اسيرة عيونك ( قصة بالدارجة المغربية )| مكتملة .

6

مني قالو لها بلي ماماك بين الحياة و الموت بانو لي عينيها عمرو دموع و جاتها دوخا جاب الله انا موراها شديتها عاودات وقفات و هضرات
رغد : فين هيا ماما ؟
الخالة : زيدي نديك لعندها
بقينا غاديين تا وصلنا واحد البيت عامر بالناس واحد المرا قالت لهم تبقى غير هي وياها لكن انا رفضت نخليها بوحدها حيت عارف اش غاتقولها و منقدرش نخليها بوحدها فهاد الوقت خرجو الناس بقينا غير حنا بثلاثة
زهرة : بنتي كح كح .. الحمد لله مني جيتي
رغد (تلاحت عليها ): ماما اهئ اهئ عوتاني ا تمشي وتخليني
زهرة : بنتي أجلي وفى .. و بغيتك تسمحيلي
رغد : علاش اماما انسمح لك اهئ اهئ راك نتي لي خصك تسمحيلي
زهرة : كح كح.. بنتي سمحيلي حيت. . حيت حنا غير مربيينك سرقناك لوليديك و كاعما قلناها لك .. المسامحة ابنتي .. أشهد أن لا اله إلا الله و أن محمدا رسول الله. .
رغد تدهشرات معرفات واش تغوت حيت مها ماتت ولا حيت عرفات راسها مربيينها طاحت لأرض و دموعها فعينيها نزلت حداها و عنقتها و هي طلقها بغوتا
رغد : لاااااا اهئ اهئ اهئ علااااااش ا ماما علاااش تديري فيا هاكا حرام عليك اهئ اهئ
دخلو خالاتها شافو ختهوم و بداو يغوتو و رغد تا هي كتبكي
حتى ولات فاشلا هزيتها و درتها و جلستها لور فاللوطو و جلست حداها و كانهدن فيها و رجعات شعلات تاني
رغد : اهئ اهئ ياك ا ماما يااااك اهئ غالي غالي اهئ
أنا : شششش. . أنا حداك
رغد : انا بنت الحرام ا غالي بنت الحرااام بدات تنتف فشعرها و تغوت و انا غير شادها تا زادت فيه و انا نصرفقها باش توgض

انا : رغاااااد صافي فييييقي نتي ماااشي بنت الحرام
رغد : بقات ساكتا و عنقاتني و رجعات تبكي
رغد : غالي اهئ. . تا قلت رجعات و تاني مشات واخا هاكاك راه هي لي رباتني اهئ
أنا : إنا لله وإنا إليه راجعون. . هادي هي سنة الحياة أ رغد كلنا ليها دابا قوي راسك نتي دزتي من ماصعب و دابا عائلتك الجديدة كتسنا فيك
رغد : ها .. ؟ ك .. كيفاش عائلتي الجديدة ؟
أنا : راك سمعتي قالت لك سرقوك تلقاي مك و باك لحد الآن كبدتهوم مشوية عليك
رغد : لا تلقاهم نساااوني اهئ اهئ دابا معندي لا حنين لا رحيم من غير الله
أنا : رغد انا ديما معاك و متنسايش عائلتك مني ايشوفوك ايفرحو دابا مك و باك الحقيقين باغيين يشوفوك
رغد: ولكن .. نتا باش عارف هادشي كولو ؟
أنا : رغد(بعد صمت ).. نتي بنت عمي .
