عيـــلتنــا ((باللهجه الليبية))

البارت الثالث عشر

#عيلـ★ـتنا
.
.
.
.

:بالك مش عاجبك
والشباب تلفتنا.
انا: اه .. لا لا عاجبني .
بوي: تعرفوا مرة تانية نسمعكم تقولوا س و ع  تي نهاركم احرف.
انا: حاضر.
بوي تلفت لمحمود: اهلين كيف حالك.؟
محمود: باهي ... الحمدلله.
بوي: اها .. به . ونزل.
انا نبحت في سالم: قتلك ماعاد تقولها في الحوش بــوي يطلع من اماكن غريبه في اي لحظه تلقاه قدامك.
سالم: تي باهي الزفت... بنمشي انغير.ومشى.
مروا من جنبنا البنات  بسرعة ونزلوا.
محمود: لااا عاد هكي هلبا.
انا: شني ؟.. بدينا شفّافين احنا؟
محمود: ربي يهدي و خلاص.
انا: هي محمود خود دبشك و بدل في الحمام((حشاكم))
محمود: به ... خدي دبشه من داري.
محمود: وينه الحمام؟؟
انا نأشر على باب : اوينا جنب دار دانا.
محمود تلفتت لوين ما نأشر: آه!.. ام باهي به... ومشى .
انا مشيت لداري غيرت و لبست تيشرت رصاصي نايك و سروال نوم اسود و طلعت لقيت محمود مازال في الحمام ((حشاكم)) و سالم يغير .. نزلت للجنان لقيت اصيل امقعمز بروحه و شارد ((سرحان)) و البنات قدامه  يقروا في روايات ... قعمزت جنب اصيل .
انا: بسـت.
اصيل:____
انا: ويـن سارح هذا؟
اصيل:____
انا: عن شكلك رد .
اصيل:____
انا ضربته بالمخده: يا حيوان انكلم فيك ((حشاكم)).
اصيل : تي هااا ها ؟
انا: قول نعم يا بلى .
اصيل: بالله اطلع من راسي.
انا: قول خيرك.
اصيل اتنهد: كبدت يا وسام كبـدت.
انا: اوووو.
اصيل: ايــه بالله.
انا: ومن تعيست الحظ هادي .
أصيل: باللـه .
انا: غر مني .
اصيل: وحده اسمها تسنيـم .
انا:به .
أصيل يتفرج على البنات: مقدمها الرواية اللي تقرا فيها هلال.
انا: لكن امليحه را .
أصيل: مبتش تخش لراسي .
انا: تي قويا هيا قاري حتى الجزء التاني .. لكن امغيرين اسمها مش نفس الاول.
أصيل: هي فيها جزء تاني ؟
انا: ايه ... اوينا الاول أرض الزيكولا و الثاني اماريتا .
أصيل: اممم .. قاري رواية الخيميائى ؟
انا: بـاردة.
اصيل: مش عارف نسمع بيها انا .
انا: مش مليحه هلبا .
أصيل: غر بحت بحت الرواية اللي في ايد ملك .
انا: ايه ... انتخريستوس  اطلع طوول.
أصيل: مش قاريها انا .
انا: اقراها مليحه را .
أصيل: به تمام .
انا: في رواية إسمها لا تفتح الباب مجدداً  اطلع طول ... كاتبها واحد ليبي .. اسمه معاذ على ما أظن .
أصيل: ايه سامع بيها .
انا: تو بندورها بي دي إف.
أصيل: احسن .. كان بتشريها مرات ما تلقاها و مرات غاااليه .
الشباب كانوا جايين ويضحكوا.
انا: حقى بنبيع سيارتي .
كلهم بحتوا فيا بصدمة .
محمود: هبلت حبيـب ؟
انا: لا والله بإنبيعها .
اسامة: عـلاش؟
انا: تي ما نعرف كيف قاعد عايش انا بيها في  البلاد.
سالم: إسمع مني وبيعها .
محمود و الشباب: لا لا .
انا: ايــح.
محمود: ما تبيعهاش يا راجل اشقيت فيها هلبا انت ... تي هاذي امنيه حياتك.
انا: شن الفايدة كان انحصل امنية حياتي ونفقد حياتي؟؟
محمود: تي خليها يا راجل والله مليحه.
انا: باهي خلااص ما صارليش.
محمود: به شويا نبيك .
انا نضت: شني .
محمود : تعالى شويا .. ومشينا ليــن وصلنا للملعب .
انا: تي ساد مشي قولي شن تبي.
محمود ارتبك:ااه .. ام .. انا .
