رواية زوجي مغرور بننشرها ان شاء الله كل يوم
زوجي مغرور
1 ..مطلوب زوج ..
الخميس صباحا قبل شروق الشمس الجو بارد ورائحة الهواء زكيه والهدوء يعم المكان الا خطوات المصلين بهدوء ماشيين للجامع اكثرهم رجال كبار ف العمر ..
وقف صاحب تويوتا قديمه جنب الجامع نزل وخش للجامع قبل الاقامه ..صلى صلاة الفجر بعد كمل الصلاه ..
____
الطريق طووويله بكل من مكان عمله الجديد وكثر ف شرب السوائل وقف بسيارته جنب الجامع ونزل بسرعه للحمامات طول الطريق ماسك روحه بالعافيه ولما قرب م الجامع ما اقدر يمسك روحه اكثر ..
طلع م الحمام قبل ما يركب للسياره لفت انتباهه الرجال ملتمين ف الجامع مع إن الصلاه كملت بس الفضول قتله
حب يخش يعرف شنو فيه ...
صاحب ال تويوتا ف وسط الجامع ويحكي بصوت عالي : يا جماعة الخير انا عندي 3 بنات وانا عارضهم للزواج .. من يقدر تحمل الأمانه يتقدم وانا نزوجه اليوم ..
سكت يستنى ردت فعل المصلين تعمد اختيار هالوقت بالذات ﻷنه عارف مافي حد يصلي الفجر ف الجامع الا فيه خير ..واليوم أخر فرصه له !! ومش اول مره يدور ع عرسان ف هالاسبوع ..
تقدم له شاب لابس نظاره طويل
قال بتردد : ممكن نعرف اسمك ياعمي ؟
بات البنات : ناصر ال...
الشاب : ليش بتزوجهم بناتك بالطريقه هذي ؟
بات البنات بلسان طويل ورقتله ع الاخر : مالكش دخل بتزوجهم او لا
سكت الشاب وعيونه ع بات البنات ..بات البنات كان وسيم مع انه كبير ف العمر والشيب فيه هيبه ..
طلع مجموعه م المصلين اللي ماهمهم الموضوع ..منهممن هزا ع هالطريقه ..ومنهم من شك ف الموضوع ..ومنهم من فكر ف البنات ورحمهم لكن ظروفه ماتساعد ..
بعد شوي تقدم شاب متردد وخلفه شاب اخر
الشاب : انا ليه الشرف نتزوج بنتك ..
الشاب الثاني : وانا ليه الشرف نكون نسيبك ..
" كان يفكر بسرعه ويحسب خسارته وربحه وكالعاده حسم الموضوع بسرعه ..
تقدم بثقه وغرور كأنه يطلب من " كافي " كوب قهوه : وانا ياعمي ناصر نتقدم خاطب ..
بحت فيهم منصدم ﻷن يحساب الكلام اللي قاله يرفضوه نفس الكلام اللي قاله ف الجامع المقابل وكان بيدور ف كم جامع بس اليوم م اول ما تكلم حصل من راغب ف زواج بناته ..واليوم بيسلم روحه للشرطه ويأمن ع بناته قبل مايسلم نفسه ..
قال للشباب عشان يؤكد : انا نحكي كلام رجاله مش تنسحبوا بعدين ..
الشاب ابو نظاره : انا عن نفسي مستحيل نغير كلامي ..
بحت ف الاخرين
الشاب الثاني : وانا مستحيل نغير كلامي ونأكدلك ..
الشاب المغرور شاد ضحكته قبل ماتطلع : والله ماننسحب
ونسحب بعيد عليهم شوي فرغ ضحكته ..
ناصر بات البنات سأل الشاب المغرور اللي ماعجبش وضعه : ممكن نعرف وظيفتك واسمك
الشاب : انا اسمي ياسر حمد ال...... دكتور
وطلع بطاقته ومدها لناصر في ثقه وابتسامه ..
ناصر خذا البطاقه وبحت فيها وردها له بعد ما تأكد من الشاب واسم عائلته تشفع له غروره وثقته ..
ناصر تكلم : توا تجوا معايا للحوش نفطروا ونتفاهموا ع التفاصيل ..
ابو نظاره : خلاص ..امشي ونحن وراك ..
وفعلا طلعوا م الجامع والشباب وراه ركبوا سياراتهم وتبعوا العم ناصر ..
مشى لحي متوسط وقف التويوتا والشباب وقفوا سياراتهم نزل هو وفتح الباب وخششهم لحوشه ورحب بهم وضيفهم ..
الشمس شرقت والبنات ف المطبخ دارن القهوه وبعدها دارن الفطور وقمعزن يستنن ف نصيبهم ..
