زوجة لسبعة أيام

٢٨

صحيت الصباح حوالي الساعه10 .. كل ما انزكر الحصل بليل انا بكره نفسي و دمعتي تجي جاريه ، بس والله تاني اليهبشني انا ولا حبوبتي الا اكلو ب اسناني .. 
حممتا حبوبه و عملتا برامجي ككلها ، للفطور عملتو ، عاينت للعلاجات حقت حبوبة لقيت فضلت حبة ،كدا عرفت ان عندي مشوار بعدين للصيدليه .. مشيت شلت ملابس سلمى بالفستان ، رجعتهم الكيس و ختيتهم ..
و قعدت لاحظت حبوبه كدا بتعاين فيني زي الزهجت من الرقاد الكتير كدا ، الكلام دا كان العصر ، ومعاها حق 24 راقدة م بتقوم الا للحمام .. طوالي عاينت ليها كدا ! قلت ليها حبوبة انتي زهجانه صح ؟ قالت لي لا ، قلت ليها بس انا زهجانه ، تجي نطلع ؟ طوالي برقت لي عيونها كيف تطلع يعني ، قلت ليها اااي نطلع .. طوالي ولا فكرتا ،قومتا حبوبه دخلتها الحمام و لبستها توبها البتحبو و الشبط ، و لبست عبايتي و طرحتي ، يلا عندي الكرسي بتاع الاعاقه داك من فترة كان ادتني ليهو ام البنات الكنت شغاله عندهت لو تتزكروها المشت مدني .. طوالي طلعت الكرسي نفضتو من التراب و لمعتو ، و جبتو و نزلت حبوبة فيهو ، و شلت شنطتي و طلعتا ، لمن وصلت باب الشارع فتحت الضلفتين طلعتها و قفلت الباب ، و الله الفرحه الفي وش حبوبه دي ما بتتوصف ، رغم انها حاسه انها متقله علي بس م عارفه انا فرحانه قدر شنو بيها و معاها ، مع وصلتي الشارع لقيت عربيه داخله شارعنا وانحنا طالعين و فجاة وقفت ! 
عاينت لقيتا دي عبير اخت احمد ، قالت لي اسي جايه اطمن عليكي ماشين وين ؟ ( رغم انها م بتقصد تتطفل لكن م بحب زول يتدخل ف ابسط حاجاتي ) سكتا م رديت ، قالت لي على العموم حبيت اتطمن بس و لقيتكم بخير ، تحبي نوصلكم ؟ قلت ليها شكرا م عندنا اتجاه معين ، بنتمشى بس ، قالت لي طيب ممكن رقمك اتطمن عليكي فيما بعد ؟ 
قلت ليها والله م بعرفو لكن مع رحب ورغدة ، قالت لي ياساتر من غير م تحس ، قالت لي طيب تمام يلا م اعطلكم ، قلت ليها تسلمي ، و اتحركنا انا وحبوبه لافه بيها بالكرسي و هي مرتاحه وم عندي قضية بي زول ، لفينا تمام و بوقفا مرات بقعد في مسطبه واخليها قدامي اونسا شويه و نقوم نكمل ، لمن لقيت صيدليه ، عايزة ادخل و م عايزة اخلي حبوبه براها بقيت بين نارين لانو من خوفي عليها ، بتخايل لي ممكن العجله تتدحرج براها ، بقيت واقفه ، جات مرة منقبه ، قلت ليها ازنك خليكي واقغه جمبها حدخل اسال عن العلاج دا ! قالت لي جدااا .. دخلت سالت سرعه م لقيت العلاج ، رجعت شكرت المرة و كملنا ، عرفت كدا م لي حل غير صيدليه وليد وهي الاقرب ، بقيت مترددة امشي ولالا .. 
لمن حبوبة بقت تحاول تتكلم عرفتها جاعت والمغرب قرب يأذن .. 
سقتا العجله سرعه سرعه و قطعت بيها الشارع ، و منو الصيدليه ، دخلت بالعجله لانو مافي عتبة عاليه .. و لا عاينت الواقف منو، طلعت الروشته والحبوب و القروش القديمة والجديدة ، ع الحظ ف الولد التاني واقف ، جاب لي الحبوب و اديتو القروش و قروش وليد قلت ليهو. اديها لي وليد قوليهو قروشك العند علياء ، سبحان الله وانا بلف بي عجلة حبوبة كدا لقيتو في وشي ..اتخلع 
و وقف ، قلت ليهو عن ازنك ، قعد يعاين في حبوبه و حبوبه دي طبيعي مبتسمة لاي زول فا وشها بشوش و تتحبى .. 
قالي علياء ! م رديت عليهو. قالي لحظة 
م رديت ، قالي انا اسف و بعتذر بخصوض امبارح ، قالت ليهو حصل خير و مشيت ، قالي لحظة ! وقفتا ، قالي ممكن اتكلم معاكي ؟ عاينت ليهو ، وقلت ليهو وانت اسي بتسوي في شنو !هدا قاعد تتكلم معاي ! 
سكت ، قلت ليهو واضح انك ما عندك حاجة تقولها ، عن ازنك ، قالي ما عارف انا بس حاسي اني عايز اعتذر كتير ، قلت ليهو قبيل قلت ليك حصل خير بس لو اتناقشنا في الموضوع م حيحصل خير وقتها عن ازنك ، دفرت العجله و مشيت و خليتو واقف ، طوالي مشيت علي اقرب دكان اشتريت قزازة مويه اديتا حبوبة ، رغم انه من هنا البيت قريب ، بس كان لازم اغشى السوق جبنا فول جاهز و كم حاجة ، و مشينا البيت 
لمن وصلنا حبوبه دي بقت تفتح و تغمض نعست ، دخلتا البيت و شطفتها و وضيتا ، و قعدتها في السرير ، اكلنا و بعداك غطيتا و نامت طوالي ،، انا بقيت بلم الاكل وكدا ، و عندي شويه حاجات غسلتهم عشان ما يتردمو لي ، و كالعاده رجعتا رقدتا بعاين في حبوبة و رجليني تنتح من المشوار ، لمن نمتا ، اخدت ككم يوم على الحال دا ..

