زوجي مغرور 103
بشرى بهزوه : كنك خذاتك الحميه ع بنت عمك ..لو فيها خير ماترد لحوش راجل طردها بنص الليل وعزق عليها الطلاق.. من غير مايسألها..
كل اللي ف جسمي إنتفض.. إبتسام بنت عمي أضعف خواتها ..نهانت وهي أمانه ف رقبتنا ..ولما سألت ع سبب طلاقها قبل وضح لي سعد إن السبب سوء تفاهم.. لكن بشرى توضح الموضوع مختلف تماما.. طردتها م حوشه بنص الليل وطلقها.. بسبب هضا كان سعيد يبيها زوجه وما يبيها ترد لراجلها.. سألت بشرى :وليش طردها..
جاوبت وهي توقف بصعوبه بسبب حملها ف طريقها لدارنا : كانت طالعه بدون إذن زوجها.. حاولت أمي تمنعها وتلاسنت مع أمي ..وف لحظة غضب لعنت باتها.. فردت عليها إبتسام.. بعدها اتعبت أمي ..وطاحت علينا أول مره.. شلناها للمستشفى.. سأل عماد شهد ع السبب.. بس شهد صغيره مش فاهمه شيء وحكت القصه غلط.. وبسبب هضا.. صار اللي صار..
سألتها باستغراب : مافكرتي تدخلي ..وتوضحي له.. ولا سأل إبتسام وخلاها تدافع ع روحها..ولتوا مايعرف الحقيقه..
جاوبت ب فتور : لا مسألها.. طردها وهي لابسه بدلة الصلاه كويس ماضربها.. ومندري كان عرف بعدين ولا.. معه حق وحده واخذها من جامع..
هزت كتوفها ومعالم وجهها تنطق " جت م الله وطرها عماد نردها له "..
سألتها : كان يعلم وقتها إن إبتسام حامل !
ردت ببساطه : يعلم.. بس ف لحظة زعل مافكر.. وأظنه لو فكر يديرها أخره.. هي لو عندها كرامه ماردت له..
قلت بصوت هادي : تعايريني ببنت عمي..
ماتعرف إن إبتسام كيف أختي.. جنت ع روحها لما حكت الحقيقه لي تسب ف بنت عمي.. ماتنهان بنت عمي ونا حي نرزق.. سبحان الله كيف ترضى ع الاخرين السوء وما ترضاها ع روحك.. لقيت الكلمات تنزلق م لساني : إبتسام كانت صادقه أنا كنت نحب فاديه.. كنت مجنونها
جحظت عيونها ..فكرت نسحبها م إيدها ونفتح باب الحوش ونطردها.. وتتصل بخوها يجي ياخذها.. نفس مادار مع بنت عمي..
لكن غيرت رايي بآخر لحظه ..نكون أفضل منه.. أمرتها تلبس عبايتها ..ترجتني تفهم السبب ..جاوبتها : بنت عمي نطردت وهي ماتعرف السبب ..وانتي مش أحسن منها..
وخذيتها لحوش هلها..
_______
فاديه..
خش بهدوء ..كنت مقمعزه وسط الصالون.. كان ناوي الهجوم يهجم ..مش ح نقمعز ف خوف مترقبه امتى يبي ينتقم.. يدير اللي بيديره وننتهي..
مشى باتجاهي وقف قدامي .. ثبت قدامي بشجاعه منقطعه النظير.. قمعز جنبي.. بابتسامه مائله : جهزي العشا..
كان العشاء حوت.. جبته بصمت.. بهدوء مخيف.. قمعزت قدامه ..غادر شعور الترجيع.. وحل مكانه الجوع ..كان ياكل بنفس الترتيب..
تكلم بثقه : جهزي روحك بعد شوي.. ناخذ حاجاتك م الحوش ..وماديري ولاحركه مالها داعي..
همست بهزوه : إنت تأمر أمر
رد بنظره ضاحكه : حد قالك من قبل.. إنتي عدوة روحك فدوى..
هزيت راسي : مادام انت قلت ..
وهمست بصوت منخفض : خذوا الحكمه من أفواه المجانين..
زادت بسمته : بكرة ترضي.. ﻷني استحاله نطلقك.. وانتي مش خاسره شيء.. بالعكس أنا حققت وحده م أمنياتك وممكن تكوني حامل فيها توا..
جرحني وهو يذكرني.. ليلة أمس مازالت مابرت .. وكان لابد ينجرح بالمقابل : أمنيتي !! ولد صغير.. يكبر شوي يقعد مغرور ويكبر أكثر يقعد مغازلجي يكبر أكثر يقعد يدخن ويرتقى لسكير.. أكثر واكثر يقعد مغرور نسنونجي سكار كافر فاسق.. حثاله كيفك.. ا ا ا ا ه ونفتخر فيه..