______

صافي انا مبقييييتش قادرة صدمة مور صدمة ايتقطع ليا شي عرق فالراس اول حاجة العودة د ماما تانيا الزواج التالتة داك لي كنت انتزوج بيه صدق مستغلني صبحتي خانتني لاخرا صداقات خت راجلي ماما ماتت و صدقات سارقاني و شنو انا بنت عم غالي صاااااااافي راسي اينفجر عليا
انا : ك .. كيفاش بنت عمك؟
غالي : انا براسي عاد عرفت مني شتك مقدرتش نقولها لك حيت خفت عليك .. لكن دابا مني جابتها الوقت خصني نقولها لك ايلا كنتي مستعدة تسمعي انا نعاود لك دابا
أنا : امم .. غير عاود لي
غالي : هادي 17 لعام .. باش كانت عندك عامين ماماك كانت خلات ماما مقبلاك مع اصلا غيثة كانت تا هي صغيرة خلاتك عندها ..صافي تا نعسات الولدة مني فاقت لقات غيثة كاينة و نتي لا مني جات ماماك بدات تلوم ف ماما .. و ماما دخلات ف صدمة لحد الآن مكتهضرش مكتخرج فين هي كاينا فدار ديالنا غير كيدخلو ليها الماكلة و كاتكل .. و لكن علاقتنا بدار عمي متبدلاتش حيت هادشي لي مكتاب معندنا مانديرو.. مخلاو فين قلبو عليك و مالقيناكش .. عمي عميد كنقصد باباك ماخلا مدار لمدة عاماين و هوما يقلبو تا فقدو الأمل. . هادو دابا لي رباوك كانو خدامين عندكم كانعقل عليهم مزيان .. نهار تخطفتي غبرو معرفناهم فين داوك .. كان مطور مني مابدلش ليك سميتك حيت حنا كنا كانقولو ايكون بدلها لذالك عمرنا قلبنا عليك بسميتك. . صافي حتى تقبلو الأمر لكن لحد الآن مزال مازمين
أنا : ولكن دابا كي عرفتوني انا هي ديك البنت .. ؟
غالي : بابا ديما كايعقد صفقات مع دوك لي كاتكون عندهم شي شركة صغيرة بالصدفة طاح مع باباك عبد السلام و هو من طبعو كايبحث بزاف عليهم ولكن كان ناسي داك السيد واخا شاف نفس السمية متفكروش مني بدا يبحث شاف سميتك مع ذلك متفكركش و حيت هادشي داز عليه سينين ديك الساع شي 12 لعام كنت أنا ديك الساع خرجت لبابا على طوعو كنت فديك المدة عاطيها غير للشراب بابا بغا يربطني دار معا الأب ديالك السياسة و دار ليه ديك القضية د الزواج حيت ملقا تا حاجة ثمينة ياخد ها من عند باباك من غيرك ة الغريب فالامر هو انو باباك وااافق بدون تردد لكن كان شرطو هو تا تاخدي الباك عاد يديك ..الوالد ديالي كان عمرو شافك لكن مني شافتك غيثة هي اللولة جات قالت لنا راه كتشبه لمرات عمي انا مديت مجبدت.. لكن مني شتك تأكدت 100 % انك هي بابا عاد ربط الاحداث و عرف انكي بنت خوه و خاصة مني بقيتي مدة معا غيثة فالدار، و نهار عرفتي غيثة انها ختي داك نهار غيثة كانت باغا تخبرك لكني منعتها حيت كنتي تلقيتي بزاف د الصدمات .. ولحد الان مك و باك مزال معارفينش يعني ايلا كنتي باغا من غدا كاع نمشيو
انا : دابا انا حياتي كاملة عايشاها فكذبة و واليديا لحقيقيين كانو كيتقطعو عليا اهئ اهئ عمري شكيت فهادشي واخا ماما داكشي لي دوزاتو عليا ماشي قليل لعصى لي كانو يعطيوني و تمارة لكن كنت كنقول لمصلاحتي و هادوك واليديا من حقهم .. لكن هما غير حيت انا ماشي بنت هم اهئ اهئ .. حنا كنا عايشين ف وزان فللول مني درت 12 لعام جينا لهنا و بابا دار شركة صغيرة و كان عندنا بحال رياض هنا فالمدينة القديمة فالرباط. . حتى واحد النهار مني مات بابا و خرجونا حنا من الدار .. عاد فهمت علاش خالاتي و عمامي كانو ماكايحملونيش
غالي (عنقني ): ششش دابا انا معاك و مغادي نخلي تا حاجة تأديك ..
