كنت مقمعزه نأكل في سبول لما رِن جرس الحوش و سمعت فرح تقول تفضلي و انا كيف المكلوبه صبيت بسرعه نقصم في المخدامات و نشيل في السفره للكوجينه
صقمت شعري الحايس و طلعت نشوف من جا
ماما ما كنتش قاعده كانت مع بابا يدورو في قاعه بما ان القاعه علينا
بنت بحجاب و عبايه بعيون زرق يقول بحر و بياض يقول تلج كانت قدامي و جنبها بنت ممكن عمرها سبع سنين نسختها الا عيونها الخضر ذكرني بعيون حد نحبه
مديت يدي و سلمت عليها بالخد و معلومه مرات تكونو اول مره تسمعوها بس انا نكره الاطفال و هذا خلاني نطبس نبوس البنت الصغيره بقرف و لو فطنتلي امها الي منعرفهش كان انجلطت
ممكن مرت نص ساعه و نحن نبحتو في بَعضُنَا و ساكتين فرح صبت تدير في القهوه و المرا الي حتي اسمها منعرفه تبحت فيا يقول قاتلتلها راجلها
"كيف حالك، صقع صح"انا قلت و ضحكت و هي رفعت حاجبها تنفست ببطء و لويت فمي
"انا خوله و انتـِ"قلت للبنت الصغيره و المرا ابتسمت و قالت"انا فاطمه المنصوري و هذي بنتي" علي أساس هكِ عرفتها "تشرفت بيكِ و انا خوله تبي حاجه نقدر نساعدك غير ماما مش قاعده" قلت تحركت في مكاني بتوتر وجودها مستفز و يخلي فيا خايفه
"لا لا نعرفش امك انا، انا جايه لسعده بس شكلها مش قاعده نبيها تشوف حفيدتها"حفيدتها!! اوه كنشي ايمن عنده اخ و انا معنديش علم؟بلكي انا اصلا منحبش نقصقص واجد و ما عمري سالت علي خوته و خواته
"اوه بنت خو ايمن؟ ايمن يكون خطيبي تشرفت بيك"هي ضحكت و لوهله حسيتها هازيه عليا مش عارفه ليش
"لا يا حنه مش بنت خوه، باهي عاد قولي لسعده اني جيت مع سلامه"خذت شنطتها و بنتها و طلعت تحت انظاري انا و فرح المستغربات
"ايمن معندش اخ"فرح قالت و انا قلبي وجعني و الأفكار السوده جن في عقلي
"فرح الله ونبي انتي تعرفي ان انا نشك و نخاف من كل حاجه الله يربحك"رفعت يدي لها و شيرت شور الباب و هي طلعت حاولت نرن علي ايمن بس لا حياه لمن تنادي مردش و بعدها عطاني مشغول اي انه مايبيش يرد عليا! من اول امس و هو هكِ مندرعنه علي قولت بابا كنه .
يوم الاثنين
اثقل يوم في الاسبوع الاثنين نكره يوم الاثنين
لبست كندرتي و طلعت من الشقه و تمنيت اني نشوف ايمن اسبوع مر لا رِن لا شي و لما نشوفه يطنش عليا ليش؟ الله اعلم
نفخت شدوقي و نقرت بالبنينه علي المكتب يدي علي خدي و نبحت بكل ملل لـ امل و امال الي يشتغلن
"حتجي اليوم"امل سالت و انا رفعت عيوني لها و شيرت علي روحي و قلت"انا!" هي قلبت عيونها و هزت رأسها
"اها انتـِ املا انا"نجي لشنو هذا السؤال الي مفروض نقوله بس الي طلع من فمي كان"و ليش نجي مليت منكن"
حسّيت روحي غبيه لما هنا ضحكن و قالت امال"لولا يا غبيه نقصد تبي تجي لحفله ايمن امس عْقد عَقد مع شركه اجنبيه معروفه بكل بتصدير الحواسيب و عشان هكي محتفلين اليوم اكيد ايمن قالك"حفله،ايمن، اليوم! و انا اخر من يعلم
"لا معنديش علم"الاحباط الي في صوتي كان واضح و الغصه الي في رقبتي كانت مضايقتني
"عن اذنكن"قلت و صبيت و اتجهت شور مكتب ايمن فتحت الباب و انحرجت لما لقيت انه عنده ضيوف
"حاولت اني-"السكرتيرة قالت و ايمن شير بيده و هي طلعت
"جُعلت الأبواب لتطرق يا الفرجاني"ايمن قال شابك يديه مع بعضهن و انا بحتت في الراجلين الي مقمعزين قدّامه
"معلش يا سيد ايمن حاله طارئة"قلت و ميلت رقبتي لليمين هو هز راْسه و اعتذر يكر في يدي ورآه خشينا لمكتب مش مفرش و فاضي و هنا ايمن قرر ان يطلق يدي
"ها"هو قال و ربع يديه
"صح الي سمعته"قلت نقلد فيه و هو عيونه توسعن "شنو!"
"ليش ما قتليش ان في حفله اليوم مش خطيبتك انا"سألته بمعاتبه و فعلا وجعتني روحي
"عارفك متحبيش الأجواء هذينا"هو قال و سند ظهره علي الساس
"ايمن كنك تجنب فيا!حبيبي انا شن درت عشان تعاملني هكِ"قلت و كرعيا اتجهن شور الروشن الكبير نبحت منه و منظر جزيره الجعب البعيده و فندق تبستي من قريب كان خيال
"خوله انا مش حنقدر نكمل معاك" سمعت همس ايمن من ورايا و انا غمضت عيوني و ابتسمت
"كنت عارفه انك مش راجل و كيفك كيف اي عيل يلعب بالبنات"البرود الي نحكي بيه نبي نعرف من وين جبته
"انا مغلطتش فيك عشان تقلي أدبك خلينا محترمين بَعضُنَا يا بنت الناس"حسّيت ان في صوته نبره تهديد و هذا خلى قلبي يرعش
"ليش؟" قلبت روحي نبحت فيه و هو بحت في اللوطى و قال"لقيت انك مش مناسبة ليا"
همْهمت نبحت فيه نحاول نسحب منه الكلام
"بنت ثانيه"
"كيف عرفتي "هو قال و انا ضحكت قبل ما نطلع قدرتش نطلع من العمل بس قدرت نقمعز في الكافتيريا البنات حاولن يعرفن كني بس محد يعرف كني و كيف يطلعني من البرود هذا الا شخص واحد بس "مالك محتاجتك " قلت في التيلفون و جمله ثواني و نكون عندك اخر ما سمعت.ء
______________
امّم السلام عليكم انا فتحت فيس و حنزل فيه الروايات الي يحب يقراهن هنكِ
اسمي نفس هنا
Belikememo
أنت تقرأ
مثالي /باللهْجه اللِيبيه
Fanfictionمُقَـدمه: كانت حياتي سعيده معاه كان يحبني و الحاجه الي نبيها قبل ما نطلبها تكون عندي كنت اكثر وحده محظوظه في العالم لان ربي رزقني بحد حنون و طيب و يخاف ربه فيا كيفه كان ديمه يقول اني له و انه ليا كان مثالي ليا بس لان مافيش حد مثالي الا ربي سبحانه و...
