عيـــلتنــا ((باللهجه الليبية))

البارت الأول

يــوم الجمعة ..

وسام﴾﴾﴿﴿
كنت نازل من داري و لابس زبون أزرق و دانا مقعمزه تتفرج على التلفزيون
دانا : عريــس مشآء الله .
انا 'ضحكت' :منورة .
'خدت دانا البخور و قعدت تبخر فيا' : خويا ربي ينجيهولي إنشاء الله ربي يحفظهولي 💕
نزل بسام لابس زبون عنّابي : بخريني بخري .
دانا 'تبخر في بسام' : عندي خو زي الغزال انراجي في عرسه مازال .
بسام 'ضحك':  اهو الأربعاء الفاتحه والخميس العرس .
سالم 'طلع من داره بسرعة': بخريني .
دانا 'ضحكت' : ما يبوش ذهب و حرير يبو  سالم من الأخير .
'ضحكنا' .
دانا تبخر فيهم كلهم : عندي خوت تقول حكومة لباسين الغالي سومه .
أنا : عندي وخيه كيف النوارة عسل صافي ما فيش بصارة .
بسام: وخيتي راهي غاليه كيف ذهب إيطاليا .
سالم: عندي وخيه مش تنين ذهب عيار 24 .
'ضحكنا كلنا'
وحضنا  دانا💕
بوي 'نازل من الدروج' : هيا إنت وياه قدامي للجامع .
انا: باهي به .
بسام: بنمشي بسيارتي من يجي معاي
'لحظة صمت'
بسام تلفتلهم .: شني ؟
أنا : عندي سيارة الحمدلله و بناخد معاي سمعه و الصيد .
بسام 'تلفت لسالم' .
سالم: خيرها سيارتي البنزينه فل و معاي رامي .
بسام: خلاص بنمشي معاكم انت و رامي.
سالم: به .
بوي :مصح وجهك إنت وياه وأنا من بيرفعني .
أنا 'حكيت شعري بالمفتاح': عبدالعزيز و عبدالمالك و عمي .
بوي : مشآء الله و العزارة الثلاثة عندهم سيارات ولا واحد معاي .
أنا : خلاص تو يرفعك بسام هي سلااام..   وطلعت
____________
'نزلت وانا متشمت في بسام و ندور في سمعه لقيت عبدالعزيز نازل من الدروج اللي قدامنا درت الحوله وكملت طريقي لقيت جدي و أميما مقعمزين سلمت عليهم و بست راسهم و قعمزت معاهم'
جدي: ربي يحفظك يا ولدي و يخليك لشبابك .
انا : إنشاء الله .
إميما: قول لأمك و نساوين عمامك ينزلوا عندي إنطيبوا الغدى هما و البنات .
انا: إنشاء الله ... مشفتوش سمعه .
جدي: في الجنان براله .
أنا: به ...
أنا: اوو سمعه .
إسماعيل: وسام شن جوك ؟
انا: تمام يا بروّ  وين مختفي؟
إسماعيل:اهو في الدنيا .
انا: بنركب إنكلم امي و نساوين عمامي .
إسماعيل: علاش .
أنا: إميما تبيهم ينزلوا يطيبوا الغدى .
إسماعيل: تطيب مرت عمك أدم منحبااش يلويلي في بطني .
أنا: إمالا  مرت عمك محمد .
إسماعيل: باه به برا قبل ما نمشوا للجامع .
أنا : باهي ... 'مشيت'
_______  ________
في حوشنا ...
بسام: يا داناا
دانا "بخوف" : نعم
بسام : وين تليفوني
دانا "بإرتباك": ااه  ... عـ .. عندي .
بسام 'لفلها يدها': وشن يدير عندك .
أنا : بسام
بسام: خيرك
أنا : اطلق أختك
بسام: خفت تعرف
أنا 'دفيت يد بسام و خديت دانا وراي' : خيرك معاها
بسام: خدت تليفوني .
أنا : به ... دانا أعطيه تليفونه .
دانا 'مدت التليفون لبسام' .
أنا: خلاص تم الموضوع علاش العياط .
طلع بوي وهو يصفق : ربي يحفظك لوخيتك يا وسام ... 'تلفت لبسام' ... تعلم كيف تحل الأمور مش كله بالعصبيه و العياط ..وهذا الأربعاء بيتجوز
بسام: لكن يا بوي
بوي: ضم فمك وإنزل لوطا إستناني .
بسام : به
أنا: بري ومعاش تعاوديها .
دانا 'باست خدي': حااضر .
أنا: حقى دانا ..
دانا: نعم؟
أنا: قولي لماما و البنات و نساوين عمامي  قالتلهم إميما انزلوا طيبوا الغدى
دانا: حقا
أنا: تي ايه و انتي بتجنحي .
دانا : به به ..'لفت و مشت'
أنا: سالم.
سالم : تي خيرك ؟
أنا: ما خيرنيش غر بسرعه الجمعه .
سالم : تي الساعة 30: 12 .
أنا : زحمه الطريق اليوم .
بوي: هيا و انتوا ما تسكتوش قدامي تووا .
أنا و سالم :خيرك يا بووي.
بوي'ضحك' : اتسقدوا هيا .
ونزلنا .
_______  ______
في دار دانا .
دانا : هلول حبي شن جوك .
هلال: تمااام وإنتي .
دانا: الحمدلله ... اسمعي قولي لأمك قالتلنا اميما إنزلوا انطيبوا الغدى كلنا .
هلال: حقـا
دانا: ايه.. وقولي لملك ومرت عمك أدم .
هلال: به وإنتي كلمي  مرت عمي محمد و أم الصيد .
دانا : به .
_______   ______
بعد صلاة الجمعة ..
خشينا كلنا مع بعضنا للحوش و نسمعوا في التزغريت امتاع النساوين انا شدتني الضحكه من شكل الولاد، كلهم مستغربين و يشوفوا لي بعض جتنا إميما و هلال و بدوا يبخروا.
أنا: اللــه شن ريحت
هلال: بخور
أنا: لا لا الغدى
هلال: اااه ... عصبان و قلايه و رز أبيض بالمكسرات .
أنا : تي تفضلوا يا شباب خيركم واقفين 
هلال: تعالي يا دانا كلمي خوك .
دانا: الــاـّ وسام ايوه
أنا: ايوه
هلال: دلوووع .
ميس : اشي اشي اشي و دلوع العيله جى
أنا : اوووو ميس
ميس : وسام شن جوك؟
أنا: تمااام وين محمود ؟
ميس : في الجنان برا هو و أصيل و أيمن و أسامه و محمد و.
أنا : تي ساد ساد
ميس : به .
ملك: ووه قاعدين على الباب خشو .
أنا: ريتيهم
عمتي سهى : تي تعالو تغدووو
أنا: هيا هي
______  ______   _____
علي سفرة الغدى ملتمه العيله كلها .