أنا : ااااه ا غالي آه كانحس بالنار شاعلا فيا عيييت اهئ
بغيت نشوف ماما و بابا لي تحرمت منهم حياتي كاملا بغيت ندوز معاهم لي بقى منها
بغيت نشوف ماما و بابا لي تحرمت منهم حياتي كاملا بغيت ندوز معاهم لي بقى منها
غالي : غادي نديك عندهم ا حبيبتي صافي
أنا : بغيت دابا اهئ اهئ
غالي : هما ماشي هنا حيت حنا اصلنا من فاس كنا عايشين تماك و انا الخدمة صيفطوني الرباط هادي 8 سنين و رحلنا كلنا حيت تا بابا كان باغي يدير فرع هنا فالرباط و يخليه هو الفرع الرئيسي و داركم بقاو ف فاس حيت كيما قلت لك باباك عميد و صعيب يمشي لمدينة خرا إلا ايلا عطاوه هما الانتقال .. يعني حتا لغدا و نشدو الطريق
حنا كنهضرو كنسمع لي كايدق ف الشرجم تلفت لقيت خالتي هبطنا عندها
خالتي : تبااااارك الله عليك مك ميتا و نتي كتحابي معا صحيبك
غالي : صلحي فمك ا لالة لي قدامك رجلها غير جيتيني مرا كبيرة ولا ميعجبك حال
أنا : غالي. . صافي .. اش بغيتي ا خالتي
خالتي (كطلع فينا وتهبط):زيدي خصك تنازلي على حقك د الورث حيت نتي اصلا ماشي بنت هم وهما مسجلينك معاهم
أنا : صافي هادشي لي بغيتي ؟
خالتي : اااه وا يلاه طلقي رسك
يلاه باغا يشعل معاها غالي زيرت على يديه و سكت بزز
انا : واخا يلاه
مشينا لقيناهم جايبين العدول سنيت على داكشي و خرجت مع غالي مشينا للدار. . توضيت و صليت العصر و جلست نبكي و غالي غير معنقني معرفتش علاش كنبكي واش على واليديا لحقيقيين ولا على ماما زهرة معرفتش والله .. نعست على صدرو مفقت تال وقت المغرب لقيتو متحركش و مزال شادني بين يديه ضحك معايا تا انا بادلتو نفس الابتسامة و نضت نغسل وجهي و رجعت عندو
أنا : غالي نوض تصلي
غالي : هه واخا انا انوض
أنا : كتصلي بعدا؟
غالي : كنصلي ونقطع غير يا ربي تسمح لي
أنا : متقطعش صلاتك ماشي مزيان .. و باش ربي يبارك لنا ف زواجنا خصك تكون كتصلي حيت راه إلا الزوجين مكايكونش واحد فيهم كايصلي كايولي زواجهم باطل. .
غالي : علاش ماديريش الحجاب ا رغد ؟
أنا : كنت كانقول غي ندير العرس ونديرو
غالي : واخا هههه شهدي على راسك. . يلاه نوضو نتوضاو ..
هو دخل ل حمام لي فبيتو و انا دخلت ل وحداخور صلينا و مشيت جلست حداه
أنا : غالي. .قولي واش انا كنشبه ل ماما و لا بابا؟
غالي : اول مرة شتك قبل كاع منعرف هادشي جيتيني غير مرات عمي ماخليتي فيها تا قطرة و ديتي من باباك العينين و حتى مني شت سميتك زاد تبتات ليا داكشي ..الشبه سبحان الله نسخة د ماماك
أنا : بصاح. . شوقتيني نشوف ماما و بابا عاود لي عليهم كلللشي عافاك
غالي : ههه عندك ختك وخوك ختك عندها 17 لعام و خوك 26 عام
أنا : واااو كنت كنتمنى تكون عندي ختي و خويا حيت ديما بوحدي كنت كنقول مع راسي يمكن ماما تأخرت ف الإنجاب حيت دابا كانت عندها كدا وستين عام قلت يمكن حيت تعطلات ولدوني غير انا
غالي : ماماك ضريفة بزاااااف واخا لامت ماما عمرها حاولات تقطع علاقتها معانا. .
أنا : غالي. . واخا تديني عند ماماك
غالي : ماما هادي 17 لعام مهضرات منهار خطفوك
انا:غير ديني عندها ..
غالي : واخا يلاه نوضي تلبسي. .
لبست و خرجنا مشينا لدار غيثة و طلعوني لواحد البيت كان فجناح بعييد على لي كنت فيه عليها مكنت لاحظت والو ..دخلت كانت ماماهم جالسة فبالكون كيطل على لور د الفيلا كانت امرأة في عقدها الخامس رغم هاد17 لسنةو هي ف صدمة بقا زوينة مشيت قربت لها .. و حطيت يدي على يدها
أنا : خالتي.. عرفتيني ؟
هزات يديها و بدات تدوز على وجهي و عينيها كايعمرو بدموع بدات تنطق ب حرف: ر .. ر ر
أنا : آه ا خالتي انا رغد هانا رجعت
زينب : ر.. غ..د
عنقاتني و بدات تبكي تبكي تقولو مات لها شي حد دخل غالي و شافها هاكاك و وقف علينا شافت فيه و بدات تقول
زينب؛ ر..غد رغد رغد اهئ اهئ جات جات اهئ
غالي شاف داك المنظر عنقها و عنقني و حابس دموعو سمعنا واحد التنخصيص ف الباب لقيناها غيثة جات تلاحت فحضن ماماها كتبكي تا انا وليت نبكي حيت انا سبابها ومع ذلك غالي مكرهنيش انا يمكن بلاصتو نحقد عليا حيت انحس بلي انا هي السباب باش ماماه طرا لها هاكاك غالي جرني باش نخرجو باش تبقا غيثة مع ماماه و دخلنا لواحد البيت
غالي : فخبارك بلي غيثة اول مرة تسمع حلق الوالدة. .
