عيـــلتنــا ((باللهجه الليبية))

(الجزء الثاني)البارت الحادي و العشرون

#عيلتنا

وسام﴾﴾﴿﴿

نزلت من الطيارة و انا في قمة التعب و الإرهاق استنيت محمود حتى ينزل و ركبنا في سيارة لموزين اللي ارسلها 'جون سميث' اللي مدايرين معاه الصفقة .
اول ما ركبت ..رقدت و غطست في النوم لين حسيت بالسيارة وقفت و لما تلفتت شفت الفيلا امتاعي بحكم انها سادس مرة نسافر لبريطانيا .... كلمت محمود و نزلنا و قلت للسائق ينزل حقائبنا ... فتحت باب الفيلا و كإني دخلت لفريز و مملكة اشتقت لجو بريطانيا و الخدم المتوزعين في كل مكان اهنى الواحد يقدر يقول انه ملياردير اهنى نقدر نمشي و معاي الحرس و ولا حد يكلمني بالعكس من كثر زياراتي لبريطانيا اصبحت شخص مشهور و الحمدلله ... انا ما ننكر ان ليبيا بلاد جميله و اهلها راقيين لكن في فئة في المجتمع مجرد ما تعرف انك غني يخطفوك او يخطفوا صغارك او اقاربك و مرات يقتلوهم لهذا دائما نحاول ان نخفي اني غني اول سبب هو حتى ما نحسس الناس بإني اعلى منهم و ما نبيهم يبعدوا عليا بالعكس نحب ان نعيش نفس الاجواء اللي يعيشها الشعب انوض الصبح بكري على خاطر الخدمة نوقف في طابور البنزينه نتشحط في الشمس و الله نحبهم الحاجات اهما لما انكون في ليبيا لكن لما نسافر نرجع لوسام الملياردير الدلوع المغرور زي ما يقولو .... =
ركبت الدروج و دخلت لداري .... جذبني منظر السرير و البرودة اللي في الدار ما استحملت و حذفت نفسي على السرير بدون اي تردد و رقدت.

-----------------------------------------------
نضت الصبح على صوت المنبه خديت دوش و بعدها نزلت لغرفة الطعام لقيت محمود فاتح النت و امقعمز ياكل بيد و شاد تليفونه بيد .. ابتسمت و قعمزت ...اول ما قعمزت بدى يجيني صوت الاشعارات لان عندي رمز نت محمود فطرت و محمود مزال يهدرز و يضحك و يتهيبل ... فتحت تليفوني و شفت الاشعارات و من الحظ شفت سمعة فاتح الواتساب قعدت انهدرز انا وياه و من موضوع لموضوع وصلنا للفيديو امتاع عمي ادم المهم ان سمعة عشش و سكن وهو يترجى ان نبعتله الفيديو امتاع عمي و التسجيل امتاع عبدالمالك ... قعدت نستفز فيه شويا و بعدها بعتهمله ... بعدين درتله مكالمة فيديو و هو طوول وافق .
سمعة: اووو ويسو شنج.
انا :تمام .. شن الامور عندك?
سمعة:تمااام.
محمود 'قعمز جنبي': اووو عريسنا .
سمعة: محمود شن جوك.
محمود: الحمدلله.
انا: حقى ... سافر بسام؟
سمعة:اي امبكري شويا... مشى لي بلجيكا
محمود: باهي مليح.
انا : اتصلت بالعيله.
سمعة: لا لا هما اتصلوا بيا.
محمود: مركك.
سمعة: عاد امقعمزين في الدلع توا.
انا: اللي يسمع يقول مقعمزينك في براكة في ليبيا.
سمعة: لا الحمدلله لكن الحاجة دارت جو الفلاحة لزت الخدامات اوينا.
محمود: اسمع را هما 5 ساعات را مش سنة قصدي تحكيلنا في دوة قديمة.
انا 'ضحكت': قصف .
سمعة: تفو باهي.. بعدين راعي فروق التوقيت يا راجل .
انا: وين مشعارف شن اسمها هذيكا.
سمعة: مني?
انا: تيي العروسة.
سمعة :شن خصك
انا: لا قصدي .. تهدرز و جوك مليح برا لمراتك عوفنا الزفت
محمود:اوو.
انا: اسكت حتى انت تولع في الفتنه
سمعة: اعييي يا مهزب
محمود: تي يا راجل انتحر برا .. متزوج را شن اعي متاعك اهيا.
سمعة: عاد فرحان بروحك في بريطانيا تلقح و جوك سمح تو نوريك لما تروح.
محمود: ايواه ايواه بتقعد شادها شهرين.
انا : خلاص اسكتوا تهدرزوا من الواتس متاعي... هي تشاو عندي مكالمة ' سكرت الخط على سمعة و رديت' : هلا بالصوت و صاحبته.
دانا : كيف حالك.
انا : تماام و انتي كيف حالك?
دانا: الحمدلله .
انا: كيف حال امي و بوي و الكل غادي.
دانا: تمام كلهم بخير.
انا: شن مدايرين!
دانا: اهو .. مقعمزة في الجنان انا و البنات.
انا: اه ... سلميلي عليهم كلهم.
دانا: يووصل ... حتى انت سلملي عليهم.
انا "باستعباط":مني?
دانا:اللي معاك.
انا : بالله عليك تو تبي تقنعيني ان ما اتصلتي بيه من اول ما ناض
دانا 'بخجل' : شنو؟
انا: تي عارفكم انا ... امالا علاش يضحك و يبتسم و موطي صوته تي نعرفها الزقاطة هيا.
دانا 'ضحكت': يا ذكي انت.
انا: امالا شني ... هي توصي على حاجة؟
دانا:سلامتك بس.
انا :سلمك... بالسلامة توا.
دانا:سلام 'سكرت الخط'
محمود :من كنت تكلم?
انا: نفس اللي كنت تكلم فيها الصبح.
محمود 'شافلي و سكت'
انا: شن الكساد اهوا.
محمود: حاله.
انا: تعالى نتمشوا شويا قبل ما نمشوا لشغل.
محمود : نغير دبشي و نجيك.
انا :به اصلا بنمشي نغسل. 'نضت و ركبت للدار'
غسلت و لبست تيشرت رصاصي مكتوب عليه و سروال اسود و سبيدرو احمر و نظارات Black of black درت شوية عطر و نزلت قعمزت في الصالة نستنى في محمود... شويا و نزل محمود لابس زيني غير على الازرق .
انا : تقلد فيا
محمود: وين نندري عليك
انا : انبصر عليك يا را اصلا مليحة هكي
محمود : به هيا قبل ما تجي الساعة 2
انا : تي هيا الساعة 12 مزال في وقت را.
محمود: ما عارفك غر نوصلوا للساعة تقعد سنة تتأمل فيها و تتأمل في الناس تقول عليك اول مرة تشوفهم و المشكلة كل ما نمشوا غادي تتأمل فيها
انا : مدخلكش
محمود: به هيا هيا
انا : هي ... برا اركب في الليموزين خلي انكلم السواق و الحرس.
محمود : انت يا حرس يا
انا : خيرك سكنت
محمود : لا حول الله
انا : محمود را حسيت انك مش طبيعي را
محمود : حتى انا حاس روحي هكي 'مشى'
انا 'كلمت الحرس و السواق و طلعنا'
----------------------------------------------