انا: ايح عاد ..شن هالموضوع اللي مرتبك على خاطره .
محمود: د .. دانا.
انا: خيـرها ؟😠
محمود: تبي الحق .. انا نبي اختك ... يعني انا حبيتها .. تنفس بقوة ... نبيها تكون حلالي .
انا نبحت في محمود : هههههه.
محمود: شن في إيضحك .
انا: ههه .هه.. تي فجعتني يا راجل نحسابها امدايرة مشكلة .
محمود: باهي   شنو؟
انا: والله ... تي قاعدة صغيرة را ... يعني ... مشعارف ... انقولك قول لأمك تكلم امي و هما يتفاهموا .
محمود: باهي انت شنو؟
انا: واللهِ كان هيا موافقه انا موافق وين بنلقا واحد زيك ... لكن .
محمود: شني؟؟
انا: تو كان وافقت .. خليها خطوبه بس .. او اعطي فيها كلمة وخلاص
محمود: اصلا هذا اللي بيصير ... خلي تكمل قرايتها .
انا: تمام .
محمود: هي نرجعوا .
انا تليفوني بدي يرن ..بحتت في محمود: برا تو نلحقك .
محمود غمزلي : رتب امورك ... ومشى.
انا:الـو .
جنان: أهلين وسام كيفك .
انا: توا تمام.
جنان: دوم انشاء الله .
انا: دوم عزك و نبـض قلبك يــارب.
جنان: أجمعين انشاء الله.
انا: وينك رايفت عليك را.
جنان: هههه كيف كنا مع بعض .
انا بحتت في الساعة: اووو لا عاد تو الساعة :3 و كنا مع بعض الـ12:30
ساعتين و نص هلــبا را .
جنان: حتى انا رايفت عليك هذا علاش متصله .
انا: القلوب عند بعضها.
جنان: حقى... شن كنت بتقولي .
انا: لازم انشوفك باش انقولك .
جنان: اممم .. به امتى نتلاقوا ؟
انا : غدوا ... مع الساعة 5 العشيه.
جنان: به خليها مع الساعة 2.
انا: علاش!
جنان: ما هو نبدى كيف كملت محاضرتي.
انا: اممم ... مش عارف .. احنا غدوا بنمشوا للسوق بناخدوا حاجات رمضان.
جنان: غر هيا وسااام  على خاطري .
انا: جنان الساعة 5 نمشوا انا وياك لأي مكان يخطر على بالك ... الـ2 الولاد بيقعدوا ينقوا فوق راسي و مش حيخلوني في حالي .
جنان: به تمام ... اتصل بيا لما تطلع.
انا: به وين نلقاك .
جنان: قدام****.
انا: به تمام ... نشوفك غدوا .
جنان: تصبح على خير .
انا: قدامك الخير.. وسكرت التليفون و كملت مشي لين وصلت للولاد .
سالم: باهي إتذكرتنا.
الصيد: شن الكساد هوا .
انا: شن رايكم انغنوا .
اصيل و محمود: به .
انا: توا انديروا جلست راب .
محمد: مليحه .
أسامة: به جيبوا المنضومه.
ايمن و حسام مشوا و جابوا المنضومه.
انا: امالا وين حاتم و سمعه و رامي.
محمود: حاتم و رامي رقدوا و سمعه ما شفته من امبكري.
سالم: ما نعرف خيره بدي يختفي.
انا: ابصر.؟
أصيل: بتغنوا ولا لا .
انا: به ... كل مرا واحد فينا يغني.
محمود: انا بنغني لي أمتى.
أصيل: و انا الجو ابصر كيف.
انا:   انا بلساني و بلسانك ... بعدين انغنوا فيقوا يا ليبيين.
أصيل: ما نبي انغنيها انا... غني انت ومحمود .
محمود: به ... ابدى وسام هي .
