زوجة لسبعة أيام

٣١

بعدها بي ثواني في *تلفون احمد* : في الواتساب ،تم استلام صورة من رقم(815)091 بعد فتح الرسالة .. 
*دي شنو الصورة دي ؟ غرفتنا ؟ و دا منو الرقم دا ! بسم الله .
ام احمد : في شنو يا ولدي بقيت تكلم نفسك ! 
*والله يا امي انا زاتي ما عارف بس رقم غريب مرسل لي ..
ام احمد : التاس دي بقت فارغه ساي يا ولدي..
*علي قولتك ( يلاااا يا عبيييييير ) ..

( في جانب تاني )
*هالة عليكي الله اقعدي ياخ بيتو معاي عليكي الله ..
_يا بت انتي هبله كيف ابيت و اخلي راجلي لمنو يختي !
*يعني ليله وحدة حتفرق ؟
_اااي و غير كدا ما جايبة غيارات لأولادي و لا لي و بعدين وينو سرايرك للبيتان ..
*حمدلله يا زوله القلوب لو كبيرة المكان بشيل الف ..
_بيتك دا ما بيت فاهمه ، شدي حيلك يا علياء رغم اني عارفة انك بتعملي العليكي بزيادة بس دا ما بيت يستر ليهو بت ، وانا لو ما قاعده في بيت اهل راجلي كان جبتكم عندكم بس كلها مسألة وقت .
*يا زولة ربك يلطف .. ّ
_امين يا رب ، صحي من جيت دايرة اسألك ، ديل منو البرحلو من جمبكم ديل ؟ّ
*وين دا ما شفت حاجة !!
_البيت البيبانو خضرا ، قدام شويه ..
*بيبانو خضرا ! هي انتي متاكدة بيرحلو ؟
_اااي 
*كدي اتأكد ، لحظه ..
_لحظه اتاكدي لمن تقدمينا ، يلااا انحنا نتحرك قبل تمغرب ..
*طيب يلاا 
_سمح لفي توبك حتمرقي كدا ؟
*هي نسيت ههههه ارح 
طلعت معاها لحد برا جمب الباب ، عاينت للبيت البيبتنو خضرا و طلع بيت ناس خالتو صفية ، ااااي زعلتا لانه العشرة م بتهون الا على اولاد الحرام و هي ما غلطت فيني بالعكس ، لمن هولة لاحظت لملاحي اتغيرت ، قالت لي :
_مالك اسي كل دا عشان انحنا ماشين ؟
*لا عشان البيرحلو ديل ناس خالتو صفيه حتفرق معاي و اكيد راحلين بسببي ..
_انتي متخلفه !
_منتظرة يغتصبك ! و لا يقعد يسرق فيك كل شوية ؟ ( انا حكيت ليها )
*يا هاله انا بتكلم عن مرتور، م غلطت علي والله وقفت معاي كتير حتى الاكل كانت بتجيبو لي انا وحبوبة ، حتفرق معاي والله .
_معليش كله لخير م تزعلي . 
*العربيه دي ما غريبة علي !
_وين ؟
*الداخله دي 
_اهااا... يا بت هوي انا ماشه يلا ودعتك الله و تلفونك دا م تخلي مجدوع عشان بتصل لمن روحي بتمرق ..
*طيب ، يلاااا و اوعي تمدي يدك علي الاولاد ديل والله ازعل منك يا هاله .
_دلعيهم لي خربيهم ..
*الدنيا فيها شنو خليهم يتدلعو الما لقينا احنا يلقو هم .. 
_العربيه دي وقفت هنا ولا انا بتخيل !
*يمكن داير يعدي ، حركي انتي يلا المغرب قرب ..
_تمام يلاا..
*سلااام .... 
و هي ماشه باب العربيه كان بيفتح ، و نزلت عبير ، و الشباك فتح شفتا احمد في العربيه ، استغربتا بيني و بين نفسي ، انتظرتها لمن جات ، و لقيت احمد طلع من العربيه جا وراها ،وصلتني مبتسمة ، و بلهفه كدا سلمت علي ، قالت لي ازيك يا علوشه ياقول سلوم ، قلت ليها كويسه حمدلله ، كيفك انتي وكيف اهلك طيبين ؟ قالت لي حمدلله ..و جا احمد سلم علي قالي انتي كويسه ؟ قلت ليهو الحمدلله ،، عاينت لعبير و قلت ليها اتفضلوو 
احمد قال لي عبير خشو جوا و انا بنتظرك هنا ، قلت ليهو م صح تقيف برا و بعدين حبوبتي جواا .. قالي عشان حبوبة دي انا حدخل اسلم عليها و اطلع .. 
فعلاً دخلنا ، عبير سلمت علي حبوبه و قعدت و انا بقيت واقفه لمن احمد جا داخل ، مشى علي حبوبه و باسها فوق راسها و سلم عليها بحنية كدا غريبه زي التقول بيعرفها ، بس عامتاً كدا كلنا عندنا حنين تجاه الحبوبات و محبتهم م عايزة ليها اسباب .. 
قمت مديت ليهو كرسي البلاستيك قالي انا طالع خليكي مع عبير عايزاكي ف موضوع ، قمت ختيت الكرسي بزاوية من عبير وبقيت م شايفه احمد مدياهو ضهري ، قلت ليها كيف اهلك طيبين ؟ و انا في اللحظة دي اتزكرتت كلام النسوان عن زوجة احمد انها كعبه ، و بعاين في عبير على اساس انها زوجة احمد و بش ف انها ضحوكة و ظريفه عكس الكلام دا .. المهم ردت لي قالت لي انحنا بخير ..
بس انا جاياكي في موضوع ، في اللحظة دي احمد طلع ..
قلت ليها خير !
قالت لي بصراحه في شغل ، و انتي بتشتغلي عادي في البيوت صح ؟ قلت ليها ايوة م عندي مشكله ، قالت لي طيب زوجة احمد اخوي حامل و هو ما عايزها تتحرك ، بس كل العليكي تنضفي و تطبخي و الحاجات العاديه و لو وافقتي ، انتي بعداك بتتفقي معاهم على اوقاتك وتحددي ايام شغلك ولا اذا حتنقلي عندهم انا بس حبيت اعرف رايك مبدئيا ً ، قلت ليها ليه بتتكلمي علي اساس اني حأمشي لناس تانين غيركم ؟ 
قالت لي فعلا حتمشي بيت احمد !
قلت ليها بيت احمد ما بيتك ؟ 
قالت لي ايوة يا بت احمد ستكن برا ما معانا و احمد اخوي م مركزة انتي ؟
قلت ليها م ركزتا والله ههه اعفي لي 
قالت لي لا عادي ، بيتو ياهو بيتي ، المهم قلتي شنو ؟ 
قلت ليها موافقه و عاينت لي حبوبه .. 
قالت لي ربنا يعينك ، و انا حأمشي اكلم احمد ويجي يتفق معاكي ،، قلت ليها طيب ، و طلعت 
بعد شوية رجعت ، قالت لي هو حابي يتفق معاكي ، قلت ليها تمام يلا .. 
طلعنا جمب الباب ، قالي زي ما عبير

