#عيلتنا
.
.
.
.
جدي : سالم .
انا "بإستغراب" : خيره سالم؟
جدي : ليه إسبوعين ما اتصل بينا .... و لا سمعنا عليه اي خبر.
انا 'شفت للأولاد بصدمه'
هلال: جــدي .
انا "بعصبية" : امتى كنتوا ناويين تقولولي ؟؟ .
أسامة : غر بالشويه أهدأ .
انا : بالشويه ؟؟ تي شن تقول انت ؟؟ أسبوعييين را 14 يوم ... كيف يصير هكي كيف ؟؟ هذا خوي خووووي. كيف ما نعرف شن صايرله ؟
محمد : ما صايرله الا الخير ان شاء الله .
انا : محمد ... ترا أسكتلي ... المشكله ان ما في حددد مشغول باله عليه .
حاتم : لا عاد هاذي مش حق .
انا : و النبي تبكش ... كل واحد لاهي في روحه ... تي مش حاسين بالصدمة اللي صايره فيا توا .
رامي "ببرود" : اي عاد. بلا مبالغة .
انا 'وقفت' : مباالغه ؟؟ ... تسكت خير ما نجي نرفسك ... انا طالع و مش ح نرجع الا و معاي اخبار عليه . 'طلعت و الأفكار تلف في راسي... طلعت و انا نفكر و نتذكر في كلامه .'
______________________________________________
هلال ﴿﴿﴾﴾
قعدنا مقعمزين بعد ما طلع وسام و بعض الشباب واضح عليهم التوتر و الإنفعال
أسامة : علاش قلتله يا جدي؟
جدي : والله ؟ هذا خوه خوووه كيف ما يعرف .
محمد : اي يا جدي. لكن كنا ح نقولوله بشكل أفضل من هكي.
جدي 'شاف لمحمد و طلع'
أيمن : افففف ... ربك يستر .
رامي : خيركم مكبرين الموضوع؟
محمود ' ضرب الطاولة بيده' : تي خير بلاك انت ؟ ... شن مكبرين الموضوع تي هذا كان مش ميت مصاب را .... شن المخلوق البليد اهوا.
ميس 'شاف لمحمود بحزن'
محمد 'بهمس' : ميس يا محمود.
محمود ' تلفت لميس' : أسف.
ميس 'دمعوا عيونها و قعدت تبكي'
انا 'حطيت يدي على كتفها' : خلاص حبيبتي ادعي ربي يرجعه سالم.
محمود : خلاص اسكتي .
ميس 'زاد بكائها'
محمود 'تأفف وطلع'
محمد 'قرب من ميس' : خلاص ميس معاش تبكي ... بإذن الله ح يرجع .
ميس : باهي وينه لتوا وينه ؟
محمد : ميس ... سالم في الجبهة يعني اكيد مشغول.
ميس :ا يـ...
'قاطعها صوت نشرة الأخبار'
الكل تلفت للتلفزيون ...
الخبر كان :: انتصرت قوات الجيش على ما يسمى بداعش بسرت و درنه ... ولكن كلفهم هذا الإنتصار العديد من ارواح المجاهدين ..
في لحظتها ميس انفجرت بالبكاء و ما قدرت تسكت.
محمد 'تلفت ولقى رامي مقعمز و في يده جهاز التحكم. و مبتسم بخبث' : رامي .
رامي 'تلفت' : خير !
محمد 'قرب و شد رامي من سوريته' : علااش علاااش فتحته ! خير بلاك اليوم ؟
رامي : تي حول من عليااا حوول.
أسامة 'قرب منهم' : رامي !! صاحي انت؟
محمد : اكيد صاحي اصلا هذا طبعه الكلب 'حشاكم'
أسامة : لا لا الواضح انه سكران او زارط حاجة .
محمد : في الحالتين واطي.
اسامة : تي اسكت يا راجل. و اطلق الفرخ.
محمد : منيــش.
اسامة ' فك رامي' : اطلع برا و ما تورينا وجهك .
رامي 'ابتعد من عليهم و هو يهلوس بالكلام'
محمد : علاش خليته يفلت!
أسامة : تي فوته.
محمد 'بعصبيه' : تي شن نفوته شني ... شوف حالة اختي بعد ما سمعت الخبر تي والله العظيم ماني مسامحه على كل دمعه نزلت منها و الله 'طلع'
انا 'تلفتت لميس' : ميس خلاص ... ان شاء الله سالم بخير.