( في جانب تاني احمد) 
* يا زول طالما هي موافقه على بركة الله..
_ مش انا راجل يا احمد لكن كان بعرف ازغرت كان زغرتا لي روحي ..
*والله دا حب دا ! من متين يا معاذ و م تقنعني تقول لي شفت عبير في العرس لانه نص العرس م حضرناهو و تصرفاتك دي تصرفات زول عاشق عديل ..
_والله الرجال ما بكذبو ، لي اكتر من سنة بحبها و ( لمن شاف عبير بتعاين لبهو ، قاليها ما تعايني لي كداا في النهايه انا جيت بالباب و لو اترفضتا ما كنت حأبطل جية و الصح والحق مافي احلا منو ) 
*لو زول غيرك يا معاذ انا كان حيكون لي تصرف تاني ، ربنا يتم ليكم علي خير . 
_حقك علي وانا اسف .

. ّ
*ما بينا يا اخوي .. 
في اللحظات دي رحاب كانت بتتكلم مع ايمن في غرفه احمد القديمة في بيت اسرة احمد

*ها حبيبي 
_اخيراً اتزكرتيني !
*انا اسفه يا ايمن بس والله انشغلتا ..
_بالايام لكن معقوله ما لقيتي زمن لي !
*احمد كان اجازة م شغال الكم يوم الفاتو ديل عشان كدا كان صعب نتواصل. .
_طيب داير اشوفك 
*انا بقيت كل ما اتكلم معاك تقولي دابرة اشوفك يا ايمن عكس زمان لمن كنا مرتبذين قبل زواجي ..
_يا روحي الحال اتغير انتي بقيتي مرة راجل و بقيتي حلوة و في حاجات م كان بينفع نعملها لكن اسي غير و انا ما بشبع منك صراحه ..
*انا بقيت بحس انك بقيت داير تقابلني عشان كدااا ؟ *قاطعها احمد ، و قاليها هو منو االبقى عايز يقابلك عشان كدا و بيضحك نظام يشغلا ليها ( شوفو درجة الثقه الخاتيها فيها )..
بقت تمتم .... 
قاليها بهظر معاكي يا روحي خليكي تاكيه ، والله ياخ اشتقت لغرفتي دي ، قالت ليهو قصدك ايام الشباب ؟ قاليها في زول يكون قدامو القمر دا و يشتاق لايام السنقله ، قالت ليهو بالله ، قاليها والله ، و بالمناسبه متلك قاعده هنا و سايبه الضيوف براا ؟ 
قالت ليهو م عارفه مرهقه كدا رغم اني ما بعمل حاجة غير انوم واكل ، المهم الحصل شنو ؟ قاليها الموضوع تم على خير ، قالت ليهو بالسرعه دي ؟ قاليها ايوة و اتخيلي معاذ و عبير بيحبو بعض ليهم فترة و معاذ ...**قاطعتو 
هاجت كدا فجأة قالت ليهو دي خيانه اسمها قحبك طعنك ورا ضهرك كيف يحب في اختك من وراك ،و بعدين دا اكيد ما حب ، معقول معاذ يحب عبير ! 
قاليها اعصابك في شنو لمن خلعتيني ؟
قالت ليهو انا بس بفتح عيونك ، قاليها انا عارف معاذ دا اخوي و انتي فاهمه غلط ، قالت ليهو ولا غلط ولاحاجة ، دا الصح بس انت عشان مسكين م عارف نوايا الناس (شكلها كانت بتقصد نيتا هي ) .. 
قاليها لا فاهم و خصوصا اصحابي ، كان ما صحبي انا عارف اخلاق اختي .. 
قالت ليهو اختك دي !! ( ب استفزاز) قاليها ايوة اختي دي عندك مشكله ؟ 
قالت ليهو العفو ست البنات .. 

#استككانة~"