الجماعه تفطر وتشرب ف القهوه تكلم ناصر :
مهر بناتي 20 الف كاش قبل نقروا الفاتحه تكون ف ايدي ..
الشباب ماحد تكلم بكلمه عرفهم ناصر موافقين قال :
انا بيني وبين خويا مشاكل فقدت اعصابي وكان واقف قدام السياره ضربته بها وهو بين الحياه والموت ..وبناتي كان مخطوبات لعيال عمهم الفاشلين لكن بعد اللي صار .... الحادث له اسبوع كل يوم نفكر ف بناتي ..انا معاد عندي ف هالدنيا شيء..وربي مارزقني بأولاد ..والبنات ضعاف وعيال عمهم كلاب مافيهم خير ..غير انهم زعلوا ع اللي درته ف باتهم ..وانا قت نسلم روحي للشرطه ونزوج بناتي احسن ماينتقموا مني بأي طريقه ..وانا نخاف ربي ف بناتي ..نريد كل وحده مستوره ف حوش راجلها اللي يحفظها ويخاف الله فيها ..انا عطيتكم أمانه تسألوا عليها يوم القيامه ..ونتمنى مانندم ع زيزتي بناتي ف يوم ..
نزل عيونه وتنهد ورفع عيونه وقال :
ماتعرفت عليكم
ابو نظاره : انا فيصل عبدالملك ال.... نشتغل ف عقارات
يعني بيع وشرا وهكي ..
الشاب الثاني : عماد خالد ال... نشتغل ضابط
ياسر بثقه زايده : ياسر حمد ال... دكتور
ناصر بابتسامه : بالجوده بكم
الشباب : تسلم ياعمي ..
ناصر : ياريت كل واحد يوريني بطاقته..
مدوا بطاقاتهم الا فيصل ناض لسيارته وجاب ورقه له باسمه لمكتب عقار ..وبعد دقق وتأكد والفرحه مش سايعته مش متوقع وظائفهم ترفع الراس وكلهم ماوصلوها الا بتعب وتفكير هذوما الواحد يزوجهم بناته وهو متريح ....." يحسابه روحه ع صح "
قال ببشاشه : مانوصيكم ع بناتي هذينا امانه ف رقبتكم ومانريد منكم تطلقوهم ابدا ..اضربها ..احبسها..تزوج عليها..اقتلها ..لكن ماتخلوهم هذينا ضعيفات ومالهم حد الا ربهم .." اي والله عليك وصيه اقتلها لكن ماتطلقها هضا اكيد مطرشق
زوجي مغرور
2
فجأه ينفتح باب الصالون بالقوه لين يخبط ف الساس ويخشوا راجلين الاول ف بداية الاربعين والثاني ف نهاية العشرينات ..
تكلم الاول بصوت عالي ويصرخ : انت شنو قاعد تدير ..مجنون انت تزوج بناتك بعرب م الشارع ..هذوما زباله ملقطهم ..
وقفوا الشباب بعصبيه ماعدا واحد مقمعز كراع ع كراع وفنجال الشاهي ف ايده وعيونه تشاهد ف المشهد باستمتاع
فيصل : احترم نفسك
عماد : مافي زباله غيرك
ناصر : عليش جايين هنا ؟ بناتي وانا حر فيهم نزوجهم ندبحهم مالكم دخل.. عثمان خوذ خوك واطلعوا م حوشي ..وانا اليوم بنسلم روحي للشرطه نتقابلوا غادي ..
تكلم الكبير عثمان بهدوء : ياعمي نحن مابلغنا الشرطه م البدايه سامحنا ..ماله داعي اللي تدير فيه ..ارحم بناتك حرام ترميهم هالرميه ..كله عناد ف باتي ..
ناصر : لا له داعي وانا خلاص اللي ف راسي بنديره ..وانا اصلا بنسلم نفسي اليوم وبناتي كل وحده بتمشي مع راجلها ..
سالم صرخ : زوجهم ماهمني الا خطيبتي ندبح اللي يقرب منها ..
ناصر بحزم : تفاهم مع راجلها
سالم بغضب : زوجتها يالملعون..منو فيهم راجلها..
ناصر بهدوء : امس الليل قرينا الفاتحه وهضا زوجها ..
وشير ع ياسر اللي ابتسم بلعانه ومكر ف سالم ..
سالم تمنى يضرب بس عثمان شده وطلعه برى بالسيف وهو يجر فيه قدام الشباب : خلاص ياسالم وصلنا متأخر ...
سالم بيضربه خلاص غير عثمان شده بالعافيه وطلع وهو يسب ف عمه ..
طلعوا وناصر قمعز ع الكنبه : كان المهر جاهز نقروا الفاتحه توا لو كانت اوراقكم الرسميه معاكم كل واحد يمشي يجيب المهر ويجيب اوراقه وانا نجيب المأذون ..
