ليلي بنت الحارس

الجزء الاول

(ليلي بنت الحارس).  الفصل. الاول

علشان نعرف قصة ليلي.
لازم نعرف الاول. قصة ابوها. عم حارس.

عم حارس راجل من صعيد مصر
كان عايش مع ابوه وامه واخته.

بعد ماخلص تعليمه.
وخرج من الجيش   بقي يشتغل في ارضهم
مكان ابوه.

وفي ليله. وهو في بيروي الارض. باليل
هو وابن عمه وخطيب اخته دياب
حصلت مشكله بين ابن عمه. وابن العمده
ابن العمده كان راكب الحصان وسكران وفي ايده كرباج
شاف دياب قدامه علي الطريق من غير سبب ضربه بالكرباج
خد الضربه وفضل يزحف في الارض ويتلوي زي التعبان
وابن العمده. بيضرب فيه مش راحمه
حارس شاف ابن عمه بالمنظر ده
دمه غلي. والغضب عمي عنيه
مسك الفاس ورماها من بعيد علي ابن العمده
رشقت في دماغه ووقع من علي حصانه في الطين
حارس شال ابن عمه. وجري بيه علي بيته
اتلمو اهله عنده في البيت
وبعد شويه جه الخبر
ان ابن العمده مات
ابو حارس قال  
يا حارس. اطلع ياولدي في التو واللحظه علي مصر
اختفي خالص عن الانظار
دا التار زي النار ياولدي هياكل شبابك

حارس قال يابوي ومن امتي بنخاف
البادي اظلم وخد جزاته
ابوه قال. الدم بالدم ياولدي
عيلة العمده مش هيسيبوك
دا ولد العمده
يعني ولد كبيرهم
وزهرة شبابهم.  روح ياولدي.
وسيبنا للهم والنار اللي ولعتها حوالينا

انفد بجلدك دلوك.
واحنا. هنقفلو بابنا علينا
لعند ما نشوف هترسي علي ايه

ابو حارس قال لام حارس.
هاتي عشر الاف جنيه
وحضري هدوم حارس
وهاتي عقود الارض
وحطيهم في شنطه. بسرعه قبل الصبح مايطلع
وانت يا حارس. 
هتطلع علي مصر
تروح علي العنوان ده.
تقابل الحاج كامل.
دا صديق عمري. هيتاويك اليومين دول
وهابقي اعرف اخبارك دايما
وابعتلك باللي هيصير هنا

اخت حارس فاطمه. وخطيبة. دياب ابن عمه
كانت متعلقه باخوها الوحيد حارس
وكانت منهاره من اللي حصل
لدرجة انها اول ماسمعت ابوها بيقوله اهرب
وقعت مغمي عليها من الصدمه
دا اخوها اللي ماحليتهاش غيره
اما ام حارس
فحضرت الشنطه
وبتديها لضناها وهي بتترعش
تقدم ايدها وترجعها تاني
عاوزاه يمشي
ومش عاوزاه يفارقها
هي اكتر حد كان قلبه منفطر علي حارس
حارس خد الشنطه
وسلم عليهم ومشي خرج من الباب
شاف الناس كلها بتجري
البلد مقلوبه

ابن العمده مات
كلمه بيسمعها طول ماهو ماشي
غطي وشه بالشال
وعدي علي الطريق الزراعي علشان يوصل
الطريق السريع ويركب سياره تخرجه لمحطة القطر
عدي علي ارضهم وهو ماشي
نزل في الارض. وقعد فيها
خد ترابها علي صدره
وشم ريحته اللي ممزوجه بعرقه وعرق ابوه وجده
بص في الساعه لقي الوقت متاخر
قام يمشي
شاف من بعيد حد جاي لابس جلابيه بيضا
وشال وبيجري ناحيته
الدنيا كانت عتمه
مش شايف اللي جاي
حط ايدي في جيبه علي مسدسه
ولما قرب الشخص منه
طلع مسدسه وقال اقف عندك
قالت. ايدك عن المسدس ياحارس
وشالت الشال من علي دماغها.
وقالت. انا نعمه ياحارس
حارس. نعمه. ايه اللي جابك
وعرفتي اني هنا كيف
نعمه. صح اللي بيقولوه ده
قتلت ولد العمده.
حارس يقتل. معقول
قولي ماحصلش ياحارس
قولي انك ما غطستش يدك في الدم