انا: بلساني و بلسانك ..هما دقايق اصبر و خليك في مكانك اسمعني شن بنقول حط السماعات في وذانك بإسم ناسك يا ليبيا لتعرفيهم ندوي بلساني و بلسان كل واحد فيهم احنا شبابك اللي جونا فوق الكل  ما ناش الكل في الكل احنا في بلادنا ورد و فل اتربينا ع الاصول.. نحترموا في الناس احنا اللي لسانا يقول معاش نبي نشوف نحاس .. انحبوا نغيروا جونا كل خميس انديروا زريده .. عكست بليستيشن ما نحبوش الخسارة ... كل واحد فينا عنده امه بس الكبيدة ... اي حنا شباب اللي نحبوا البصارة  ... نيتنا صافيه  نتعاملوا بحسن النيه .. عارف مش الكل لكن صدقوني الأغلابيه .. احنا اللي فكل عشيه دهواري و هياجه صقع ع العالم حتى ما نكسابوا حاجة ... لي في جيبنا مش لينا .. نحسوا بهم الغير .. الطيبه ساكنه فينا و انديروا في الخير ..احنا ولاد البلاد .. عيونا مليانه .. احنا اللي نص صحابنا خليناهم في الجبانه ..انا كل شبيب من بلادك يا بنت بلادي .. انكون قريب وقت تحتاجيني تنادي ... قلبي طيب .. انتي قدعه وحنونه .. ولد بلادك هو اللي حطك في عيونه .. را مش كلكم .. شويا منكم لا غير لإن في الوقت هذا أغلبكم ما فيهم خير.... انا بوك يا ولدي  وريتك الصح انصحتك .. من غيرك عندي انا اللي نبي مصلحتك .. انا اللي تهمني صحتك انت وخوتك .. توا تكافي فيا لما كبرت تعلي في صوتك .. انا امكم يا صغاري .. نرفع راسي بيكم انا اللي ندعي ربي ليا يخليكم.. نبي نفرح بيكم انا لي نخاف عليكم ... بارك الله فيكم رفعتوا عليا ايديكم ... أسإل لي فقدهم شن معنى الدنيا من غيرهم .. اعرف قيمتهم يا اللي ناسي خيرهم ... لي نقول فيه مش كلام وبس .. كلام نحس بيه اللي عنده قلب توا يحس .. ما تهمش قيمتي عند الناس  قلب امي مكاني .. دويت بلسانكم توا بندوي بلساني ..اللي يعزوني بيني وبينهم دلاله.. فتحت عيوني عرفت الكورة من الرجاله .. ويلي نا فقتوني خلو وسام في حاله .. لي فخاطري قلمي كتبه و لساني قاله .. لالالالا... مش كل بنادم يعجبني ما نعجبش الكل ناس تكرهني وناس تحبني .. أصلا هلبا ناس طلعتها من الراس .. مايشوفوش في عيوبهم إيشوفوا في عيوب الناس .. خلوني في حالي نغني في راب حاجة تخصني.. أسمع شن تبي ريقي ميرسكاوي حسني .. كل حد وجوه و انا هكي أسلوبي الراب حاجه من عيوبي ما عبيتش منه جيوبي ..كلها زي بعضها لا صاحب لا حبيبه ..يا مايكرافون الوايت بوي انت حبيبه ..لي في القلب للقلب مهما الشي بعيد ... عشقت الراب و حبيت ريال مدريد.. عشت بعزة نفس  و الحريه و بعد النظر .. هادم اتلاته حاجات من ميزات الصقر ... خودهم عيش بيهم يعلى القدر ... وفوتهم حاجتين الخونه و الغدر ... واعرف ان مش كل طير يتكل لحمه ... وقليل البخت ينتشه كلب في الزحمه .. ناسك يا ليبيا إنشاء روسهم ديما عاليه .. ويزيدك عز سوق الجمعه يا غاليه ..وانتي يا بلادي انشاء الله تمشي في طريق مزبوطه ... فرحينا حتى بكلاكس و زغروته .
الشباب قعدوا يصفقوا و يصفروا و البنات مصدومات .
هلال: متأكد انك و سام؟؟
الشباب: هههههه.
ملك: لا مستحيييله .
محمود: ما عاد نبي نغني خلاص .
أصيل: ولا انا .
انا: هههه .. بحتت ايهم جاي من بعيد يجري ...خيره هوا ؟؟
أيهم: وسااااام يا وسام .. بثرعه تعالى .
انا: خيرك شن في .
أيهم وصل : تي إميما تبيك .. غر تعالى هيا .
انا نضت مع أيهم ومشيت بسرعة لإميما.
انا: ها إميما شن في .. بحتت جدي زعلان.
إميما:####.
انا: كيــف 😲😨
_________________________

آسفه تأخرت هلبا بهاذا البارت ...

بس والله عندي ظروف وما قدرت ننشر و لا نكتب ابداً ...

ادعولي متابعين.. 😭 ..💔

#حنين_الشوق  👋👋