وقف ع طاولة اﻷكل طيح الكرسي وراه .. مسك بيه.. وبسبابته وإبهامه مسك شفايفي.. ماخلاها لين نزفت وهو يتكلم بغضب : أنا ماني حثاله ..ولا عيالي..
قعد فتره ساكت..
ونا نحاول نتحمل قرصته لشفايفي ومنع دموعي.. وهو انفجر ..ونا نحاول مقاومه للهروب بعيد لكن وين..
بصوت عالي ووجهه مصدوم ونظراته مركزه بوجهي.. بدون غرور ..بدون حتى ثقه.. بألم مجروح..وهو يتحرك: كنت نحسابك صغيره ماتعرفي الكذب والغش غير كل الصبايا.. كنت نقول نحبك توحشتك وانتي واخدتيني مسخره.. عمرك ماقلتي نحبك ياسر.. وفيت بالعهد والميثاق.. ضربت الراجل عشانك..وخليت هلي وكل شي وراي عشانك.. سافرت بعت سيارتي أغلى ماعندي عشان نعيشك متريحه ونسعدك.. ودعتيني تضحكي ونيتك شينه.. وروحت لقيتك مسيبتيني.. كنت ناوي نلحقك ونقتلك.. لكن حظك بمن مسكني.. بعدها بفتره فكرت يمكن كان اﻷثاث مش عاجبك أو خوك إجبرك.. يمكن ويمكن.. لكن أنا بغباء نفكر.. نسهر طول الليل نتأمل صورتك بتليفوني كأني مهبول يكلم صوره.. سميت بنت خويا باسمك.. نجنيت بعدك حاولت بكل الطرق نردك.. وأخرتها.. غدرتي بيه وعمري مالمستك وكانت كذبه.. وزدت نجنيت طارق يقول شافك وكلمك.. وربي كنت بننجن بسببك....
قطعته " السراق يحساب العرب كلها سراقه " هو خاين يحسابني خاينه..وضحت صورته الرديئه ..ونا نرجف : تعيشني متريحه !! تقصد تدفع الفلوس ف بلاويك .. خمس الاف ف ليله وحده.. وعمرك ماشلتني للسوق نشري حاجه.. حتى العمره كان خاطري فيها وأجلتها ﻷن نحساب راجلي ماعنده فلوس وماله داعي نتعبه.. لكن الفلوس تطلع ف بلاويك.. منهو فينا الكذاب والخاين.. صدقتك بحسن النيه ..كنتش نعرف إن فيه وحدين ماتعرف للصدق طريق..
زوجي مغرور 104
.كنتش نعرف إن فيه وحدين ماتعرف للصدق طريق.. تقول تركت الخمره ..وانت كذاب.. خمره برمضان .. برمضان يافاسق ..إنت ماتخاف ربي..
فرغت جعبتي واستنزفت مشاعري..
سأل باستغراب وهو يتقرب : خمس الاف.. نسكر برمضان
جاوبته بثقه ونا ندفع دموعي : إذا كنت تحسابني غبيه فأنت غلطان.. او تحسابني نشوف الخطأ ونسكت فبرضوا غلطان.. برمضان قبل تسافر.. وراء شجر ف الجنان أربع قوارير خمره.. ومسجل ف دارك فيه صوتك تتفق ع سهره ..كذبت عليه وقتلي بنمشي للعمل وانت ماشي لشيء أخره.. بعد هضا كله تبيني نقعد.. نستناك..
قطعني بوجه غاضب : ماعندك ثقه فيه.. أي شيء نديره فيه خير تحوليه ﻷبشع شيء يخطر ع بالك.. ليش ما وجهتيني ؟ليش ماسألتي ؟مافكرتي يمكن يكون عندي سبب مقنع ..أنا غبي لدرجة نسجل مكالمه توديني ف داهيه..
بكل صراحه : أكيد غبي.. شنو اللي فيه خير نحوله !! مش محتاج نحوله شاري بنت لليله وحده وين الخير .. وصح شرفتها ياصاحب السمو المغرور إنك أول راجل بحياتها.. وعندك سبب مقنع توحشت ماضيك.. أنا فاديه مش الممرضات.. أو مي ولا إبتهال أو خلود وسهى وزينه
وخر وقمعز ع الكرسي وتكتف ببرود وسأل بهدوء وكأن طاقه نسحبت منه فجأه : حافظه اﻷسامي !! شنو تعرفي أخرى فاديه ؟
خفت م بروده.. ونطقه ﻷسمي رعشه نتفضتني.. لكن تذكرت قصه لشعري واللي داره الصبح وأثار الروج ماشي لوحده م عشيقاته ..كانت بنزينه ..بنزين مشتعل مش منتهي لجرحه تحرك فمي : ماتعرف تصلي.. آخر مره صليت كنت ف اﻹبتدائي..
