زوجة لسبعة أيام

٢٧

قالي يمكن زول من اهلك ، قلت ليهو م عندي زول غير حبوبة وحبوبه ما بتتحرك ، انا اسفه بس انا خايفه الوضع غريب .. 
بس قالي زحي ، لذ الباب .... و هنا كانت الصدمة ... قلتا بخلعه ، عم اسماااااعيل !! احمد قالي بتعرفيهو ؟ اللحظه دي انا عيني كانت في يدو شايل قروش في يدو ، اللي هي قروشي المخلياها في البيت .. 
قلت لأحمد لا ما بعرفو غير انه حرامي الحلة ، قام يكورك قال دي كذابه عي سايبه لينا المفتاح عشان نشقر علي حبوبتا ، قالي الكلام دا صح ولا حاصل شنو ؟ قلت ليهو اديت لمرتو المفتاح ما ليهو هو ، و بعدين انا متاكد شال قروشي و متاكدة لو دخلت ما حألقى حاجة. وقبل كدا عندي قروش اختفت ، قالي كذابه و خاول يطلع ، احمد مسكو قاليهو طيل لو حاي تشقر علي حبوبتا ، طافي الانوار مالك ؟ 
انا انتبهت ان حبوبة وضعها حيكون شنو ، بس جريت دخلت ليها ، اتخيلو بس لقيتو خاتي ليها قطعه جوا خشمها عشان م تكورك ، و بس بقيت بكورك فيهو ، عندي كرسي بلاستك المربع الصغير دا ، و بقيت زي المجنونة شلتو من جمب حبوبه و حصلت بيهو عم اسماعيل خبطتو في ضهرو ، و بقيت بكورك قلت ليهو زمن المسكنة راحت ، اقسم بالله تاني م ارحم و المرة دي انت هبشت حته من روحي عارف يعني شنو حبوبه عارف ولا ما عارف يا شايب يا عايب يا ما محترم سنك ، و تاخ دايرة اخبطو تاني احمد مسكني و عبير دي بترجف رجف ، قالي روقي روقي و كل ما اشوف حبوبه دي بتبكي وترجف انا اعصابي بتبوظ بحس اني دايرة اكتلو .. 
بس وقلت لاحمد امشو انتو بعد دا و بقيت بكورك باعلا حسي حرامي حرامي ، حلبت الليله ما ارحمو عشان تاني ما يتجرأ ، و اول وحدة جات مرتو صفيه .. 
من جات في شنو ، قلت ليها انا مش اديتك المفتاح ليكي انتي ؟ قالت لي ايوة ، واول حاجة عاينت لي راجلا مخلوعه انت الجايبك هنا شنو بس كتمتا ، قلت كيف تدي المفتاح لي راجلك يدخل بيتي بالطريقه دي و يسرقني و يعمل كدا في حبوبة .. سكتت بس 
عبير قالت لأحمد اتصلو بالشرطه ، وهو زاتو واقع محتار ما بيعرفنا عشان يتصرف فجاة كدت دخلتهم في دوامة ، بس خالت صفيه قربت مني و قالت لي ، امسحيها في وشي ما تجرجريهو في الشرطه ، كل زول بيغلط 
عشاني انا و تاني م حتتكرر ، قلت ليها دا ما اول غلطة يعملا معاي ، عاينت ليهو وقلت ليهو ، تحب ازكرك بالحديده حقت الستارة !
والله الراجل دا بقى يرجف رجف و الجيران بس بعاينو ، قلت ليهو بما انك م احترمت سنك انا ح احترم سنك ، و ابقى راجل و كرر عمليتك دي ، ومديت ليهو يدي ، خت لي القروش حقتي ، قلت ليهو والقديمة ، بقي يتمتم ، قلت ليهووو انحنا لسه فيها ، قالي برسلا ليك مع صفية ،، احمد مسكو قاليهو انا مستغرب فيك ياخ عيب عليك ، دي بت براها بدل تساعدا تعمل كدا ؟ّ
ما محترم شيبك دا ، انت لو والد اولادك حيكونو اكبر منها ياخ عيب. الدنيا عمرها ما تمشي بالطريقه دي ، و كان بأمكانها توديك في ستين دهية بس ربنا رحمك ، اطلع براا اطلع ، وديني و ايماني لو م كنت راجل قدر ابوي انا الكنت وقفت ليك و ما رحمتك ، اطلع برااااا .. 
اللحظة دي انا كنت باركة في الارض عند سرير حبوبة ، بس ابكي زي الميت لي زول ،كرهت نفسي اكتر مهما كان اصلو ما ينفع اخليها امانة عند زول دي غلطتي انا لازم تكون قدام عيوني ،، جاتني عبير ( البت دي مسكينة ياخ ، و الناس الملخبطين ف الشخقيات حالتي مسكت معاكم شخصيه شخصيه. ، عبير دي السمينة حبيبة نعاذ صاحب احمد اخوها ، واحمد دا اخوها المعرس رحاب ، و لحد اللحظة دي علياء م بتعرف انه زوج رحاب ) ..
قالت لي صلي علي النبي يا علياء حبوبتك بخير تاني دايرة شنو و ربنا لطف و اخد درس عمرو ما حينساهو ، قومي قومي ،خالتك دي بتتعب نفسية حبوبتك اكتر ..قمتت على حيلي قلت ليها اعفو لي اخرتكم و نكدت علذكم العرس انا اسفه .. قالت لي العرس اصلا ما قرايبنا هم نسايب احمد اخوي ومعرفه ، و انا ما شديدة على الاعراس ، قلت ليها برضو اعفو لي ..
احمد بعاين في منظر البيت ، و في حالة حبوبة كدا زي المتحسر ، كل القالو لي غيري الكيلون حق الباب ، و طلع بعد قال لعبير يلا ، ودعتني ، و انا واقفه في الباب قبل اقغلو جات خالتو صفيه ، ساكتة و م قادرة ترفع عينها فيني ،مدت لي القروش ، شلتها و مشت من غير م تنطق حرف ..قفلت الباب و دخلتت ، استحميت و غيرتا ، و جهزتا العشاء 
و قعدت اعشي في حبوبه و كل شوية ابوس فيها ، لمن نامت و انا بعاين فيهاا لمن نمته جمبها .. 