هلال﴿﴿﴾﴾
كنت امقعمزة انا و البنات في الجنان ... شويا و تليفون دانا رن ولما شفت المتصل لقيته "وسام" قلبي دق بقوة غريبة ... اشتقت لهذا الاسم الحق من غير مبالغة لكن والله الفيلا من غيره ماليها طعم كساد  مفيش حد ينكت علينا و يناشب و يغيرنا جونا بصفة عامة ... فكرت كيف ح انكمل حياتي من غيره ؟ كيف لما يتجوز ؟ حسيت بغصة واقفة في قلبي نضت و خليت البنات يهدرزوا و دانا تكلم في "وسام" .... مشيت لداري و قعمزت على السرير و انا نفكر فيه و كيف نقدر انكمل حياتي مع شخص غيره ... مجرد التفكير في هذا الشيء خلاني نبكي من كل قلبي ... مستحيل ننسى حب سنين حتى لو كان يحب غيري هو الوحيد اللي مالك قلبي ... حسيت انه فارس احلامي طيب و شجاع و كريم و جماله فوق كل المقاييس خيالي ❤
حطيت راسي على الوسادة و رقدت مع دوامة افكاري .

-----------------------------------------------
عند الولاد ..

كانوا امقعمزين في الجنان الا حاتم و حسام و اصيل و اسامة و ايمن (لانهم ما يسكنوا معهم) ,,

رامي : تي شن الكساد اهوا.
محمد: تؤ . . حالة الزفت .
الصيد : تي هما 5 اللي مهناش بس.
محمد: ال5 هاذو هما الجو كله.
رامي : يا شباب شن جو سالم?
محمد : بالله ما تقول يا شباب تحسس فيا اننا هلبا و المشكلة انا و الصيد و انت بس.
الصيد : تعالوا انقعمزوا مع البنات من الاخير.
°هيا°
-----------------------------------------------
عند البنات...
ميس : من عندها اغنية سيف نبيل ؟
دانا: كل الاغاني العراقية و الخليجية و الاجنبية عند ملك.
ملك : اما وحدة تبيها?
ميس : احبك تدري شتمنى .
محمد : تكسر ضلعي بالحضنة.
ملك : امتى جيتوا انتم?
رامي : شن رايك انتي؟
ملك😑
الصيد : كساد من الاخير را.
روان: هلبااا .
ميس : هيا ابعتي.
ملك : باهي الصبر .. وصلاتك?
ميس : ايه شكرا.
ملك : عفوا.
محمد :ملك عندك اغنية اشفي غليله؟
ملك :اكييد .
محمد: به ابعتيها .. و ابعتي احسن الاغاني اللي عندك.
ملك : الاغاني امتاعي يهبلو كلهم .
محمد : به عادي نجيب سماعات تسمعيهملي?
ملك : عاادي .
محمد : به دقيقة .' مشى'
رامي : ناقصين انتوا؟
°؟°
رامي : قصدي ... وين حسناء و هلال و مرام؟
رزان: حسناء في حوشهم و مرام عندها امتحانات و هلال مندري عليها.
ميس : كانت اهنا بعدين ناضت.
رامي : و دانا اهنا لكن خارج نطاق التغطية.
دانا 'قامت راسها' : اه ?
ميي : تكلم في محمود مش فاضية بينا.
دانا : خيره محمود ؟
رامي : سلميلنا عليه بس.
دانا : به.
ملك :*****
°***°
----------------------------------------------

النت تم هذا علاش تأخرت عليكم😊☺

°=ادعوا لطرابلس بالله💔=°