سكتت وبعدها كملت ونا نشوف تأثير كلماتي ف تغيير تعبير وجهه : وانت مراهق مع مرت خوك صار موقف بايخ.. طرداتك أمك عشان الشغاله.. خطبت فوق خطبت صاحبك.. جربت كم وحده.. حاولت تغرر ببنت إسمها نعمه ..دعت عليكم.. وصابت كل واحد منكم مصيبه..
اهتز فمه كأنه يكلم روحه بهمس : مصيبتي ابتليت بحب من يكرهني..
تحرك بدون راحه وبعدها كأنه يعترف : خساره فيك نوضح لك الحقيقه.. بس لو خذينا الجانب اﻹيجابي إنتي تعرفي كل شيء عليه.. وعندك سبب وجيه تسيبيني.. وهو غبائك وتهورك.. وﻷني اقتنعت نوقف عليك العقاب..
سألته : الكف وقص شعري والحوت.. وقلة أدبك.. وغسل كرعيك.. هذينا عقاب !!
وقف حرك راسه..وتثاوب .."بكل وقاحه " كأنه يتابع برنامج ممل : خلصيني.. البسي عبايتك خلينا نجيب حاجاتك..
وصلنا للشقه ..فاضيه.. هشام أكيد بواحد م مشاويره.. كانت داري مسكره بالمفتاح.. خشينا..
تعرفوا شكل دار البنات قبل طلوع لحفله.. الاكسسوارات مطرطشه.. ريحة العطر المستخدم فايح.. اﻷحذيه بوسط الدار ..واحد م الدواليب مفتوحه.. المناكير فوق الكومدينو مفتوح وجف.. اﻹستشوار ف البريزه..
تكلم بهزوه : دار مرتبه..
كنت نلم ف حاجاتي بسرعه ونحط ف الشنطه ..تعرف ع وحده م الشناطي متاعه خذيتها لما سيبت البيضاء.. يومها قنعت روحي واخذتها إنتقام.. لكن بعقلي اللاواعي خذيتها كنت بنحتفظ بشيء يحمل ريحته.. كنت نفتح ف الشناطي ف الليل ديما بحنين لمن امتلك قلبي ونعاود نرتبها.. نتفائل بها..
فتح وحده منهن لاحظ دقة الترتيب وريحة العطر علق بسخريه وسكرها بعنف : فيك الخير مهتمه بلبسي !!
ردينا للشقه.. كنت بنذاكر ف الصاله ..لكن قمعز معايه وفتح ال تي في ..كان فيديو كليب لمريام فارس.. رفعت كتابي بنرميه فيه عشان يغير القناه ..لكن مستحقه للكتاب.. خذيت حاجاتي ومشيت لدار النوم.. خش بعدي وبدى يغير ف دبشه بقلة ذوق.. وكمل وطفى الضي ورقد ع السرير ..
بغضب قفلت كتابي.. وبما إن باب الدار مقفول.. أفضل حل نرقد.. لكن استخاله نرقد ع السرير المشئوم.. خذيت عبايتي وف الزاويه تكومت..
قطع السكون صوته الهازي : هاي حلوه كل يوم نشيلك.. كسرتي ظهري بثقلك.. تعالي ارقدي هنا قبل نشيلك بطريقه ماترضيك..
وقفت بحمق وخبطت كراعي ع اﻷرض.. قربت م السرير كان راقد م جهة اليمين ..رقدت م جهة اليسار.. ف دقايق قريب نرقد نحس بيده ع كتفي ..باعدتها..فهمس ف الظلام : كيف نوصل لك فاديه.. لا اللين ينفع معاك.. ولا الشده عطت فايده..
سكت فتره وابتعد.. تكلم بثقه : لو عادي تلعنك الملائكه..
_______
طارق..
وصلنا للفندق ..وعاد إقدرت نصبر أكثر..
غيرت لبسها ..ورقدت ع السرير..
غيرت لبسي وطفيت الضي وبدون شعور امتدت إيدي لها تدحرجت وطاحت وقفت بالجانب الاخر م السرير.. وصلت بسرعه لمفتاح الضي.. فتحت ضي الدار كلها.. وقفت وجهها ملطخ بالدموع كأنها تقول تأملني.. لكن ما إفهمت شن تعني..