( في جانب رحاب )
* اسي بتبكي مالك انتي خلاص ..
_خلاص شنو يا رحاب انتي متخيله وليد خلاني يا رحاب حأمووووت لو خلاني عشان الكلبه دي ..
*لكن يا رغد انتي رميتي حملك كلو على البت و كرهك ليها كان واضح شديد ، اااي انا كمان بكرها بس مستحيل اعملا ظاهرة كداا ..
_اهو دا الحصل يا رحاب لكن م متخيله وليد يخليني بالطريقه دي !
*هو كمان الا كان متسبب 
_انا في ورطه يا رحاب ما بينفع وليد يخليني
*موضوعكم دا غريب صراحه ، طيب بكرة اعتذري لبهو امشي ليهو الصيدليه ..
_ما حيقبل انا عارفاهو 

*كلام والله
_اسمعي عملتي شنو مع علياء ؟
*ولا شي غير القلتو ليكي اخر مرة ..
_خلاص بكرة جيبيها 
*بالسرعه دي ! وبعد العملتيهو م ظنيت توافق 
_مشكلتا بقت معاي ما معاكي ..
*برضووو ، لكن دايرة الحد البت دي صعبه لمن تقوم 
_صعبه على نفسها ما علي اناا 
*طيب ي ستي بكلما بكرة 
_تمام وخليكي متواصله معاي في اي اخبار جديده 
*تمام 
_انا ماشه اسوق امي واشوف وليد ( ود خال سلمى القبيل جاهم الكوافير ، اخوها لي رغدة ) وين عشان يرجعنا 
* طيب 
_يلا

#استككانة🐉~