أنا : متقولهاش نااااااري شحال صعيبة
غالي : اه .. ديك ساع باش تخطفتي غيثة كانت عندها 4 شهور .. أنا لي ربيتها كانت عندي ديك الساعة 16 لعام كنت أنا لي كنبدل لها و نفيق بليل ايلا فاقت و نعطيها الرضاعة .. غيثة بالنسبة لي بنتي ماشي ختي يقيصوني فعيني و ميقيصونيش فختي دابا اول مرة غادي تسمع ماما ..
_____
حاجة صعيبة 17 لعام مسمعت صوت الأم ديالي حتى جات رغد مني شافتها نطقات لي بقا فيا كتر هي ختي حيت عمرها سمعات حلقها كانت كتمشي عندها وتنعس حداها و تعاود لها اي حاجة ضراتها لكن ماما مكانت كادير تا ردت فعل .. خليت ختي معاها وخرجت انا ورغد حتى سمعنا الدقان لقينا غيثة قاطبة يدها و دخلو
ماما : بنتي. . رغد اجي حدايا (مشات حداها) سمحيلي اهئ اهئ
رغد : لا ا خالتي نتي لي سمحيلي بسبابي غيثة 17و غالي لعام و هوما محرومين منك
ماما : وليداتي سمحولي بزاف اهئ اهئ اهئ
أنا : الوليدة باراكا من البكا الحمد الله مني سمعنا حلقك
ماما : غالي. . اهئ اهئ ولدي. . كبرتي بزاف
انا (حاولت نضحكها ): ياك شرفت ناض فيا الشيب ههههه
ماما : ههههههه .. تا غيثة بنتي كبرات و ولات عزبة تبارك الله
غيثة : مامتيقاش راسي ا ماما أخيرا سمعت صوتك اهئ اهئ
ماما (عنقاتها ): سمحيلي ا بنيتي سمحيلي اهئ اهئ
أنا : منستاهلش شي تعنيقة تا انا
عنقاتنا بثلاثة حتى دخل الوالد مامتيقش
بابا : زينب ؟
ماما : كمال اهئ اهئ
تقدم لعندها بخطوات مترددة تا وصل عندها و عنقها بداو يتباكاو.. من بعد ما سكتو شوية بابا دار كيشوف ف رغد و انا نهضر
أنا : عرفات كلشي انا عاودتلها و هي أصرت تشوف ماما و هي عرفاتها نظرا للشبه لي بينها و بين مرات عمي إحسان
رغد (نطقات دون شعور ): ماما سميتها إحسان ؟
بابا (ابتسم لها): آه ابنتي ماماك إحسان و باباك أحمد
رغد : ههه واخا توريهم ليا ف التصاور
أنا : امم نبغيها تكون ليك مفاجأة. . لكن ايلا بغيتي تشوفي تصويرتي معاك نوريها لك ههههه
رغد (بفرح): اه اه
مشيت كنقلب على واحد الصورة كانت يلاه تزادت بشوية كنت هازها كانت عندي 14 لعام ههه و تفكرت مني تزادت هي هه قالو لي نزوجك بيها حيت كانت أول بنت تزاد ف عائلة العمراني و كانو باغيين يديرو ديك القضية د خيرنا مايديه غيرنا وريتها التصويرة بقات كضحك مهم عندي هو متبقاش حزينة هاد النهار حيت تفقصات و طعنات بما فيه الكفاية من نهار بنت فحياتها و هي كتلقا صدمة مور صدمة
____
مشيت انا و غالي لدارنا نسيت شويا الأمر مابقيتش غير كانبكي كنفكر غير ف غدا و ف ماما لي انشوفها و بابا واش ايتفاجئو ؟ واش توحشوني و لا لا و هوما 17 لعام و هوما محرومين مني مجرد كنفكر أن ماما لحقيقية داوني منها كاتجيني البكية علاش حرموني من ماما و بابا، ماما لي تعذبات عليا 9 أشهر و ولداتني بمشقة الانفس عاماين و هي تسهر معايا و تفيق ترضعني باش فللخر يسرقوني منها بكل بساطة مغاديش نسمح لهم حيت عاد تفكرت معاملتهم السيئة ليا العصى لي كليت من عندهم ما كلا الطبل نهار العيد و نقدر نقولو هو ماما كانت دايراني تراسة عندها انا لي كنت نطيب و ندير الشقى وكلشي ونجي نغسلهم رجليهم هادشي كان عندي عادي باش كان يحسابلي انهم واليديا الحقيقين كنت كنقول واخا ايطرا لي يطرا ويمرمدوني كايبقاو واليديا كانو كايخبيو عليا الكتوبا باش نا نقضي الشغل عاد يعطيهم ليا و هادشي بسبابو كنت كنحفض بزاف و نحاول نقرا مزيان لكن باش عرفت انهم غير سرقوني دابا كانشوفهوم كحلين حيت حرمو ماما مني الكبدة ديالها تشوات بغيت دابا نطلاقا ب ماما و نبقا غير معنقاها لا غير. . رجعنا للدار صلينا العشا انا و غالي و نعست معنقاه تا فقت الصباح قبل منو كنلعب ليه ف شعرو فاق مبتسم نضنا صلينا و هبطنا نفطرو فرحت حيت رضيتو لطريق الله .. جمعت غير شويا د الحوايج ماشي بزاف ديالي و د غالي كان باغي الخدامات لي يديرو هادشي لكن رفضت انا مراتو و انا لي تتكلف بهاد الأمور ماشي هما مابغاش يجادلني فهاد المدة .. جمعت حوايجنا و هبطهم هو تال اللوطو دارهم فالكوفر و ركبنا ..