فكره وحده سبطرت عليه.. هي متقززه ..نافره نكون زوج لها..
وقفت بسرعه نمسكها ..كافحت هي تخلص من إيدي
صرخت بجزع : فيصل ..لا..لا.. فيصل ...لااااا
طاحت ساكته لاتحرك ولاتكلم ..بسرعه جبت لها عطر بعد ثواني ردت وعت وهي تبكي..
هزيتها ونا نسألها : شنو دارلك فيصل.. اعتدى عليك ..ضربك..
تباعدت ع إيدي ..قمعزت ع السرير ومازالت الشهقات تهز جسمها : لا ..أنا...
وسكتت..
بصوت باكي : سيبني ..
عاودت السؤال : ليش كنتي تطلبي م فيصل يسيبك ؟
جاوبت بغضب صارخ : وليش نقول لك.. عشان تشمت.. تبرد قلبك..
جاوبتها بسرعه ...
زوجي مغرور 105
جاوبتها بسرعه واهتمام : خاطري نعرف بس..أنا راجلك ومن حقي نعرف ..
قربت منها صرخت : ماتلمسني..
هددتها : نلمسك كان ماقلتي..
طاوبت بغضب وحزن : كان يشك.. بجنون يشك.. مره مشينا للمول شاب قال ياحلوه ..لما روحنا إتهمني إني نعرف الشاب ومتفقه معاه نتقابل ف المول.. ونا لانعرفه ولاعمري شفته..
كان هضا إسلوب فيصل المريض كان يحب يوهم روحه والاخرين إنه مضطهد.. كانت أمي تحبه كيف ماتحبنا لكن كان ديما يتهمها بكرهه ولما تقصر اتجاهه بدون قصد كان يتهمها بالتعمد.. ودار نفس الشيء مع هذي ال.....
كملت وهي ترفع وجهها بعنف وغضب طار شعرها لورى : إنت السبب قفلت عليه الخزان وهو صغير.. انت ماتخاف ربي.. كان خوك.. كيف تقدر.. كيف طاوعك قلبك.. إنت بدون ضمير ..مجرد م المشاعر..
بسرعه نفيت كان المهم عندي تصدقني : لا... هو قالك.. هو طاح غادي.. كنت ندور عليه وربي يومها بكيت ليلي كامل ..وماكنت نعرف وينه.. وتخيل أو هلوس أو مندري عنه أنا حبسته.. لكن وربي ماكنت انا السبب بحبسته .. هو ديما يحط اللوم عليه بكل شيء..
كانت حالة فيصل النفسيه سيئه جدا حتى بدى يحيك بخيالاته المريضه أحداث بشعه فيها هو المظلوم المضطهد والعرب هم الظلمه..
وخرت للخلف واحتضنت ركبها وتوا بان شكلها كأنها طفله صغيره لابسه بيجامه بيج هادي قطنيه..
فاجأتني وهي تكمل كلامها : يوم جيت إنت وباتك.. وكنت تطلبه يطلقني ..وقتها كنت وعدته نقعد معه لاخر العمر..لكن..
شجعتها تكمل : وبعدين !
لكن الذكرى نبضت بسرعه بعقلي يومها أعلنت حملها..
كملت أماني : إنت هددته بالدين.. خفت تسجنه.. فتعذرت بالحمل..خطه هبله بس نفعت..
سألتها مصدوم : تعذرتي !! ماكنتيش حامل ؟
هزت راسها برفض : لا كنتش ..يومها سحبني ع المستشفيات والمختبرات عشان يتأكد إني مش حامل ..
سألتها بدهشه : عادي لوحملتي.. ليش يشيلك للمستشفيات.. هضا غبي مايعرف كيف ايجو اﻷطفال..
نزلت رايها لين قعد مختفي ورى غابة الخصلات.. وهمست بصوت إخترق قلبي : ﻷنه لمسنيش..
ماصدقت.. او مافهمت.. أو خايف ان يكون اللي سمعته توا خيال.. وعقلي المجنون صور لي هك : كيف يعني مالمسك..!!
همست باﻹجابه : أنا بنت..
هي كانت ليه م البدايه ..قدرنا إن نلتقي.. لكن عينها نظرت لي لتستمد القوه.. أنا فرحان لكن متألم عشانها.. نخبرها إني متماسك وقوي وننزف من جوا توقا لها..
كملت : لمسنيش ﻷني كنتش حلوه ..قصدي مانجذب الرجاله.. وعارفه إني مش حلوه ..يوم اللي عزمتني أمك وقابلت عفاف.. وحكت لي ع عزه..