أنا: حاتم غدوا عندنا إجتماع متنساش .
حاتم: لا لا تمام حتى إنتوا شباب مش تعطلوا زي كل مرة .
محمود و بسام وسمعة : لا لا
أدم : لا كلام على الطعام .
أنا نهمس لإسماعيل ((عمي)) : خيره هو بيكمل العصبان كله .
إسماعيل: غ  شوف وين موزع بناته في المطبخ ياكلوا .
أنا: ربي يهدي ... غر شوف روان كيف تاكل ع أساس متقززه .
إسماعيل: هو العصبان مستور أكثر منها 😂😂
و انفجرنا انا و إسماعيل ضحك وسكتنا بهزيبه من جدي و نضنا كملنا ضحك في الجنان .
إسماعيل : اه يا مهزب اه
أنا: كل ما ندكر شكلهم وهما يفنصو نضحك
إسماعيل: اي كان شفت أيمن عيونه بيطلعو
جانا أيمن : خيرني يا مهزبيين
إسماعيل : تفنيصتك اطلع طول يا ولد خوي
وجو باقي الشباب و قعمزنا في جلسه في الجنان  جنبنا نافورة و قدامنا بمسافه باهيه  جلسه تانيه  قعمزوا فيها البنات .
أسامه : يا بسام بتاكلها ماكلا البنت
بسام:____
أنا: تي غر عدل علينا الهم
بسام___
محمود صفق على وجه بسام: بـــي
بسام : تي خيرك
إسماعيل : اللي واخد عقلك
بسام: الكبيده .
سالم: نحطوهالك في ساندويتش
انا 'ضحكت': قويييه هيا
بسام: تي اهفتوا الهم
بسام: يا ـ .. شن بيقول فمي.' ومشى '
إسماعيل: هي جماعت الإقتصاد و 18 يتشرتعوا .
الصيد: ايح من قعد .
محمود: انا و إسماعيل و وسام و حاتم .
أنا: تي بالله كم واحد احنا نغلط فيكم الحق .
محمد: 13 من غير ولاد أدم و وليد و أيهم  .
أنا: به كم إقتصاد و كم ثانوي..
أسامه : 5في الشركة اللي هما بسام و انت و سمعه و محمود وحاتم و 5 إقتصاد اللي هما الصيد و سالم و رامي و محمد و حسام وأنا هندسه و أيمن ثانيه ثانوي و أصيل ثالثه ثانوي و ولاد آدم أداب.
جدي : مشآء الله ربي يحفظكم و البنات ترا .
أنا : البنات 11 .. امم 6 ثالثه ثانوي اللي هما ملك و فاطمه و هلال و دانا و ميس و حسناء  و وحده قانون اللي هي عأئشه و  روان هندسه ديكور و رزان تصميم أزياء و هويده حاسوب و مرام ثالثة إعدادي و أبرار صف ثالث .
جدي : الله يبارك مشآء الله لكن الأولاد أكثر .
أنا : أيه .
جدي بخبث : أحســ
أنا : علاش .
جدي : باش يتموا البنات عندنا .
أنا : شني
جدي "بإرتباك: لااا شي غر قلت الأولاد سند عندنا .
انا : آها به .
إسماعيل : يا وساام تعالى إجري
أنا : شني
إسماعيل : راهو ####
انا : نعــم!. اني جاي
______  ______  ______
شن قال إسماعيل لوسام ؟؟

متنسوش التفاعل ♥
الكاتبة :: حنين الشوق ..