أنا : غالي. . متصورش باش كنحس معرفتش إحساس مخربق حزن فرحة. . خوف معرفتش قلبي كيضرب بجهد. . زعما يفرحو ايلا شافوني
غالي : شي حاجة كتر ا رغد ايطيرو بالفرحة
أنا : واش ماما ضريفة ؟ ههه
غالي : بزااااف خالتي إحسان عزيزة عليا بزاااف
أنا : و خوتي و بابا ؟
غالي : هههه تا خوتك ضريفين ختك كتشبه لك شوية
أنا : اوووه اتكون عندي ختي
غالي : انا كايبان لي غادي تسيفي عليا هههه
أنا (هزيت يدو درتها على قلبي): نتا هو قلبي منقدرش
غالي (شد يدي باسها ): ههه عارف ا حياتي .. غير هو راهم ماعارفينش أني مزوج و بيك نتي
أنا : صافي خلي تا نقولوها لهم و نيت طلبني منهم هه
غالي : امم كنفضل ميعرفوش هاد المدة حتى نبغي انا نقولها ليهم
انا : مم صافي لي بغيتي نتا تعرف
●●●●●●●
انا: غالللللللي
غالي (مخلوع ): ماااالك ؟
أنا : واش قربنا ل شي باحة الإستراحة؟
غالي : شوية علاش
أنا : فيااااا بيبي راه منقدرش نحبسها
كسيرا ووصلنا لها ف 10 دقايق .. من بعد شدينا تاني الطريق تا وصلنا قدام الفيلا و أنا قلبي كيضرب ف المية
كانت فيلا عااادية ماشي كبيييرا بزاف .. بدا يكلاكصوني خرج العساس شاف غالي ضحك معاه و حل ليه باش يدخل و هو يبدا يحنزز فيا و مصدوم سكت الطوموبيل وانا مخلوعة قبطت فيدو :غالي. . أنا خايفا بزاف
غالي (باس يدي ): متخلعيش يلا تبعيني هبطت وانا غادا موراه وقف قدام الباب و انا مخبية أو بالأحرى غير حيت هو ضخم انا مكانبانش وراه كنظن حلات الخدامة حيت بديت نسمع واحد الصوت كيقول فاطنة شكون جا و الصوت غادي و يقرب : أهلا أهلا بولدي غالي مرحبا دخل دخل
غالي : خالتي إحسان هه جبت ليك معايا شي حد
ماما؛ ههه مرحبا بيكم بزوجكم فين هو هاد الحد ههههه
الظاهر على أن ماما من النوع الضحوكي ..غالي كحز وانا كنطلع عيني فيها عيني تغرغرو كاتبان ماما لا لا ماشي كتبان راه ماما من الطيارة كأني أرى انعكاسي في المرآة نفس العنين لون لي مختلف نفس النيف نفس الفم العامر نفس الضورة د الوجه نفس كلشي غير انا مخلات فيا تا قطرة بقات كاتشوف فيا بعينين مغرغرين
ماما : ب..ب بنتي؟
أنا (اجهشت بالبكاء ): اهئ اهئ اه ا ماما انا بنتك لي حرموها منك اهئ
ماما : رغد ؟ اهئ اهئ (عنقاتني ) غالي ولدي ياك هادي رغد ؟
غالي : اه ا خالتي هادي رغد بنتك انا رجعتها ليك
أنا : ماما اهئ اهئ أنا توحشتك واخا معمري عرفتك
ماما : بنتي اهئ اهئ مقداش نتيق (شدات وجهي و كاتبوس فيه ) مقاداش أخيرا ابنتي رجعتي لميمتك فين خباوك عليا فين كنت انحماق بلا بيك مكاينش نهار لي مكانتفكرش فيه
غالي : دخلو من الاحسن باش نعاود ليك كلشي
ماما : كاتمسح دموعها : هه نسيت سمحو لي اوليدلتي
دخلات شادا فيا و جلسنا ف الصالون و كتعنقني و تبوس و انا كنبكي ..