عزه !! من عزه ؟ انا نعرف م النساء أماني..أماني وبس..
تنهدت ورمقتني بنظره بائسه وصوت ضعيف مواصله كلامها : قال لي فيصل إنت قلت له يتريح ﻷن مريض.. وبس نطقت هو صادق.. كأني كفرت ..قعد يصارخ ويقطع ف دبشه وقطع دبشه وضرب روحه.. إتهمني إني نحبك..
طارق كان يعرف خيال فيصل نشيط واجد..وهو يصدق خياله ويعيش الدور لكن هالمره قرب مالحقيقه لكن بالعكس أنا من كان يحبها لكن بشكل أخرى.. حبيتها لكن بدون ماتعرف.. تذكر صراخها وحس بالندم ياكله لعدم التدخل..
قرب منها ببطء وهو يهمس بصدق : إنتي حلوه.. بعيوني نشوفك ملكة جمال.. فيصل أعمى كان قال عليك مش حلوه.. وجهك بدر وشعرك حرير وعيونك جواهر.. كلك ع بعضك فوق الخيال..
رفع شعرها ع جبهتها.. وحط إيده ورى راسها وحط راسها ع كتفه وإيده الاخرى تحرك بلطف ترقى وتنزل ع ظهرها.. اضطرها للصمت وحتى الهرب ماخطر ع بالها..
قلب تأكد إن لقى نصه الآخر..طارق ❤
وقلب مازال خايف موجوع ومتألم.. أماني 💔
أماني ..تعتقد إنه كذاب ف مدحه لها طول السنه صدقت وتشربت فكره إنها هي عدم قرب فيصل منها.. لكن كلام طارق فرح قلبها لو كان مجرد مجامله أو كذبه..
_______
فاديه..
اليوم إمتحاني.. نضت تاعبه ماذكرت كويس وخايفه م اﻷسئله لما تقرب مني كنت مقمعزه ع المرايه ..طلبته يوصلني..
لكن بحت ف شعري وخذا المشطه م إيدي وبدى يمشطه ردتني سنه لاورا..
فقلت غاضبه م روحي أكثر من غضبي منه : تباعد عليه.. تلمسنيش.. ساد طلباتك الوقحه أجلها لليل..
إبتعد وكأنه نقرص ورمى المشطه..وتكلم بغضب : حظك بقلبي ماطاوعني.. ولا... استغفر الله..
حاول يهدي روحه : لو كملتي هيه..
" هضا وقلبك ماطاوعك إمالا لو طاوعك " لبست ومشينا للجامعه ..تلاقيت أنا وأماني وإبتسام..
لما كملت إمتحاني كنت بنطلع إمسكتني "نعمه"..
"نعمه " هذي اللي دعت ع ياسر وشلته الفاسقه مره حاولوا يغرروا بها بس دعت عليهم كلهم م قلب إلا واحد م الشله خذا الفيديو اللي صوروها به بعد حوتك حصله يجري عليه لين حصله وتزوجها ﻷن هو كان راس المدبر ف العمله هذي أما باقي الشباب واحد نغرق واحد إنبثرت كراعه وواحد جاه مرض وباء الكبدي وياسر معناته مع فاديه وهو استقام وتزوج نعمه ..وف رمضان وفاديه ف البيضاء إمرضت نعمه وكانت حتى هي وقتها ف البيضاء ياسر خذا ولدهم وحطه عنده لين برت نعمه وخذت ولدها..
نعمه : حبيت نشكرك ..تعبناك إنتي وراجلك..
همست بعجله : وليش تشكرينا.. عادل مايتعب بالعكس ونسنا..
قالت وهي توضح : أسفه يمكن
زوجي مغرور 106
قالت وهي توضح : أسفه يمكن نزعلك لو قلت نكره ياسر ديما.. بس وقفته مع عثمان آخر مره.. لما ساعد عثمان ف البيضاء..
وقفت متجمده مكاني ثواني.. وسألتها : كيف ساعده ؟
قالت ببسمه : كان مبدع ..سجل مكالمه وقبضوا عليهم ..
سألتها : امتى صار هضا كله !!
جاوبت : قبل سنه برمضان ..
قمعزت وكنت قريب نبكي : كان يساعد ..ماكان يشرب أو..
قمعزت جنبي وهي تقول : ليش إنتي مصدومه ماقال لك
هزيت راسي برفض ..حطت إيدها فوق إيدي وتكلمت :
ياقلبي كل شيء يتصلح..
