Tomorrow Programme

Part~8

မနက်စောစော သူမ၏မျက်နှာပြင်ပေါ်မှာ ဝင်းဝါသောသနပ်ခါးစိုစိုကို တွေ့ရတော့ နံနက်ခင်းတစ်ခုလုံး အဝါရောင်သန်းသွားသည်ဟု ခံစားရသည်။

သနပ်ခါးရနံ့ကိုပင် မြန်မာပိတောက်ပန်းရနံ့လိုလို ထင်ယောင်ထင်မှား စိတ်ကူးယဉ်ချင်လာသည်။

Jessicaကတော့ Yuriဝယ်ပေးထားသည့် သနပ်ခါးဗူးကလေးကို လက်ထဲမှာ လှည့်ပတ်ဆော့ကစားနေသည်။ Yuriက . . .

'သနပ်ခါးဝါဝါလေးလိမ်းလိုက်တော့ နင်က ပိတောက်ပင်လေးတစ်ပင် ဖြစ်သွားသလိုပဲ'

Jessicaက သူမလက်ထဲက သနပ်ခါးဗူးလေးကို စားပွဲပေါ်သို့ ဒေါက်ခနဲ ပစ်ချလိုက်ရင်း . . .

'တကယ်တမ်းကျတော့ ငါက ဒီလို ရယ်ဒီမိတ်ဘူးတွေ လိမ်းချင်တာမဟုတ်ဘူး၊ ကျောက်ပျဉ်ပေါ်မှာ သနပ်ခါးတုံးကို စိမ်ပြေနပြေပျစ်နှစ်နေအောင်သွေးပြီး လိမ်းချင်တာ၊ ကျောက်ပျဉ်ပေါ်မှာ သွေးလိုက်လို့ ထွက်လာတဲ့ရနံ့ကမှ သနပ်ခါးနံ့အစစ် .... '

Yuriက ပုခုံးတွန့်လိုက်ပြီး .....

'နင်လိမ်းချင်ရင် Fanyဆီမှာတော့ ရှိမလားမသိဘူး'

'ငါမေးကြည့်ပြီးပြီ၊ Fany က သူ့မှာ လက်ဆောင်ရထားတဲ့ သနပ်ခါးတုံးတော့ရှိတယ်၊ ဒါပေမဲ့ သွေးစရာကျောက်ပျဉ်မရှိဘူးလို့ သူတောင် မလိမ်းဖြစ်ဘူးတဲ့'

အဲ့သည့်စကားမှာတင် Yuriက သူမဆီရောက်လာမည့် အန္တရာယ်ကို ဖျတ်ခနဲကြိုမြင်လိုက်ပြီး ကမန်းကတန်း လမ်းကြောင်းလွှဲဖို့ ကြိုးစားလိုက်၏။

'အဲ့ဒါဆိုလည်း ထားလိုက်ပါတော့ဟာ၊ ကျောက်ပျဉ်မှာသွေးနေရတာက တကူးတက အချိန်ကုန်ပါတယ်၊ ဒီခေတ်ကြီးက အချိန်ကုန်သက်သာအောင် ရယ်ဒီမိတ်တွေသုံးရတဲ့ခေတ်လေ၊ ရယ်ဒီမိတ်သနပ်ခါးဗူးပဲ သုံးပါဟာ၊ ဪ ... ဒါနဲ့ ဒီနေ့ နင်ဘာစားချင်လဲ၊ နေ့လည်စာကို ဘာစီစဉ်လိုက်ရမလဲ'

Jessicaကလည်း လှစ်နေအောင်ပါးသည်။ Yuriလွှဲသော စကားလမ်းကြောင်းနောက်ကို မလိုက်၊ တမင်ပင် မျက်နှာကိုတည်ထားပြီး ......

'နေ့လည်စာကို ငါ မစဉ်းစားသေးဘူး၊ ငါ အခုစဉ်းစားနေတာ သနပ်ခါးသွေးဖို့ ကျောက်ပျဉ်အကြောင်းပဲ'