شهر مر علي خطبتنا كل حاجه كانت تمام ايمن كان فعلا مفرشلي اللوطا ورد علي قولتهم
فعلا كان مدلعني و مع اني كنت نذمر عليه واجد بس كان متحملني
كان حتي لما يعصبني و نسكر في وجهه يرضيني مع انه مرات واجد انكون انا الغلطانه
رفعت عيوني لِـ منال و هي تحكي مع راجلها و توصي فيه علي حاجات الحوش زعما حنكونو هكـِ انا و ايمن بعد سنتين زواج انكونو مش حنرنو علي بَعضُنَا الا عشان حاجات الحوش
تنفست بلحن و ابتسمت لما امل خشت للمكتب تلهد
"كنك"سألتها و هي شيرت بيدها و قعدت تسحب في هوا بالقوه
"كنت.كن.ت اه يا ربي "قالت و هي حاطه يدها علي خصرها تضغط عليه
"امل اهدي"منال قالت و سحبتها تقمعز فيها علي الكرسي لما امل هدت شويه انا و منال تبادلنا النظرات في شي صاير!
"كنت في الحمام و سمعت سعاد تحكي مع صحِبتها انا ما كانش قصدي انتنصت عليهن بس حديثهن شدني "هي سكتت و انا كنت علي أعصابي
"مالك ميحبهش يا خوله هي دايرتله سحر سمعتها تقول لـ صاحبتها كيف ما جبته بالسحر انخليه يكرها بالسحر جسمي رعش يا بنات و قريب طحت و اول ما طلعن هنا الاثنين انا جريت هنا و خفتهن يفطنن"انا طحت علي كرسي ورايا حطيت يديا علي جوانب راسي مش مصدقه الي سمعته سحر، مالك، يكرها. الكلمات هذينا دارن صوت مزعج في وذني صوت تصفير!!
"كيف!"انا سالت و حسّيت بقلبي يوجع يعني مالك ما كانش يضحك عليا يعني انا ظلمته! عضيت علي لساني عشان منبكيش بس فكي الي رعش و شدوقي الي سخنن خلني نفقد السيطره علي روحي و نبكي
بكيت اكثر ما بكيت في يوم خطبته او في اليوم الي مات فيه محمد خويا بكيت بالعبره
هديت بعد شويه و صبيت هو لازم يعرف صح ؟
"وين ماشيه"البنات سالن بس انا ما رديتش وجي كان مليان دموع و خشمي حمر و عيوني حمر بـزياده دقيت علي مكتبه و هو رفع عيونه ليا عيونه الي انا رايفت عليهن
"كنك شن في صاير حاجه"صوته الي انا حبيته خلاني نبكي مره اخره هو صبا من مكانه و جا شوري بس لما قرب خذا خطوه لاورا و انظني يعني عشان انا معش قعدت له
"نبي نحكي معاك ضروري"سمعته يتنهد و شفته يهز في راْسه قمعزني علي الكرسي قدّامه و شبك يديه يبحت فيا
"سعاد "انا بديت كلامي و كملت "دايرتلك سحر"هو عقد حواجبه لثواني و بعدها انفجر حرفياً ضحك
كنت نبحت فيه بـاستغراب ما فهمتش كنه يعني انا قلت حاجه تضحك و لا شنو
"تي خافي ربك يا بنت الناس حرام عليك الظلم هذا بما انك مزلتي تحبيني ليش وافقتي علي صاحبي"صوته كان عالي و انا جسمي رعش منه
"مالك انا-". "انتي تسكري فمك و تطلعي من قدام وجي "صبيت و بحتت فيه بصدمه مسحت دموعي بالقوه و ابتسمت اكبر ابتسامه عندي
"اجعنك ما تبرا و لا تربح "عزقت كلامي عليه و طلعت و انا نبرطم بكلام انا بروحي مش فاهمته
كنت غبيه اني حبيت شخص كيفه و كنت أغبي لما فكرت انه ممكن يصدقني
"خوله شن كنتِ تديري في مكتب مالك و كنك تبكي" و فعلا مش ناقصني انت توا .
___________
يا جماعه راه مش قصدي اني نبي ندير نهايه حزينه الي قصدته ان قلت التفاعل تخلي فيا نطلع اسوء ما عندي في النهايه فهمتو
كل الحب
أنت تقرأ
مثالي /باللهْجه اللِيبيه
أدب الهواةمُقَـدمه: كانت حياتي سعيده معاه كان يحبني و الحاجه الي نبيها قبل ما نطلبها تكون عندي كنت اكثر وحده محظوظه في العالم لان ربي رزقني بحد حنون و طيب و يخاف ربه فيا كيفه كان ديمه يقول اني له و انه ليا كان مثالي ليا بس لان مافيش حد مثالي الا ربي سبحانه و...