سألتها ودمعتي نزلت : سيبته سنه ..بعت أثاث حوشه.. قلت له حثاله.. حاولت نخلعه.. ماتجي فرصه فيها نقدر نقهره إلا استغليتها.. وتقولي يتصلح..
قالت بقوه : اها يتصلح ..إنتي لازم تمسكي فيه ..وضحي له ..اعتذري.. وصدقيني يسامحك..
طلعت م الجامعه ونا ساكته..
وصلنا للشقه.. قمعز قدام ال تي في قربت وقمعزت جنبه وحطيت راسي ع كتفه ..شعرتش بروحي الا لما تبختر : نعرف إن جمالي مدمر ههههه.. لكن حول لبس الجامعه قبل..
خشيت للدار ونا قريب ننفجر م الغضب من روحي كنت كيف القطوس الأليفه تمسح ف صاحبها..
حولت لبس الجامعه وطلعت بنتكلم معاه ونحاول صياغة كلامي..
لكن طلع..واستنيت..ماجا
أذن الظهر
أذن العصر
أذن المغرب
أذن العشاء
حسيت بقلبي إنقبض خوف وهلع..
_______
طارق..
كنت مروح بعد العشاء ..لقيت سمير واقف جنب سيارته وناكس راسه.. وصلته سلمت : السلام عليكم..
تكلم بصوت ينذر بالشر : وعليكم السلام.. طارق تعال نبيك بموضوع..
دون تردد ركبت بسيارته.. بعد مسافه طويله شكله متوجه لمكان محدد ..قال سمير بصوت هادي : ياسر.. صارله حادث اليوم.. بس جت بسيطه ..كسور وكدمات..
سكت نمنع التفكير السوداوي ..تفائلوا بالخير تجدوه..
مجرد كسور وكدمات.. مش حنتجرأ للإحتمال الأسوء..
وصلنا كنت بننزل مسك سمير بإيدي.. ورمى الفاجعه بوجهي بعد مافترضت وصلها بلطف وهيئني للخبر : ياسر توفى..
_______
ليلى..
اليوم قرر خويا عبدالعزيز الخطبه ..العروس بنيه بوسط العشرين مقبوله الشكل حسنه التصرف ضعيفه.. تلايم ذوق أمي.. لكن متأكده إنها تحتفظ تحت مظهرها الهادي بنيران تو تذوب جمود عبدالعزيز..
نتخيل شكل خويا وهو يتظاهر بالرومانسيه مع زوجته كان مستحيل ومضحك ..
"يوسف..حبي الرومانسي ياناس.. وربي ينفع معلم ل هالجلف "
إتصلت به اليوم العصر نستأذن منه عشان نمشي ونطمن عليه ..ونروي عطشي بصوته..
مقمعزه جنب أمي ..خشن مجموعه م الصبايا ولما شافني قريب صرخن باستنكار.. مش عاطيه بال للموضوع.. كان تليفون يوسف ف جيبي هزاز.. جت إتصالات واجده ع غير العاده..يكمل واحد يجي آخر.. كانت وحده م صحباتي عطيتها الرقم..وكانت تتصل حتى هي.. اعتذرت بنمشي للحمام عشان نتباعد ع أمي ونكلمها..
رديت : ألوو
جاني صوتها الحزين : عظم الله أجرك ليلى.. تعرفي نصدمت لما قالي راجلي يوسف اليوسف توفى..
سألتها مصدومه : إنتي شنو تقولي.. يوسف كلمته العصر ومافيه إلا الخير..أكيد راجلك غلطان..
قالت بصدمه : كيف عندكش علم !! الحادث صارله بعد المغرب..
نفيت مش مصدقه : يوسف بخير أنا متأكده ..
سكرت وطلعت..
والصبايا يبحتن فيه بشفقه..
الخبر منتشر..
وهضا سبب استنكار الصبايا لوجودي هنا راجلي متوفي بعد مغرب اليوم..
مشيت كالميت الحي.. روحي إمزطه .. وصلت لأمي وهي مقمعزه جنب أم الخطيبه وتضحك.. مسحت دموعي.. كأنه الدار فاضيه م البشر.. مسكت بطرف جلابيتها وهزيتها متوسله : ياامي خليني نرد له.. ياامي اسمعيهم يقولوا مات.. ياامي مات.. يوسف روحي مات.. ياامي نموت ونلحقه.. يا امي ماتسببي ف موت بنتك.. ياامي نحبه.. ياامي خليني نرد له يوسف.. ياامي ترجيتك..
وقفن الصبايا مصدومات.. سمعت وحده تشرح وهي تبكي مصدومه : ولدي شاف الحادث ع طريق كوبري الحديد ..سيارته تحولت عجينه.. تعرفيش أولها من آخرها.. حادث شين مستحيل حد ينجا منه.. أنا نصدمت لما عرفت إنها تكون مرت يوسف..