انا : انا تحرمت منك ا ماما يلاه عرفت لبارح و جيت ليوم مقديتش نصبر بغيت غير نعنقك واخا ماعارفاك حتاكي دايرا
ماما : لا ا بنتي حنا كنا ديما كنشوفو ف بعضياتنا غير كانشوفو ف المرايا نتي كاتشوفني و انا كانشوفك عمري نسيتك ابنتي كل نهار قلبي كان كايتقطع عليك واش عايشة و لا ميتا واكلة و لا فيك الجوع لحد الآن ا بنتي مقدرتش اهئ اهئ لدرجة ختك لي صغر منك غارت من ختها لي عمرها شافتها آآآآآاه ا بنتي النار دابا شاعلا فيا واخا فرحانة ولكن راني تحرمت منك
أنا (عنقتها ) وبقيت نبكي ف صدرها نبكي نبكي و تا هي مخلاتش من جهدها
ماما : غالي عاود لي أولدي كي لقيتوها؟ غالي بدا يعاود لها كيفاش حتى عمي دار شراكة مع بابا واخا مرضش عمي البال و كيفاش حتى غيثة جيت معاها ف القسم و جيتها كنشبه ل ماما و بحتو ف الامر مهم مذكرش زواج و بدينا نخربقو شوية باش
مانقولوش بلي حنا مزوجين
انا بدوري حكيت لها على ماما زهرة و قالت لي بلي كانو خدامين عندهوم و قلت لها بلي لبارح ماتت و عترفات ليا ماما ماسكتاتش من لبكا سولتها على بابا
ماما : غيجي دابا شوية ا بنتي من الخدمة شي ربع ساعة هاكاك و تولي تشوفيه .. مصدقتش راسي واش انا كنحلم
أنا : لا ا ماما أخيرا رجعت لحضنك الله ياخد فيهم الحق .. انا عمري انسامح لهم
حنا كنهضرو كنسمع صوت: إحسان .. فينك و جا للصالون اش نقولكم لوهلة كنت نتزعط ف بابا احااااااي وا بوكوووص و ماشارفش تكون عندو كدا و ربعين عام كان ف طول غالي يعني طويل بزاف و عندو بنية قوية شعرو قهوي غادي لشهوبية وفيه شوية د شيب و عينيه بحال عينين غالي و عندو ديك اللحية لي كلتكبر ف 3 يام وا ماما طاحت وعرفات فيمن طيح ههه يا ربي تسمح لي و صافي ههههه شافني بقا مصدوم
بابا : إ..إحسان. .
ماما : أحمد. . ها هي بنتنا رغد اهئ اهئ رجعات لنا رجعااااات
بابا : واش رغد ؟ رغد !!!! (تلاح عليا كايعنق و يبوس راسي) بنتي .. بنتي أخيرا تا انا بادلتو العناق و بديت نبكي آه على حنان الأب و الأم كيداير عمر ماما و بابا لآخرين عنقوني هاكا بابا شاف غالي و هدر معاه
بابا : غالي شكادير هنا ؟
غالي : انا لي جبت رغد ا عمي (بدا يعاود له ديكشي )
داوني وسط منهم و بداو يسولو فيا و بابا غير كايبوس لي ف راسي
بابا : مخليت فين قلبت عليك ابنتي تقول الأرض تشقات و بلعاتكوم حتى النفود و المنصب ديالي منفعنيش. . أجي تشوفي بيتك لحد الآن عمرنا خويناه جروني بزوج بحال شي بنيتا صغيورة و داوني للبيت لي قالو ليا عليه دخلوني كان كولو فللون الوردي و سرير د الأطفال و العاب و الحيط الوسطاني كاينا تصويرة كبيييييرة فيها ماما و بابا هازيني ملامحي فالصورة باينة اتكون كانت عندي ديك الساعة شي عام و انا ضاحكة و لابسة كسيوة ف الأصفر و فيها وريدات كان بابا معنقني و ماما حداه جاية انا وسطهم شت التصويرة و بديت نبكي تاني و ماما عنقاتني : صافي ا بنتي دابا وقت الدموع سالا دابا خصنا غير نفرحو