ورتك وان شاءالله ما حتصايقي مننا ، زوجتي عصبيه شوية و مع الحمل دا ربك يلطف، لكن معليش اتجاوزي اذا ضايقتك بكلمة وان شاءالله ترتاحي والدايراهو م بنختلف ، قلت ليهو انا مستعدة اجي كل يوم انضف واعمل كل حاجة بس دا كلو اخصق ليهو زي اربعه ساعات او بعد م اخلص ارجع عشان حبوبة ما بقدر اخليها وقت كتير براها ..
قالي خلاص تمام ودا راي انا برضو ، و انا من بكرة دايرك تجي تتعرفي على المدام و تبدي شغلك ، قلت ليهو انا بقدر اجي من الصهر لحد مواعيد الغداء و العشاء بيكون جاهز وتاني يوم بغسل عدتوو ،، قالي لا عفيتك من الوجبات بس اطبخي الغداء ، قلت ليهو تمام ، بالنسبة للعنوان بتمني يكون قريب !
قالي بكرة انا بجي اجيبك و بعداك انتي احفظي دربك ، قلت ليهو وصف لي بوصل ان شاءالله .. قالي لا زي ما كلمتك ، يلااا انحنا نحرك بعد دا .. 
ودعتا عبير و دخلتا .. 
عملتا شعيريتي ، وجيت لحبوبة ، و انا بقوم فيها عشان تقعد للاكل لقيت في حاجة ملفوفة وقعت من جمبها !