صرخت بيأس..ونا نحس بريحة أمي هبطت ع الكنبه احتضنتني : يارب نموت.. يارب نموت.. نبيش الحياه بلاه يارب نموت..
احتضني الظلام من جميع الاتجاهات.. وابتلعني..
_______
زينه..
أرسلت رساله لتليفونه ونتمنى توصله مايهم يرد أو لا..
ماإقدرت ننساه..ولا إقدرت نفكر بغيره..
وهو توا ف حضن وحده هي عكسي تماما..
كانت صاحبة شعر متلف ومتشابك أسود.. ونا صاحبة شعر أشقر ناعم كالحرير ..خلى كل الرجاله ف جميع مراحل حياتي يتسابقوا ينالوا رضايه.. لكن يبحت فيه وكأنه يشوفنيش..
لو إفترضنا مجازا إن الشكل غير مهم التصرفات.. فاديه ماتملك أي تحضر بالطريقه اللي تلامسه أو تشاكسه أو حتى تكلمه بها.. ريما بنتي تقول إنها كبت الميه بوجهه وقريب رمت الكوب عليه بسبب غيرتها.. ومع هضا كله كان مجنون بها.. أنا غضضت الطرف ع واجد من تصرفاته ونزواته.. حبيته بجنون وتقبلته كيف ماهو وتغيرت ع سباه..
الكل يعتقد إني نحبه بجنون مبالغ فيه ..صبرت ع سكر راجلي وإيده الطويله ولسانه اﻷطول.. جفاه هجرته وكرهه واحتقاره وبغضه ..لكن مازلت نحبه..
كيف وأمتى حبيته..
زوجي مغرور 107
كيف وأمتى حبيته..
نعرفش.. لما تزوجت حسام.. كنت متهوره مغروره بجمالي وحب زوجي.. بعدها طاح قلبي بين يديه.. كان يلفت أنظار الجميع.. مغرور وعنيد ومنفلت.. ومع هضا كله حبيته.. الحب مايخضع للقوانين والمنطق.. الحب أعمى.. وحبي لياسر أعمى.. أنا راضيه نبقى ع ذمته بأي حال طول حياتي..لكن فاديه من أعلنت إني نقدر نحتفظ به.. ﻷنها تبيشي ..لما تبيه يتخلص مني بسرعة القصوى عشان يرضيها.. فقررت نطلب منه يدع حرية إختيار وقت الطلاق لي عشان نأجله ﻷطول وقت ممكن.. إحتمال يرد لي..
لما خبرت أم ياسر مشواري الصباحي مع ياسر علقت بجمله بسيطه : الكلب مايحب الا خانقه يازينه..
وفعلا ..ونا نحب ياسر..
طلعت م دار ياسر..لقيت ولدي يكلم بالتليفون بصوت عالي ..ماقاطعته مريت سمعت كلماته : عمي سامي قبل شوي كلمني واحد م الشباب ..عمي ياسر صار له حادث متأكد عرف لوحات سيارة عمي ياسر ..يقول.. عمي ياسر توفى..
صرخت بأعلى صوتي.. قلبي طاح.. بكيت ونا نمسك ف تيشرت ولدي..
ف خلال دقايق كانت أم ياسر توقف وسط الصراخ .. تغير وجهها فجأه وهي تهمس بألم : شنو فيه.. شنو هالهرجه ؟
صرخت نبكي : يقولوا ياسر مات..
كانت ع استعداد تقبل طلاقه لها..
يقعد متهني وهو بعيد عليها..
لكن يموت.. لا...لا.. نتمنى نموت بداله..
أقسمت لوكان حي تبتعد ع طريقه ونعيش حياتي ع ذكراه..لكن نبيه حي..
يارب..يارب..
______
طارق..
خشيت المستشفى ونا مش مصدق الخبر.. المستشفى زاحم.. شاب شكله مش عربي جنبه شاب سأل عند مروري اﻹستعلامات : حادث صار اليوم يوسف اليوسف
شفت الراجل خلف مكتب اﻹستعلامات يبحت ورد تكلم بهدوء : الحادث اللي صار بعد المغرب ماحد يعرف المصابين ﻷنهم أربعه ف سيارتين.. وواحد منهم توفى..
همس الشاب : كيف ممكن نساعد ..نتبرع بالدم..
يوسف اليوسف هضا شبيه ياسر.. سألت سمير بتأمل : كيف عرفتوا إن ياسر هو اللي ف السياره..