حارس.  مش هاقدر اشرح لك اللي حصل دلوك
ارجعي علي دار ابوكي يانعمه
الحكومه زمانها جايه
نعمه. هتروح فين طيب
وهاشوفك كيف
وهترجع امتي

حارس.  هارجع يانعمه
هارجع يابت علشانك وعلشان ابوي وامي واختي
وعلشان ارضي دي.
اللي حبها عندي قد حبك يانعمه
هارجع يابت عمي بس الغمه تنزاح
روحي يانعمه. وادعيلي.
انهارت نعمه من البكا.
واترمت في حضنه
حارس. من الخوف والقلق.
مسك الشال ولفه علي دماغها
وخلاها تمشي
طلع علي الطريق. ووقف عربيه. وركب ومشي

وصل محطة القطر
وقطع تذكره. وركب القطر.
وقعد علي الكرسي.
بعد شويه. قعد جمبه. راجل كبير في السن. ومعاه ابنه. الصغير وبنت. في العشرين
اتحرك القطر
والراجل اللي قعد جمبه هو واولاده
فضل يقول دعاء السفر
وطلب من حارس يقول معاهم
حارس فضل يقول معاهم دعاء السفر
وبعد ماخلصو. فضل يتكلم مع الراجل ده
وهم بيتكلمو
الشرطه جات تفتش في القطر
حارس وشه اتغير
وبان عليه القلق. والراجل اللي قاعد جمبه
لاحظ عليه ده
وصل الظابط عندهم
وطلب من حارس انه يفتشه
الراجل الكبير ده قال للظابط
كل سنه وانتو طيبين يابني
دول اولادي. وزي اخواتكم
واحنا ناس بتوع ربنا.
الظابط. شاف الراجل. واولاده.
باين عليهم الاحترام والالتزام
قرر انه مايفتشهمش
وسابهم وكمل
بعد ما مشي
الراجل قال لحارس. خير يابني
ايه اللي حاصل معاك. وليه قلقت من الشرطه
احكيلي. سرك في بير وانا زي ابوك

حارس ارتاح للراجل ده. وكان بالفعل محتاج حد يفضفض معاه ويتكلم
لانه كان مخنوق. والافكار في دماغه كانت مخلياه حزين
وعاجز عن التصرف
بدء يحكي قصته للراجل ده
واولاد الراجل متاثرين بكلام حارس
بعد ماخلص كلامه
الراجل عرض علي حارس. ينزل معاهم يرتاح عندهم من السفر
وبعدين يمشي
حارس رفض لانه عايز يروح للحاج كامل صاحب ابوه
علشان يعرف اخبار اهله
ويعرف ايه حصل معاهم بعد ما مشي

لكن الراجل اصر  ان حارس يروح معاه
حارس وافق. وراح معاه علي بيته
وصلو البيت. اول شي عملوه
اتوضو علشان يصلو
حارس اتوضي وصلي معاهم
وبعد الصلاه بنت الراجل حضرت الاكل
وهم بياكلو.  الراجل. قال لحارس
انت سكتك طويله يابني
هانصحك كم نصيحه.
تحطهم حلقه في ودنك
اولا. التزم بصلاتك مهما انشغلت
ثانيا احفظ نفسك واهلك من كل ذنب في غربتك
ثالثا ادعي دايما
لان الدعاء بيكون منجي ليك من سكك وعره كتير
واخيرا يابني
سلم امرك لله فهو نعم المولي ونعم الوكيل
قادر يثبت برائتك وينجيك من اللي انت فيه
واللي انت فيه ده امتحان من ربنا ليك
ولازم تثق انه ما ابتلاك الا لانه يحبك
حارس قام باس علي ايد الراجل ودماغه
وطلب انه يمشي
بنت الراجل قالت له. هنشوفك تاني
ابوها قال
اللي جمعنا من غير معاد وخلي بينا عيش وملح
قادر يجمعنا بيه تاني علي خير
فالارواح الطيبه اكيد عارفه طريق بعضها
روح يابني اسال الله ان يحفظك من كل سؤ
ويبعد عنك كل مكروه
وينجيك من كل كرب
حارس قال. انا اتاكدت من حب ربنا ليا لانه
وقع في طريقي ناس طيبين زيكم
ودعوتك دي ياحاج
ريحت قلبي وزالت همي
خرج  حارس. من بيت الراجل الطيب ده
راح للحاج كامل. في العنوان اللي معاه

باقي اجزاء القصه. هيتم عرضها.
الثلثاء والجمعه. الساعه التاسعه مساء
اتمني تنال اعجابكم 👍❤️