زوجة لسبعة أيام

٦٣

لمن حسيت اني مهيأة نفسي عشان ارد ... 
قلتا .... اااا والله يا ...*قاطعتني خالتو ام احمد .. قالت لي لحظة يا علياء بدون قطع كلامك ( بي وش جادي كدا ) ..
قالت لي وليد ! بغض النظر عن انك ما اتكلمتا في الموضوع لحد اسي بما انو موضوع بيخصك ، لكن في سؤال ما قدرتا اتجاوزو صراحه ، وهو : انت مش كنت خاطب ! و خطيبتك دي قريبتك او على ما اعتقد بنت اختك يا حنان ؟ 
خالتو حنان سكتت ، و وليد قاليها صح كلامك يا خالة بس نافي نصيب بينا ، ولينا فترة منفصلين ،، قالت ليهو فعلاً كل حاجة قسمة بس كمان علياء ما شبه انه يكون في ارتباط موثق بي عيلتكم مع احترامي ليكم بتمنى ما تفهموها اهانة ولو فهنتوها كدا انا اسفه بس صراحه دا الحاصل لاني متزكرة بي وضوح يوم زواج قريبتكم ، بت اختك اللي هي كانت خطيبة وليد عملت شنو في علياء و مافي وحدة منكم وقفت ليها ، وانا بي يدي دي رفعت علياء من الارض ، موقف في قمة الاهانة ، و ريني اسي كيف ممكن تعيش في جو زي دا ! جو كلو اضطرابات و خلافات و كلامات ! عايني انتي ما تسكتي ردي علي ، بعيد عن المجاملات انا غلطتا غلطيني ، والليله علياء دي لو ما كانت قاعده في بيتي و لو كانت في بيتها وانا حاضرة موقف زي دا كنت حأقول نفس كلامي دا زاتو ! و بما انها قاعده في بيتي دا يبقى مافي فرق بينها و بين عبير بتي ! .. 
عبير ، قالت ليها يا امي كلامك حار ، وكلام زي دا صراحه ممكن يجيب زعل بينكم وانتو معرفة خير ! ، خالة حنان قالت ليها امك عداها العيب يا بتي. الحقيقه حلوة حتى لو كانت حارة ، ويعلم الله انا علياء دي ما غلطتا عليها من يوم جات في بيتي و حتى يوم مشكلتا مع رحاب في بيتي انا ما سكتا لي رحاب هدي ليها علياء اسأليها ، اذا انا غلطت عليها في شي ، انتي ما تحاسبيني في غلط انا ما سويتو ، و انا ما مسؤلة عن تصرفات كل واحد كبير وعاقل بفهم انه قريبي ، بي ياتو منطق وريني ؟ ليه تشيليني غلطهم انا الليله لو كنت حاضرة و سكتا كان معليش ولا شنو ؟ 
وليد قاليهم يا جماعة الخير انحنا جايين في موضوع خير ما صح تتكلمو في امبارح الليلة ،، لقيت نفسي بقوليهو ، فعلاً لأنك ما جربت تتهان ! لمن تجرب و تتجاوز اهانه بعدين تعال علمني اتجاوزها كيف ،، بأختصار شديد ، وانت قدامي يا وليد و انا قدامك عشان كدا مع احترامي لي خالة حنان وخاالتو ام احمد انا حأرد ليك انت مباشرتاّ من غير تفكير ولا تردد يا وليد لان الموضوع كدا بقى حقي اناا ،، ساعدتني في لحظة اصعب من انها حرجة وو **قاطعني 
لو سمحتي حاجة انا عملتها ، م بحب اتكلم بيها وعنها ولا تحسبيها لي جميله ف اي مكان ربنل بيوقف ليكي ناس الخير فا ما تحسسيني اني عملت حاجة مستحيله لا سواء انتي ولا غيرك لو مر بنفس الموقف دا انا حأقيف معاهو قدرتي ،، فا فضلاً قولي كلامك من غير ما تحسسيني بالاحاسيس دي ! .. سكتاااااا ما قدرتا اتكلم .. 
والجو بقى صاني ، من ردو وقوة شخصيتو حتى ما حاول يكلمني بي عاطفه ولا نبرة مختلفه سبحان الله كان زي م هو ! 
اخدت نفسي و قلت ليهو .. انا عندي زول في حياتي !! ردي كان صادم للكل .. 
الكل سكت و كان بعاين فيني ! دا شنو الانا قلتو دااا ! حتى عبير كانت مبتسمة للموضوع ومن قلت كداا ابتسامتا راحت ، و احمد دا لمن قام وصل باب الشارع و رجع تاني !
وليد قالي ، و انا شاكر لي وضوحك و حتفضلي في مكانة سلمى اختي ولو الزمن لف و اتلاقينا م حيكون عندي ليكي غير كل ود واحترام...امه قالت ليهو يلا نمشي ،، قاليها انحنا جاين نتونس يا امي في شنو بسم الله ولسه ما شربنا الشاي ،، اقسم بالله حيرني م اخد الموضوع بطريقه حساسه كلنا كنا بنعاين ليهو وهو مبتسم عادي سبحان الله ، بعد شويه ام احمد قالت لي علياء قدام الناس ديل يا بتي ، ردك دا لو بسبب كلامي القلتو دااك م تشتغلي بيهو ق النهايه دا قرارك عشان ماتاخدي قرار و تندمي و تدعيني ،، قلت ليها ادعيك ! في زول بدعي امو ، ياخ ما تقولي كدا تاني يعلم الله بعتبرك امي الما لقيتها و قبل كلامك انا بالجد ما حاسة الموضوع و ما اتقبلته ابداً انتي م ليكي دخل ، حتى وقت بديت كلامي وانتي قاطعتيني كنت حأقول كدااا ! انا اسفه يا جماعه علي الاضطراب السببتو ليكم .. 
عاينت ل سلمى كانت صارة وشها لمن قلت ليها سلمى ! ابتسمت وقالت لي برضو اختي و حتفضلي اختي لعل الله يحدث بعد ذلك امراً ،، قلنا كلنا ونعم بالله ، وليد قال لسه م معروف الخير وين ، عاين لأحمد ، و خبطو في رجلو قاليهو يا زول انت الليله اصلو ما براك من قعدت وانت ساكت مالك يا زول ؟ 
قاليهو والله نحمدالله بس في شويه امور كزا جايطة واصلاً بتجوط عشان تتعدل .. قاليهو يا زول مافي حاجة بتحصل اكتر من المكتوبه ليك ... قاليهو صح والله ونعم بالله .. 
قعدو شوية وحركووو ، و كان الوضع تمام ونسة وكلام عادي ... 
بعد قدمناتم للباب البراا ، و بقينا داخلين ، لاذة حبوبة ، احمد قالي علياء ! قلت ليهو نعم ! قالي عايزك في موضوع ،، وامه واخته سامعين ، قلت ليهو اغير لي حبوبة و اجي ، قالي تمام انا في الصالون ، قلت ليهو تمام ..