____________
حياه جديده
مقمعزه كراع ع كراع وتفكر مستحيل واحد عاقل يقبل يتزوج بنات معروضات ف الجامع واللي يأكد هالكلام محاولات باتها طول هالاسبوع كلها فاشله .. حتى لو رضى يتزوج وحده معروضه ف الجامع مستحيل يدفع 20 الف ف وحده لا يعرف شكلها ولا اخلاقها ..وصل فكرها اكيد فش حد بيرضى الا وراه بلوه يعني ممكن يكون كبير ف العمر نفسه يجدد شبابه او فيه عيب خلقي محد قبل فيه اوفيه ....
قطع تفكيرها صوت اختها ...تبكي بالم : انا خايفه افرضي نتزوج واحد سكار او يتعاطى او مريض نفسيا يضربني ليل نهار ويحرقني نفس اللي ف المسلسلات ..ويمنعني من زيارتكم ..او واحد يعذبني ...ااااه يابابا ليش تزوجنا هك حرام عليك ..
قاطعتها اختها : هدي بالك " قل لن يصيبنا إلا ماكتب الله لنا " نصيرك بتزوجي ..كان مش اليوم بكرة ..ونصيبك بتاخذيه زين ولا شين ...
الثالثه بضحكه : مريض نفسي ولا سكار ويصلي ف الفجر ف الجامع ضحكتيني ..هالشيء بالذات استبعدته..
خش عليهم باتهم وقال لهم جهزوا روحكم شوي وبنقروا الفاتحه غير يجوا الشباب وكل وحده تمشي مع راجلها..
..............
طلعوا الشباب اللي جا الاول فيصل لان المهر متوفر ف خزنته ف مكتب العقارات..اما عماد صاحبه ف المصرف توسطله وسحب له المبلغ م حسابه واخيرا ياسر كان المبلغ معاه وبسببه جا لبنغازي !!
ابتسام بخوف ومازالت دمعتها ف عينها : بنات ننقاني خايفه واحد منهم شفته وهو خاش للصالون عيونه تحتهم اسود وشعر ف كل وجهه غير شعر راسه طويل كأنه طالع م السجن ..او يسكر
فاديه : لحقتي تشوفيه وتدققي فيه ..ويمكن فيه الخير ماتدري ..
اماني : خلونا منهم توا ..
الفاتحه نقرت لابتسام هي الاوله ع عماد وعقدوا القران بدون تحاليل بعد شرح لهم ناصر حالته بسبب هالظروف الخاصه وجاب اثنين من اصحابه بعاد شهود ..
خذا المهر وطلعت ابتسام مع عماد وركبت للسياره ..
بعدها قرا الفاتحه لأماني ع فيصل وطلعت اماني مع فيصل وركبت ف السياره ..واخيرا جا ياسر اللي عطل شوي وعقد القران فاديه ع ياسر وخذا زوجته وطلع ..
وقبل يعقد القران خش ع بناته وقال : مبروك عليكم يابناتي ..الله يسعدكم يارب ..اسمعي يابنتي انتي وهيه خلاص توا متزوجات بنقول نصيحه ان شاء الله تنفعكم ..احفظوا ازواجكم ف حضورهم وف غيابهم واكرموهم ..والراجل تجيبه الكلمه الحلوه والتودد مش العناد كويس يافراولتي
ابتسمت فاديه بغصه ونزلت دمعتها : كويس يابابا ..
كمل : الدموع والدلع الزايد مش مطلوب كويس برتقالتي
زادت الدموع مطر وبشهقه ابتسام : ك و ي س ي ب ا ب ا
كمل : والبنت اللي بس عند التلفزيون او البلاستيشن ماتعرف تطبخ تخليه يتزوج عليها صح تفاحتي
قالت وهي تبكي نفس خواتها : صح يابابا
كمل : ماقلتكمش ع وظائف رجالتكن وظايف ترفع الراس ..انتي يافراولتي "فاديه " ياسر دكتور ف مستشفى حكومي وبرتقالتي " ابتسام " عماد ضابط ف الشرطه واحلى تفاحه " اماني " فيصل يشتغل ف العقارات..
بعد قروا الفاتحه كل وحده خذت شنطتها كبيره فيها اللبس والشنطه المتوسطه فيها الاكسسوارات والكريمات والمكياج والعطور
اما الكلينكس والقلم وورقه ومرطب شفايف ومرايه ف شنطه صغيره اللي ف اليد كلهن نفس بعضهم الا فاديه عندها حاجه زايده ديما ف شنطتها ..
...........
ابتسام اكبر وحده ف خواتها واكبر من اماني بسنه رسبت ف ثالثه ثانوي عشان تقرا هي وخواتها واماني اكبر م فاديه بسنه..