انا (كنمسح دموعي بضحكة ): آه اه صافي
بابا : ديك زهرة و عبد السلام عندهم زهر ماتو اما كون ندمتهم
أنا : صافي ا بابا هادشي لي كتاب علينا المهم هو حنا تجمعنا أخيرا انا فحضن ماما و بابا
ماما : اهئ اهئ اول مرة كلمة ماما كتعجبني بحال هاكا
أنا : مابغيييتش نتفرق عليكم اهئ اهئ
هادو اليومان العالميان للبكاء لكن فرحانة دابا بزاف حيت معاهم
أنا : وقتاش اتجي ختي و خويا أنا متشوقة بزاف باش نشوفهوم هههه
ماما : ختك ها هي دابا شوية وتجي على ود الترونسبور كايتعطل
انا : اينا قسم ختي ؟
ماما : هي دابا أولى باك .. نتي دابا خصك تكوني ف لافاك ياك ؟
أنا : آه ولكن العام لي مات فيه بابا .. كنقصد لي كان مسمي راسو بابا ماما زهرة جاها شلل أنا كنت ف التاسعة داك العام مبقاش ليا فين نهز لكتوبا لا والو و سقطت داك العام دابا انا باك
ماما : خصك ابنتي نجيبو لك الانتقال لهنا
أنا (شت فغالي حيت هو ماخلانيش نقرى هاد العام )
غالي : أ. . خليني انا نتكلف لها ب داكشي
ماما : واخا ا ولدي لهلا يخطيييك عمري نسا خيرك
حنا مزال كنهضرو تدق الباب و مشات ماما تحل يمكن ختي شتها من البعيد هههه كتدي لي شوية تا هي عينيها رمادي لكن رمادي فاااااااتح و عندنا نفس الفم طويلة عليا و فاخرة عليا كاتبان كبر كاع و عاد دايرا المكياج انا حداها كانبان بريهيشة قبل ماتجي و تشوفني عيط لي غالي نجلس هداه مشيت حداه و همس لي فودني غالي؛ الله يصبرني هاد ليام توحشتكككك وباسني تحت ودني
انا : اويييييلي كون تحشم عنداك يشوفونا
غالي : و يشوفو ياء مراااااتي ولي معجبو حال راه البحر
أنا : ههههه البحر خليناه ف الرباط .. ناااري فيا بيبي
غالي : ولايني بوالة مع راسك سيري للحمام شكاتسناي
نضت كنضحك و مشيت مزروبة للحمام و مني خرجت شت ختي ملاوحة على غالي و كتعنقو و تبوسو اووه جاتني الغيرة محملتهاش منبغي تا وحدة تقرب ليه مشيت لعندهم وانا مغوبشة شوية قبل منوصل شداتني ماما، ماما : رؤية شوفي شكون كاين معانا تلفتات شافتني
رؤية؛ ااااااااا. . اويلي ا ماما هاد البنت فوطو كوبي عليك
أنا (ابتسمت لها): انا ختك رغد
رؤية : هاااا ؟؟؟ ختي
انا : هه ياكما مفرحتيش حيت ختك الكبيرة رجعات
رؤية؛ ههههه لا لا بالعكس غير تصدمت ممتيقاش حيت انا عمري كنت كنظن انكي اترجعي
أنا : ههههه على انا مشيت بخاطري ؟
ماما : واش مغاديش تعنقي ختك
عنقاتني : ياااه شحال تمنيت تكون عندي ختي و لكن كيفاش تا لقاوك
غالي : بابا لي لقاها و انا جبتها ..
رؤية : ااااه. . متصوريش اختي شحال ماما و بابا كيجبدوك من مرة فنهار هههه كنت كنغير منك جلسنا بقيت كنهضر معاهم كاملين و قولها و ضحك عليها ماما قالت الخدامة توجد ليا بيت و ل غالي بيت ..
