زوجة لسبعة أيام

٥

قمتا ، اتوضيت و صليت العشاء ، و مشيت اطمنته على حبوبة ، لقيتا نايمة حمدلله .. براحه جريت سريري جمبهاا مافي فرقة ، جيت ارقد ، حسيت بصوت كركبة كدا ،، عاينت علي الحوش في لمبة حمرا ، قمت وقفت علي حيلي ، بعاين من الخوف رجعت سريري غطيت لي حبوبة وشها و غطيت وشي و اتكرفستا ، برجف رجف حاولتا ازح الملاية من وشي م قدرتا ، لمن حسيت الكركبه راحت شويه حسيت بي نعس ، مستجدة البيت واول ايام لينا فيهو ، لمن نمت متين و كيف م عارفه ، صحيت بي صوت حبوبة بتقح ،، قمت عاينت ليها لقيتا زي المشروقة ، جريت مليت ليها كوز المويه ابت تشرب ، بعاين ليهاا ، عرفت عشان قصدها ما اتسوكت .. 
طوالي جريت سريري من جمب سريرها ، و قومتها سندتها ،، و انا بسند فيها سمعت الباب بخبت ، قلت لحظة و وصلتا حبوبة الحوش الورا محل العنقريب البحميها فيهو ، و جريت ختبت لي توب في راسي و مشيت فتحتا ، لقيتا خالتو صفية .. شايله صينية ، و بتقول لي افتحي ضلفة الباب التانية ، قلت ليها ددا شنو يا خالتو ، قالت لي يا بت الصينية تقيله افتحي افتحي ،، قلت ليها حاضر حاضر 
فتحت ليها الباب و شلتا منها الصينية ، خليتا قفلت الباب و دخلنا .. ختيت الصينية في التربيزة و لقيتا ماشه ، قلت ليها وين ماشه ؟ قالت لي جبت ليكم الفطور انتي و حبوبة ، قلت ليها والله ما عارفه اقوليكي شنو لكن م كان تتعبي نفسك ، قالت لي تعب شنوو يا بت ، يلا فتكم بعافيه ، قلت ليها اقعدي افطري معانا ، قالت لالا بمش افطر مع راجلي يلا يلا .. قلت ليها شكرااّ .. خليتا قفلت الباب و مشيت لي حبوبه ،، قلت ليها حبوبه انتي اسي دايرة تتسوكي لشنو توقعي باقي سنيناتك ديل ههه قعدت تضحك ، حميتا ولبستهاا و بقيت ادندن ليها و تتبسم ساي ، جدلتا ليها المسيرتين و وضيتا ، و خليتا مشيت فرشت ليها السرير حقها .. و حيت رجعتها .. جريت ليها صينية الفطور ماشاءالله لمن شلت هم ارجع ليها الصحانه دي كيف ولا املاها بشنو ما عرفتا ، كل الفكرتا فيهو بكرة اسوي لي حلة نعيمية بالعصيدة و اودي ليها من القروش الادتني ليهم (عزة ، ام البنات الكنت شغالة عندهم ) .. 
بقيت باكل و بأكل في حبوبة ..

( في جانب تاني )
_مبرووووك يا عريس ّ
*الله يبارك فيك عقبالك 
_منو دا هههههههه يا زولي انت ليك كم بتعرفني ، بي ذمتك انا زول عرس ؟ وشي دا براهو كداا وش عرس ؟
*ياخ يمكن ربنا يهديك و تمرق من عرسي دا بي عروووس حليونة كدا تقنعك ّ..
_باقي ليك وحدة تقنعني ههههه ّ..
*ما بعيد عن ربنا ،..
_ اهاا عروستك دي ما عندها صحبات كدا ولا كدااا..
*هو انا عروستي ياداب حأتعرف عليها ..
_والله يا احمد انا ما عارف انت كيف قبلتا الموضوع دا ..
*كل حاجة بتحصل لسبب يا عمار 
_المهم يا صحبي الف مبرووك خلينا نتحرك بعد دا عشان ما نتاخر على الناس 
*يلا ، خلينا بالمرة نعدي على مهند ومحمد و لا وين قالو حنتلاقى ؟
_لا هما بجو علينا 
*عديلة ربنا يسهلا .. 

خلصنا اكل ، شلت الصينيه غطيت باقي الاكل ، طبعاً ما وريتكم انا مدمنة شعيرية ، و خالتو صفيه زي التقول عارفه بحبها بيضا كمان ، بقيت ماشه وجايه علي الصينيه اصلاً كان ما خلصتا الصحن دا ما حرتاح انا عارفه نفسي هه .. 
اتزكرتا اني مفروض اطلع اجيب لحبوبا العلاجات المنتهية ، جريت لبست عبايتي و شبطي و شلت شنطتي ، و جيت لحبوبه ، قلت ليها انا حأوصل الصيدلية واجي راجعه ما بتأخر ان شاءالله .. قلت لي تمام ( هزة الراس) .. 
شلتا المفتاح و طلعتا ، و الجو ما يحتاج اقول ليكم حمدلله بس ، قفلت الباب قفلتين بالمفتاح و طلعتا ،، مواربه يدي مع وشي عشان الشمس ، وانا هنا اصلا ماعارفه لي محل صيدليه ،، بس ياهو بتلفت جاي و جاي و بسأل لمن لقيت لي وحدة .. وصلتها و دخلتا وريتو الدواء ، لمن قالي مافي انا شلتا الهم لمن مسكت راسي ، قلت ليهو مافي صيدليه تانية قريبه من هنا متوفر فيها العلاج دا ؟ 
قال لي دا ما حتلقي الا في صيدليه ال(...) و دي بعيدة من هنا .. اتوكلت على الله و طلعتا من الصيدليه ، بعد طلعتا اتزكرت القطرة ، رجعت تاني قلت ليهو معليش القطرة دي موجودة ؟ قالي لي ايوة ..
انتطرتو لمن جابا لي ، قلت ليهو بكم ؟ قالي 65ج ، 
فتحت شنطتي ، بفتش ، مافي حاجة ، قلت ليهو لحظه معليش ، لمن اعصابي باظت ، قعدت ف الكرسي ، و قلبت الشنطة دي فوق تحت مالقيت ولا جنيه ، لمن عيوني دي دموعو وبرجف و بقول للصيدلي والله انا عندي قروش و كنت خاتاها هنا ، كانت في انا متأكدة والله في والله في ....

#استككانة^😒~

يتبع ......