قال سمير : السياره الثانيه كان فيها عصام..
نعرف عصام..هضا واحد م أعداء ياسر..لكني مش مصدق إن ياسر توفى ..الدليل الوحيد ع وفاته هو سيارته وواحد م أعدائه..
لما حاولت نشوف الجثه فوجئت إنه ممنوع لين يجي حد من أقاربه..
________
إبتسام..
اليوم بعد صلاة العشاء عماد بيطلع ..قال بسرعه : تعشي إنتي ..لو تأخرت إرقدي..بس باتي إتصل بيه وقال ضروري نكون عنده بعد شويه..
انا نخاف كان قعدت وحدي ف الليل مع ولدي هضا غير القلق.. باهي ليش نمشيش مع عماد..قلت بسرعه : استنى نغير دبشي ونمشي معاك..
قال بعجله : عندك عشر دقايق بسرعه جهزي روحك ولا مشيت وخليتك..
بعشر دقايق جهزت روحي ومشينا.. كانت سيارة سالم موقفه قدام الحوش.. معناها بشرى قاعده.. تمنيت قعدت ف الحوش مع القلق والخوف أفضل..
خش عماد لدار بشرى وسكر الباب وراه.. كنت نسمع صوت صراخ وبكاء.. لكني ماتدخلت.. ف محنتي ماحد تدخل ..كلهم وقفوا يتفرجوا ونا نرتمى برى..
طلع م دارها غاضب.. نحبش نشوفه غاضب.. نعرف.. نعرف أي حمقاء أنا.. فأنا نحب من لايهتم بي..
______
فاديه..
لبست أحلى ماعندي.. ودرت مكياج..أما شعري قصه بروحه مجنونه..
صوت حركه برى.. أخيرا جا.. حطيت العطر ..كانت الساعه تسعه.. كان مقمعز جنب الكنبه ع اﻷرض ..راسه بين يديه.. هو سكران مخلي الكنبه ومقمعز ع اﻷرض..
رفع راسه لما طلعت ..عيونه حمره.. أثار الدموع ع خدوده..
يبكي.. ياسر يبكي.. قلبي كان يبكي.. رد دفن راسه بين يديه.. قمعزت قدامه ونا نسأله بهمس : شنو صار ؟
مارد.. عاودتش سؤال.. قمعزت قدامه.. وللعجب بكيت.. بكيت عشان يبكي.. حطيت إيدي ع كتفه نواسيه.. لكن ضرب إيدي بالقوه..
وقال بصوت مرتجف : تعرفي شنو صار.. أنا حي وهو مات.. حافظ القرآن كامل ..صلاي صوام.. لكن مات..وانا السكير الملعون.. واللي الكل يدعي عليه بالموت وأقربهم أمي وآخرهم مرتي.. حي.. وهو مات.. يوسف مات..
مسحت دمعتي بسرعه.. لازم نوقف جنبه ف محنته..
أقل مايمكن تقديمه هو نرد جميله لما وقف معاي ف وفاة بابا..قلت بقوه : الله يرحمه ويغفرله ..ربي أرحم مني ومنك بعباده.. ادعي له ربي يثبته.. وجنة الفردوس مستقره..
صرخ وهو يرتعد : كان ودك لو كنت أنا.. أنا نموت أحسن مانبي حد يفقدني..
حاولت نمسك إيده ونتعامل معاه بعطف.. هو متأثر بموت صاحبه.. م الضروري نمتص الصدمه : لا ماكان ودي تكون إنت.. لكن هضا قدره.. ولاتقول عندكش حد يفقدك..أنا وين رحت.. أمك.. هلك..
همس بألم : كل شيء نحبه ندمره.. يوسف مات ﻷنه يعرفني.. ﻷن سيارتي كانت معاه.. وﻷنه يشبهني.. هما كانوا ناويين عليه انا.. حتى إنتي خذيتك وانتي بريئه قعدتي حاقده ونفسيتك مريضه..
يحس بالذنب ﻷن ماتوفى.. قربت منه أكثر..نزلت دموعي همست بالحقيقه : إنت لو تموت أنا نموت وراك ع طول.. أنا مش حاقده.. أنا.. أنا ..نغار..شنو ذنبي كان عقلي وقف وقلبي تكلم.. نعرفش كيف نصرف.. قمعزت معاك وانت سكران فحرقت قلبي بذكرك ﻷساميهن.. نعرف خذيتني خدامه.. نعرف شفت أحلى مني.. بس شنو ذنبي حبيتك.. غصب عني مش بيدي.. وعدتني وخلفت الوعد.. أو أنا نحسابك خلفت الوعد..