ميس ' وقفت و الدنيا تلف بيها' : لا. لاا سالم لااا.
ملك : ميمي استني .
ميس 'و الدموع في عينها' : لا ياربي لا. لاااا... 'بهدوء غريب'. لا ل. لا 'داخت'
انا : ميــس .. 'مشيتلها '. ميس مييييس.
أسامة 'وقف قدام الباب اللي يطلع للجنان'. : محمــد. يا محمد تعالى بسرعة.
محمد 'دخل' : خيركم ..'تلفت و شاف ميس' ... ميس. خيرهاا !! ' قامها . و طلع من الباب الخلفي'
انا : محمد. استنى استنى.
محمد :نعم!
انا: ما نبوا النساء يعرفوا ... بعدين يقلبوه عزاء ... برى من الباب اللي يطلع على الدروج .
محمد: وبعدين وين بنحطها!
ملك: تو نركب معاك. حطها في حوشنا.
محمد: تمام .
'ركبنا و فتحتله ملك الباب. حطها في دار ملك و قعمزنا في الصاله'
محمد 'حط راسه بين يديه'
انا 'نضت و مشيت للمطبخ حتى نخلي فرصة لمحمد يهدرز مع ملك😁 .. وقفت ورا الباب و قعدت نسمع 😂'
محمد : آخ يا ربي .
ملك : خيرك!
محمد : نفكر شن صاير في سالم ... واعرة والله واعرة ... تسمع خبر يقلب جوك كله. خبر يطعنك و يجرحك. و في اغلى الناس ليك ... انا الراجل و ما قادر نتحمل اكثر من هكي ... مبالك ميس ... ميس البنت اللي ماترضى تقتل نمله تسمع اللي سمعناه ... 'شاف لملك'... حطيها في عيونك بالله .
ملك 'حطت يدها على كتف محمد' : أكيد من غير وصايه ... و سالم بخير بإذن الله ... ح يرجع و انا متأكدة من هذا الشيء.
محمد : ان شاء الله 'ركز نظره على الأرضيه و واضح عليه التفكير'
ملك : محمد في شيء تبي تقوله؟
محمد 'شاف لملك بتردد' : تبي الحق ... في شيء نبي نقولهولك لكن حاس الوقت مش مناسب.
ملك : شنو قول!
محمد 'حط عينه في عين ملك بثقه' : ملك انا ... انا نـ....
ايمن : محمد.
محمد 'وقف' : خيرك؟
ايمن : تعالى الولاد يبوك.
محمد : انزل تو نلحقك.
ايمن 'هز حواجبه' : لا انزل معااي.
محمد : اففف .. به هيا 'نزلوا'
انا 'طلعت للصاله' : اففف .
ملك : خير؟
انا : من وين بيجي الخير ؟
ملك : تعالي نشوفوا ميس.
انا : به 'دخلنا للدار.. ملك خدت كرسي و قعمزت قدام السرير و انا قعمزت جنب ميس ع السرير'
ملك : ما بعدها الزفت.
انا 'حطيت ايدي على خدها' : حي هاذي سخونه هلبا .
ملك : تبصري!
انا : والله .
ملك 'طلعت تليفونها' : بنكلم محمد .
انا : اي بسرعة .
ملك : الو .
محمد : ايوا ملك .
ملك : محمد. را ميس عندها حرارة .
محمد : هلبا ولا شويا .
ملك : تغلي .
محمد : تبصري .... تو نشوف دواء من الصيدلية. بسرعة و انجيكم .
ملك : تمام. ما تتأخر بالله .
محمد : تمام .
انا : بري جيبي ميا مصقعه و كلينكس ولا طرف قماش ... بنديرلها كمّادات .
ملك : تمام .. 'طلعت'
انا 'شفت لميس' : ربي يعينك يا ميس.
ملك 'جت بسرعة' : هاك .
انا 'خديت من ملك و قعدت اندير لميس في كمَّادات'..
أنت تقرأ
عيـــلتنــا ((باللهجه الليبية))
Novela Juvenilرواية ليبيه تحكي عن صغار عم والحب اللي ترعرع بينهم و المشاكل العائليه و الهياجات و المقالب اللي داروها وماعمرهم ما دسو على بعض حاجه 😍 1# - طرابلس #1 - بنغازي #1- ليبين 2# - ليبيه #2 - رومنسيه 4#- ليبيا هاذي هيا العيله ... #عيلتنا 💙 للكاتبة...
