والتصفيق استمر لدقائق
بنت في ادبها
واب في كفاحه وتربيته
كانو شئ مبهر
في زمن بعدت فيه المسافات
بين الابناء وابائهم
الناس مستغربه ان فيه ليلي بتفوقها
وفيه حارس في تربيته
الناس كانت سعيده جدا بالموقف
حتي المحافظ لما شاف الموقف
نزل بنفسه عند حارس
وسلم عليه
وهناه علي تربيته ل ليلي
بعد ما الحفله خلصت
رجعو البيت مبسوطين جدا
وكان اللي وصلهم البيت
مدير الامن في سيارته الخاصه
لان بنته كانت زميلة ليلي
واتكرمت معاها لانها حصلت علي المركز التالت علي المحافظه
اول ماوصلو
الست زينات نازله هي و اولادها
وشافو الموقف
اولادها سابوها
وجريو علي ليلي باركولها
وكانو فرحانين بيها
زينات ندهت عليهم وهي مكشره
وسابتهم ومشيت
وهم داخلين
الحاج كامل قال ل حارس
انا هروح للحاج عبد الله
علشان تعبان
وهرجع باليل
رفض حارس انه يخليه يروح لوحده
وراح معاه
زارو الحاج عبد الله
الحاج عبد الله قال ل حارس
خلي بالك يا حارس من علي ابنك
علي بقي يقعد علي القهوه مع العيال
ويشرب الشيشه
شد عليه يا حارس
انت ولد اصول ولازم زرعك يبقي من نبتك اصيل
خده قريب منك. واغرس فيه اللي غرسه فيه ابوك
وعلمه ان ده ورث
لازم يورثه للاجيال الجايه
المرجله والادب وتحمل المسؤليه
وتقوي ربنا
ماتخليش زرعك دبلان ياحارس
ارويه بحبك وحنانك وخوفك عليه
حارس:- ان شاء الله ربنا يهديه
ويقدرني واصلح من شانه
المهم انك تقوم بالسلامه
دي صحتك عندنا بالدنيا
خدو قعدتهم ورجعو البيت باليل متاخر
دخلو البيت لقيو ليلي وسلوي بيجهزو في الاكل
بعد شويه
داخل علي من بره
معاه اتنين صحابه عازمهم علي العشا
حارس والحاج كامل ناس ولاد اصول
رحبو باصحاب علي
وضايفوهم
ورفعو راسه قدامهم
اتعشو وخدو واجبهم ومشيو
رجع علي
جده قال له
تعال جمبي يا علي........

تم.👍🌹✌️