تعشينا و حنا غير  كنضحكو  مشا غالي  دخل لنا حوايجنا طلعت للبيت لي عطاوه ليا كان اون فاس مع بيت غالي خرجت  باش نمشي  عند  ماما نقولها  تجي  تبات  حدايا ايلا بغات  مشيت  ف اتجاه  الغرفة  ديالها هي و بابا كان باب معزي بدون قصد  سمعتهم اش كيقولو
ماما : أحمد اخيييرا رجعات لي فرحتي من بعد 17 لعام  بنتنا رجعات
بابا : تا انا متصوريش فرحتي  حسيت  بحالا عودنا ولدنا  .. أجي نقولك  اش بان لك نولدو تاني 
ماما : هههههه لاواه حماقيتي راحنا كبرنا
بابا : ماكبرنا والو ا نور عينيا  مزال تولدي  عشرة  لابغيتي  هههههه 
شوية بديت نسمع صوت القبلات ناري مركت جيت ندور فحالي و انا نلقا ختي
رؤية : رغد اش كاديري 
أنا :  أ.. غير جيت نهضر مع ماما ساعة دقيت مسمعونيش  و جيت راجعة  بحالي جراتني  من يدي  و دقات  بجهد  خلعاتني ههه  حل بابا  مخلوع  و ماما كتقاد حوايجها و انا شاداني الضحكة ههه ولايني باسلة هاد ختي
بابا : رؤية. . رغد مالكم ؟
رؤية : وا راه رغد جات دقات و مسمعتوهاش وانا لي دقيت
بابا : و مالك عليها خلغتينا.. مالك  ابنتي رغد اش خصك
أنا :  أ.. لا غير بغيت  نقول ماما تجي تبات حدايا
بابا(بدا يدور ف عينيه ): ها .. فالصراحة .. م..
أنا :  صافي ايلا مابغيتوش  أنا غادا بحالي  (درت فحالي يخ حسيت براسي متطفلة )
ماما (جراتني ): لا لا انا انمشي نبات معاك  ابنتي 
أنا :  لا صافي غير بقاي سمحو لي صدعتكم
معرفتش حسيت  براسي  غير  زايدة  هنا  اصلا واخا هكاك حاسة بلي انا غريبة عليهم  هما كي كانو كيهضرو  ف   العشا و كيضحكو  واخا كنت كنضحك معاهم جاتني فواحد اللحظة البكية كايتفكرو شي ذكريات وانا مكنتش معاهم ..
ماما تبعاتني : رغد واش تقلقتي ا بنتي  ؟ ياك قلت لك انبات معاك                                                
أنا(بديت نبكي):صافي غير سمحو ليا جيت صدعتكم اهئ
غالي كان فالحمام خرج شافني كنبكي
غالي : رغد مالك؟ .. مالك كتبكي
بقيت كنبكي و مكانجاوبش هو محسش براسو و بدا يغوت عليهم :شكوووون بكاها .. هضررووو. . مااالها كتبكي
ماما :ماعرفتش أولدي مالها جات قالت لنا بغاتني نبات معاها شوية بدات تبكي
أنا : اهئ اهئ أنا كنحس براسي غريبة عليكم اهئ أنا حسدت خوتي حيت عاشو معاكم آه اهئ اهئ حسدتهوم  غالي  عنقني متسوقنا لحد بقيت دايرا راسي ف كرشو  كانبكي و بابا و ختي كيشوفو تا جراتني ماما و دخلاتني لبيتي و جلساتني  و عنقاتني  و بقيت كنبكي تا سكتماما :  واش تال هاد الدرجة ابنتي كتحسي براسك غريبة علينا. . بصح ماشي انا لي ربيتك حيت خطفوك ليا ولكن راكي بنتي لي حملت بيها 9 شهور و عاماين و نتي معايا كنا فرحانين بيك بزاف حيت قبل مانولدك كنت حاملة ب بنت و  طاحت ليا كنت انحماق و نولد بنت مني  نتي تزاديتي كان كلشي فرحان حيت نتي هي البنت اللولة  ف عائلة العمراني  جدك اصلا مكانش عندو خوتو و كان باغي البنت  لكن ربي ماجابش  ولد زوج ولاد كمال و باباك أحمد ،كمال هو اللول تزوج و ولد ولد و عاد حنا و تا حنا ولدنا ولد مني حملت المرة التانية كانت عندي بنت طاحت مني حملت بيك نتي كنت دايرة المستحيل باش ماطرا لك تا حاجة مني تزاديتي الفرحة لي حسينا بيها لا توصف  مني تخطفتي بغيت نحماق والله عمري نسيتك كنت غير كنحاول نتناساك شغلت راسي و صافي درت جمعية سميتها متقيصش ولدي غير على هاد الغدايد و فللخر ا بنتي تقولي كتحسي براسك غريبة
انا : ماما راه النار تا انا شاعلة فقلبي واخا يلاه لبارح عرفت و ليوم لقيتكم  ولكن راه ديك القضية د سرقوني بعدوني من واليديا فالوقت لي خوتي كانو عايشين معاكم كاتجهلني
ماما :  نتي ابنتي عاد عرفتي لبارح أنا راه 17 لعام وانا     محرومة منك و ماعارفاك واش عايشة و لا ميتة.. 17 لعام و كبدتي محروقة عليك. . بقيت  نهدر  انا و ماما و هي معنقاني تا نعسات نضت انا نمشي للحمام  حيت حبساتني تاني بيبي و انا خارجة من الحمام و جراتني يد